面對面 荔枝角拘留所呢期旺名人，大攝影師劉定成上週二還押待判，再上個週六（5月26日）則是政界新人王黃洋達刑滿放囚。 有報道說，政府引進四部高科技通櫃機侍候犯人，我問黃洋達：「招呼你係人定係機？一隻定兩隻手指？」攝影師搶住問：「係唐人定阿差？」當然當然，還有最重要的問題：「到底痛唔痛？」


「梗係痛啦！痛到仆街，痛咗大半日呀！」平時在網上電台開咪時以粗口流利見稱、是日對談卻一直斯文淡定的黃洋達一講到通櫃，終於忍唔住：「其實好唔人道，照X光吖嘛！」 出冊當日，老婆陳秀慧哭了，黃洋達說，自己在獄中也差點哭了，因為辛苦黐番嚟嘅煙仔跌落屎坑：「喺入面食一口煙同喺出邊食一口煙，真係好×唔同，真係細味緊啖啖尼古丁……」 從無綫編劇、到高登紅人、到網上電台開咪議政、本月尾solo棟篤笑、9月參選立法局，33歲的黃洋達成為冒起最快的政壇新星，恰似古惑仔系列新興小頭目，聲大夾惡械鬥時一馬當先，上位期間再入埋獄，出到嚟理所當然頭頂光環：三百人出冊接駕團、妹妹仔日日手造cupcake送上門，仲唔係社運陳浩南、政界林峯？道理等同入黑社會同娛樂圈，皇上呢條從政路，頭早已洗濕了，冇得反悔。

監肉好細
去年九月，黃洋達因為輪候者闖入《立法會替補機制》論壇，明明已在場內，依然被檢控共同行事被判監三星期。唔服就梗，但為競逐九月立法會選舉，有刑期在身人士不符競選資格，黃洋達因此選擇入獄服刑同時上訴。五月二十六日，其在荔枝角收押所的二十日刑期屆滿，光榮出冊。
「喺入邊一心諗住出到嚟要補番三個星期要做嘅嘢，同埋去食牛扒……冇所謂靚牛定cheap牛，最緊要夠大塊。坐監搞到人有個錯覺，以為呢個世界嘅肉就係得咁細塊。」邊講，黃洋達邊用左右手指比劃出乳貼大小的監「肉」分量。


浸大傳理電影學院畢業，《監獄風雲》同《黑獄斷腸歌》睇唔少，親身入住當然別有一番滋味：「我喺入邊見過太平紳士，不過就冇乜申訴要求監犯有底褲着。我哋每日都有得換底褲，大家底褲撈亂着，佢哋話洗乾淨消過毒，呢啲嘢就無謂深究。我係所謂公眾人物，被安排住水飯房，間房面積五、六十呎，衞生ok，獄卒ok，但再文明，嗰度都係監獄，屎坑好臭、勁多虱咬。三面牆一面鐵籠，成條巷全靠一把風扇吹，唔通風又吹唔正，個個唔想對住個廁所瞓、又怕熱，所以晚晚就會見到成條巷嘅犯，伸晒啲手手腳腳出嚟唞涼。早餐一嚿肉一碟飯、午餐粥同包，晚餐四點開飯輪住食魚、雞同肉配飯，仲有宵夜添，夜晚6點有杯奶同一片方包，10點熄燈瞓覺。每日放風加沖涼有一個鐘，做工貼政府公函三個鐘，其他時間攞晒嚟胡思亂想。紙筆靠屋企人帶入嚟，我原本就係喺入面有好多靈感，寫咗好多監倉嘢。但係佢哋話寫有關監倉嘅內容有保安檢查，講到好難帶得走咁。寫咗萬幾字小說，坐喺嗰度靈感自然嚟自監倉，寫親都攞去檢查，次次檢查好耐，所以寫寫吓都唔寫囉。」

有啲內疚
有關監獄見聞，黃洋達說要留下最精采的給23、24號的兩場talk show《棟篤．笑死朕》。五月六日入冊日，黃洋達的黃大仙辦事處才開張五天，社區事務、出版事宜加上最重要的talk show宣傳，被迫全數移交老婆陳秀慧完成。聽過黃洋達網上節目的都知道，黃洋達去到邊連做騷都會帶埋「皇后」老婆，開口埋口都掛「秀慧」在嘴邊。呢個好老婆抵佢愛錫，三個星期裏幫他完成所有工作，連talk show門票也賣清光。「我同老婆識咗幾個月就結婚，咁就兩年幾。其實一個啱channel嘅人真係好難搵，有時你講晒所有嘢再加埋註解，人哋都未必明，當你搵到一個講咗一半已經知你想講咩嘅人，自然想同佢一齊生活。我同老婆工作性質相同（黃妻在天窗出版社任編輯一職），信念亦相近，興趣一致，做咩佢都會支持，唔使商量。Even坐監呢件事，一講就明。當然佢會擔心，最擔心就係唔知嗰度點，唔知應該擔心啲乜。」三星期內，「皇后」探監三次，次次隔住玻璃用電話對話：「第一次探我，佢已經喊，佢話識我咁耐從來未見過我剃鬚。」三星期後，黃太被丈夫抱在懷內第一刻已經忍不住淚水：「見到老婆真係好內疚，佢唔應該承擔呢啲壓力，我唔喺度，佢一路幫我企街站、一路幫我宣傳棟篤笑，佢又唔係唔使返工，仲要承擔我嘅壓力……其實真係好離譜、好內疚，出嚟當日已經處理咗手頭工作，做咗兩個訪問，跟住報紙編輯send message畀我：『恭喜你出咗嚟，但係請記得交稿！』，我就返咗去寫稿、同佢返姑媽屋企交代發生咩事，再返辦事處開會，開到兩點，第一日已經攰到死，一返屋企就瞓。第二日，去居民會、去遊行又一日，禮拜一、二再企街站、開咪排滿晒，直至尋日（29日）我生日，夜晚至終於剩番我哋兩個，一齊食飯、睇戲。不過唔使講啲乜，我愛你，我日日都有同佢講。」

洗濕個頭
老婆哭，黃洋達也哭過。不過不是為老婆，是為一支煙：「喺入邊一個月出一次糧，先至可以買日用品，包括煙。我入去三個星期，冇糧出自然冇煙食。有時幾日一支煙都食唔到，有時辛辛苦苦黐到一支煙返嚟要分開幾次食。你未坐過監真係唔明，喺入面食一支煙同喺出面食一支煙，真係好×唔同。係真係細味嗰啖尼古丁㗎……嗰日就係食嗰支煙太×享受，我睇住嗰支煙跌落去，真係有一兩秒猶豫好唔好執番上嚟。」


編劇出身、高登名人「笑死朕」真身，黃洋達乃是真正「鍵盤殺手」，如今從電腦mon後走到mon前，從電台咪後走到咪前，從政當然唔只鬧人咁簡單。在觀塘、黃大仙與黃毓民共同擁有兩間辦事處，黃洋達的時間除了開咪寫書，更多時間拿來深入社區，開設街坊補習社、興趣班，同車仔麵海味檔social，幫老人交form申請福利：「雖然我係半路出家，啲街坊上門話整親唔知點賠償、福利唔知點申請，我都算做咗一段日子，都識做。我從政，唔係俾啲名氣同擁躉推我去做，我係被共產黨推我去做。鬧同做當然係兩樣嘢，但係有啲嘢總要有人做。兩者嘅分別，我最深刻係大家對社會嘅睇法。有啲嘢作為一個創作人，自己感受行先，但係做政治，係人哋感受行先。有人話我係政治偶像，被谷到今時今日嘅位置……梗係冇呢個可能性，所以更加要提醒自己，唔能夠為鏡頭同歡呼聲而活，唔好做錯事，尤其係集體行動時，會唔會過咗火？有冇令大家陷入危險？嗰一下，會好謹慎，一定要謹慎。尤其係我哋呢啲激進派，最首要條件係要冷靜，唔係為咗激畀你睇。點解激進啫？係因為少數聲音吖嘛，我哋要記住，我哋係要發聲，唔係為咗令大家怕咗聽我哋把聲。」


做過十年TVB及邵氏電影編劇，離開以後，黃洋達應傳媒要求鬧過TVB好幾次。鬧過梅小青、劉家豪兩位已離巢金牌監製夫妻檔廢，又鬧過一線小生姐仔「×那星！唔專業，成日想改我劇本！」查實黃洋達承認，自己任職編劇年代，其實也是hea寫：「咁寫得、咁寫又收貨喎，咁個人嘅底線咪愈嚟愈低囉……其實華標寫到、旭明寫到，係因為佢哋肯去『揮』。睇你去唔去『揮』，有冇決心同成個體系抗衡之嘛，個決心我冇囉。」編劇界係二打六，政界做咗偶像派，咪係囉，個分別在於有揮定冇揮。 ####


 


上月26日一早9點，三百名支持者浩浩蕩蕩接出獄，太太陳秀慧哭紅雙眼，黃洋達靜靜雞安慰老婆：「唔好喊啦，我出嚟啦！」


但再文明，嗰度都係監獄，屎坑好臭、勁多虱咬。


近年與黃毓民出生入死搞社運，黃洋達說：「喺佢身上見到毅力同忍耐力，唔係咁有忍耐力，唔會做咗咁多年議員仲做緊啦。」《蘋果日報》圖片


6月23、24的兩場《棟篤．笑死朕》talk show，冇乜宣傳方法好得過入獄，黃洋達未放監，門票已告售罄。


拍拖數月便決定求婚，出版過多本小說的黃洋達還把：「陳秀慧，請你嫁給我好嗎？」的暗號藏在小說《金錢師》的解謎遊戲中，夠晒浪漫。


2010年，黃洋達開始在網上電台主持節目，《笑死朕》、《皇上有話兒》等節目點擊率都是電台之冠。《蘋果日報》圖片


有人話我係政治偶像，被谷到今時今日嘅位置……


黃洋達01年加入無綫，參與過《情人眼裏高一D》和《衝上雲霄》及電影《勁抽福祿壽》等編劇工作。


作為政治偶像，黃洋達說：「冇話因為呢個位一定要做啲嘢畀支持者睇，要思考件事多於思考個成效。」《蘋果日報》圖片


出冊後，女fans每日送上自製蛋糕，辦事處雪櫃囤積不少。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄