講起黎巴嫩，可能大家淨係知道當地曾經戰火連連，不過Michael喺98同02年都去過黎巴嫩旅行，佢話當地除咗有戰爭的痕跡外，風景同食物都令佢留下深刻印象。「當地人最鍾意就係食kebab，kebab店多到好似香港的雲吞鋪一樣，而呢度的kebab味道夠地道，一食就好似返番去黎巴嫩咁。」
轉燒羊肉卡巴$60
Michael口中的kebab店已經在中環屹立了13年，原來全港只有5-6間黎巴嫩餐廳，但只有呢間先可以做得咁耐。
店中皇牌，一定係最好賣的羊肉kebab。老闆Joseph特別挑選肥瘦均勻的羊腿肉，每隻羊腿用7種香料最少醃足24小時，令羊羶味不脛而走，而當中的sumac──鹽膚木香料，更是Joseph的秘密武器。他說這是黎巴嫩特產，香港買唔到，係佢托朋友由黎巴嫩入口。Sumac帶有微酸同果香味，當地人習慣用來醃肉同整沙律，主要提升食物的鮮味。醃完的羊肉會以人手一片肥一片瘦的插到轉燒爐上。這個燒爐閒閒哋都過一百度，不停地360度將羊肉外層烤至乾身脆口，肉汁同脂肪遇熱就慢慢溶化，油香豐腴。
Joseph教路，最正宗的食法是在kebab上加蒜蓉同沙律醬。店中每日會將4磅蒜頭打爛，然後用人手一滴油一滴醋地加到蒜蓉中，將醬汁變得creamy，自製成1.5公斤的home made蒜蓉醬。由於黎巴嫩人6成的菜式以蔬菜做主打，所以kebab中還夾有新鮮番茄、生菜同青瓜，將羊肉的油膩感減半。
Michael
「要食kebab唔難，但係要食到咁地道的正宗黎巴嫩kebab真係只此一家。羊肉kebab一定係我心水推介，醃足24小時夠晒入味，肉質仲要好嫩好juicy，最緊要係假期會開足24小時，啱晒啲夜鬼啦！」
Beyrouth Cafe
中環擺花街39號地下A鋪 2854 1872
《FACE》飲食版監修人少年食神 Michael
何謂missing out? 本地有不少舊菜式被封箱，絕跡的原因可能是製作繁複、老師傅年華老去等等。不過只要你飲食經驗豐富，用心搜索，總有漏網之魚在附近。每期少年食神Michael發掘滄海遺珠，把舊時的食物連帶回憶重現眼前。 ####
留言列表
{{ article.title }}
