在微博，大家都鍾意稱呼對方「童鞋」，人人樂做超齡兒童。剛剛6月1日係內地的「六．一兒童節」（香港則為4月4日），未夠14歲嘅小朋友不但有假放，仲可以攞正牌「勒索」大人。而娛圈一班童心未泯嘅明星童鞋，惟有在微博放自己嘅「小盆友」相，緬懷吓那些年之餘，順便畀大家新舊對照認吓樣。

楊冪自製青梅竹馬
戀愛大過天嘅楊冪，早前同男友劉愷威高調出席康城影展；到六一兒童節，佢仲專登將自己同男友嘅小朋友相PS埋一齊扮青梅竹馬。二人相差12歲，惟有靠科技完成「夢想」囉。

苟芸慧圓面母女
拍緊《金枝慾孽（貳）》嘅苟芸慧，就放咗同苟媽媽嘅合照，相中嘅苟姑娘估計得一、兩歲大，已經眼大面尖，而被網友讚「超級漂亮」嘅苟媽媽仲有幾分似陳法拉添。

馬德鐘仔似阿媽
馬德鐘將自己和囝囝馬在驤（右圖）嘅小朋友相放埋一齊，叫網友競猜真身，睇嚟囝囝似馬太多啲喎。

劉心悠酒凹標記
Sell氣質嘅劉心悠雖然已31歲，但一啲中女味都冇，睇番佢細個個樣，可愛大眼配大孖辮，仲有個梨渦做標記，一睇就知。

 
微博亦有童孩將幾位TVB當家花旦、小生嘅童年照放上微博，睇番又真係覺得同𠵱家個樣好大分別噃！

楊怡細眼扁平
𠵱家木偶鼻同尖削下巴嘅楊怡，對照番佢仲係少女時個扁平樣，相信羅仲謙要落足眼力先認得出。

吳卓羲女仔樣
估唔到man到震嘅吳卓羲細個時係大眼仔，配埋小丸子髮型，成個女仔咁可愛。

胡杏兒苦埋口面
細個塊面圓碌碌似足麵包超人嘅胡杏兒，難怪初出道時一臉baby fat，同𠵱家V字面形差好遠。

黃宗澤勁細眼
原來黃宗澤細個時係眼扁兼有大牙罅，好彩愈大愈靚仔，𠵱家仲做埋TVB潮神添。 ####

 



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄