曾國祥曾志偉仔連嗒兩 o靚模曝光忽然1周 775期 @ 娛樂八掛大放送★

曾志偉兒子曾國祥近日被爆背住圈外拍拖九年的女友，同一時間連嗒兩名o靚模，其中一位就是周秀娜師妹，舊八模之一的A.Lin（裴殷），更有傳A.Lin一度要睇心理醫生治情傷。事後曾國祥否認速食兩o靚模，更辯稱連A.Lin電話都冇。
個仔遭人撕破情場騙子面具，老竇曾志偉冇鬧之餘，竟然開口力撐：「識朋友好似叫餸食飯一樣，多啲選擇……依家得三個好小事啫！」
至於這宗感情騙案的另一受害人，本刊發現原來是出道兩年，以拍攝廣告為主的o靚模Ivy（蔡瑩瑩），她亦是A.Lin身邊的好姊妹。本周二（1日）晚，問到Ivy被曾國祥玩弄感情時，她即無奈地說：「我唔想再提呢件事，以後喺呢個圈都要帶眼識人。」

上周五（28日），21歲的A.Lin自爆被一名藝人第二代玩弄感情，更在傳媒面前大罵他是賤人一個。數天後，有雜誌就揭發這位專玩弄感情的藝人第二代，就是曾志偉兒子曾國祥，更踢爆他瞞住圈外女友，暗溝A.Lin和另一o靚模。

A.Lin失戀殘爆跑步

志偉想淡化事件
本周二（1日），曾志偉到電視城為《超級遊戲獎門人》錄影，早已得悉記者來意，企定定接受訪問，並以他一貫抵死作風見招拆招，企圖淡化事件。他力撐兒子說：「呢個仔冇用呀！得三個（女朋友），冇啲父風（父親風範），不過後生真係無敵，乜都可以做。其實真係冇所謂，後生仔識吓唔同朋友都好，我都試過啦！好似叫餸食飯一樣，叫多幾個，多啲選擇。（有冇催個仔結婚呀？）不嬲都冇強迫佢哋結婚o架喎，呢個年代喺埋一齊，唔結婚唔生仔，有啲結咗婚都唔一齊住啦！」
有傳曾國祥年初帶A.Lin到美國出席陳小春和應采兒婚禮，順道見埋家長，曾志偉被問起此事時，他依舊笑笑口說：「咁多個，點記得係邊個呀，不過呢啲咁小事，唔使提。（佢同時有三個女朋友喎？）得三個咁少，三百個就多咗啲，三十個啱啱好，一個月多一日出嚟可以休息！」之後他就以錄影為由拒再做訪問。

微博掀罵戰

SMS冧女
有指曾國祥以教戲為由，火速溝掂A.Lin，而當時A.Lin得悉男方已有一名圈外女友，亦甘願做第三者。知情人士說：「Derek（曾之洋名）好識冧女，攞到電話號碼之後就會經常send短訊俾啲女仔，話好掛住你好想見你，啲女仔咁咪出事囉！」
本刊收到消息，約三個月前，即曾國祥和A.Lin秘交期間，在一位朋友家中見到另一o靚模Ivy（蔡瑩瑩），就以純熟手法問Ivy攞電話。「佢哋其實年幾前喺一個common friend嘅生日party已經見過，但當時都冇乜交流，估唔到幾個月前Derek去咗朋友屋企開會，咁啱Ivy喺度，Derek臨走前特登行去問Ivy攞電話，冇幾耐就溝到手。」
曾國祥極速搞掂Ivy，可惜二人甜蜜不夠兩月，男方就send SMS狠撇Ivy，驚人的事亦隨即發生。知情人士說：「可能個天想呢個賤男現形啦，其實Ivy收到個短訊嗰陣，A.Lin咁啱同Ivy行緊街。A.Lin見Ivy突然心情好差，細問之下先知道Ivy俾個男仔飛，理由係要同番拍拖九年嘅女朋友一齊。A.Lin知道後就話自己個幾禮拜前，又有一個男仔用同一個理由向自己提出分手。佢哋兩個都知唔對路，同時將男仔個手提電話號碼講出嚟，點知真係中！當時佢哋當街尖叫後仲相擁痛哭。」

日嗒兩姊妹
同住筲箕灣某屋苑的A.Lin和Ivy，因情傷而成為好姊妹，曾國祥的臭史亦愈揭愈多。據知Ivy和曾國祥暗交期間，亦曾懷疑過他。「Derek同Ivy拍拖好平民化，淨係去茶餐廳食飯同遊下車河，冇帶過佢見佢老竇。有一日，Derek問咗Ivy住邊後，就好熟路咁揸車送咗Ivy返屋企。後來Ivy同A.Lin傾番先知道同一日朝早，Derek喺A.Lin同一個屋苑嘅屋企揸車走。」一日連啅兩o靚模，30歲的曾國祥精力的確旺盛。
本周二（1日）晚，記者到Ivy位於筲箕灣的屋苑等候，Ivy發現記者時一度迴避鏡頭，被問起與曾國祥的一段情，她無奈說：「我唔想再提呢件事，總之傷心同嬲完就算。（佢追你嗰陣已經有兩個女朋友？）我識佢嗰陣未聽過佢啲花弗嘢。我可以講嘅嘢係咁多，我以後都會帶眼識人，我諗唔會考慮同圈中人發展。」
至於另一主角A.Lin，自報道出街後，據知她匿在家中痛哭，只間中透過微博痛斥賤男。周三（2日）晚，記者終於聯絡得上A.Lin，她說：「多謝關心，我冇事，希望大家都可以忘記呢件事！」

同門鬧爆賤男
曾國祥被揭連嗒A.Lin和Ivy兩o靚模，除了令o靚模界人心惶惶外，A.Lin的師姐周秀娜和即將同A.Lin一齊出寫真的DaDa，上周六（5月30日）在澳門為寫真造勢時，亦聲言力撐A.Lin。

風流史不及老竇
曾志偉講到囝囝同期有3位女友「咁少」，話個仔「冇父風（冇父親風範）」。談到情史風流史，曾國祥當然拍馬都追唔上現年57歲的志偉，他除了結過兩次婚，緋聞亦一大籮（不能盡錄），出入夜場、骨場更加見慣不怪。

揭另一受害o靚模　Ivy：我以後會帶眼識人！（真實對白）
本周二，本刊找出這宗感情騙案的另一位受害o靚模Ivy（蔡瑩瑩），發現刻意剪短頭髮斬情絲的她在筲箕灣寓所附近便利店出現，提到與曾國祥的關係，她說：「我以後會帶眼識人！」