楊明及羅泳嫻雖在《心戰》中飾演情侶，但要到羅泳嫻戲中殉職時才較多對手戲，不過楊明去到臨尾都一樣冇好下場，最後慘死喺邵美琪手下。
捱出頭 《心戰》血腥殺人，被封為「TVB史上最重口味作品」，雖然師奶觀眾勁踩，上週平均收視更再跌3點，得番24點，但仍然深得網友歡心捧為神劇。除咗兩大主角鄭少秋、陳豪鬥戲夠吸引外，《心戰》一劇亦帶挈埋做督察的楊明及得兩集戲分的索腿臥底羅泳嫻，雙雙獲網友關注。
劇中飾演情侶的楊明（前名揚明）及羅泳嫻，分別入行超過10年，一個做親都係不良少女或妓女；一個入行後有幸得無綫力捧，可惜少年得志唔識珍惜，仲搞到成為無綫史上第一個重讀訓練班的藝員，最慘係期間半年冇糧出幾乎食穀種，楊明話：「我對住塊鏡都鬧自己仆街仔唔生性。」

 
31歲楊明入行14年至今一直做三、四線閒角，去年拍處境劇《誰家灶頭無煙火》才谷底回升，到《心戰》督察一角再被人注意，其實佢98年已和林峯、楊怡等為藝訓班同學，其後楊明更在《娛樂反斗星》扮霆鋒上位，受無綫力捧，可惜當時唔珍惜，愛玩爛蒲又惹上官非，搞到被無綫投閒置散先醒覺。

重讀藝訓班
衰爛蒲的楊明，最慘係05年因醉駕和刑事毀壞被捕幾乎一鋪玩完，今次難得可以扮成熟嚴肅督察都算係一個突破。楊明話：「阿戚（監製戚其義）開頭搵我，我都有啲驚做唔嚟，加上冇劇本，每日都飛紙仔，所以都好緊張，以前我唔識珍惜機會，好貪玩又生事，5年前仲成為第一個要重讀訓練班嘅人，中間都試過想放棄，嗰段時間完全冇工開，試過半年冇糧出好絕望。」唔想乞食惟有搵嘢搞，可惜全部失敗收場，楊明續說：「嗰陣都試過用啲積蓄搞生意，開鋪頭賣衫賣鞋，一有時間就自己睇鋪入貨一腳踢，不過最終做得一段時間，顧唔掂要執，又試過喺佐敦開鋪賣大閘蟹，做咗一季（3個月）就摺咗，嗰時渾渾噩噩唔知想點，有一日我對住塊鏡都忍唔住同自己講，仆街仔唔生性嘥晒啲機會，一路以嚟多得珍姐（無綫高層曾勵珍）一直畀機會我，我先有得繼續拍劇！」珍姐冇睇錯人喎！

索腿臥底嫁德男
羅泳嫻（Iva）入行12年，喺TVB拍親都係不良少女或妓女，今次喺《心戰》中飾演警察臥底，雖然得兩集戲，但勝在性感短裙加長腿，搞到毒男要將佢臨死嗰幕重播又重播。原來索臥底喺上年已經嫁咗畀德國籍I.T男友，Iva話：「雖然都有諗過放棄，但唔係因為做乜角色，而係做演員始終各方面都唔穩定，所以06年去咗日本讀化妝增值自己，返嚟發覺己都係鍾意拍戲，好彩TVB畀我返去。（你老公介唔介意你性感呀？）哈哈……我每次都先斬後奏，拍完先同佢講㗎，如果一早同佢講，佢梗係唔畀啦！我老公係開I.T公司嘅，唔算好有錢，不過都算唔使憂囉，拍戲真係為興趣咋！」 ####

 


跟秋官學嘢
楊明喺《心戰》中同鄭少秋最多對手戲，佢話喺秋官身上學多咗嘢，而佢亦憑督察一角令觀眾有新感覺。


提名「飛躍」
一直做閒角的楊明，直至拍《誰家灶頭無煙火》「田凱」一角重生，更喺上年憑呢個角色打入「飛躍進步男藝員」五強名單。


楊明強調最感激珍姐（曾勵珍），畀機會佢改過自新。


投資失利 06年曾於旺角開時裝店，但維持咗唔夠一年，最終因兼顧唔到及冇生意而執笠，之後又試過喺佐敦賣大閘蟹，一樣失敗告終。《忽然1周》圖片


頻惹官非楊明廿幾歲時不斷惹上官非，負面新聞不斷，05年醉酒駕駛及刑事毀壞更幾乎令他玩完，幸好如今終於醒覺，努力工作。《蘋果日報》圖片


年尾結婚修心養性的楊明上年喺微博宣布，會喺今年尾與拍拖2年多的圈外女友Joanna結婚。


羅泳嫻喺《心戰》憑呢幕火辣性感妓女造型贏得一眾網友目光，話佢死前呢個濕身長腿look好索。


上年出嫁 Iva上年4月與拍拖8年的德籍男友Daniel結婚，Iva話老公喺香港搞I.T公司，兩人打算2年後生BB。


吳啟華舊愛 03年Iva曾因拍劇而與大她15年的吳啟華戀上，可惜戀情維持年多便分手。


生得一副娃娃臉的Iva，今年已經32歲，170cm高的佢憑一對42吋長腿俘虜迷魂宅男。

arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄