Vivian Chow米白色喱士連身裙$31,900Dolce& Gabbana
cover face
周慧敏 非典型夫妻
周慧敏說，嫁給倪震，婚姻生活跟小時候所想像的，完全不同，「我哋係非典型老公老婆。」非典好處，唔使洗衫買餸煮飯揼骨兼睇老公眉頭眼額，最最最叫一般典型老婆羨慕。
老公有鋪照顧人癮，自己蹺埋雙手等服侍，大家唔恨得咁多，世上沒幾多個男人肯理雞毛蒜皮家事，更沒幾多個女人抵得住頸唔插手，我和你都沒這福氣。
有家庭治療師說，婚姻如探戈，當你進一步，我便退一步， Vivian跟老公的二人三足舞步，夾得幾好，相處廿載，「佢駕馭到我。」倪震似乎沒做過甚麼驚天動地的事情，玉女已甘願被困；女人就是如此浪漫，總喜歡被所愛男人征服，這心態，很典型就真。
Profile
Vivian Chow
出生日期： 1967年 11月 10日（天蠍座）
出生地：香港
身高： 5呎 5吋
體重： 105磅
語言：英語、普通話和廣東話。
簡歷： 85年，參加新秀歌唱大賽。 86年，加入香港電台當 DJ，再晉身娛樂圈，有「玉女掌門人」稱號。 97年，淡出幕前，隨男友倪震移居溫哥華。 04年，推出新書《我的貓兒子周慧豹》。 06年，舉行個唱《 Back for Love》，全面復出。 09年，跟倪震結婚。
主要作品：唱片《周慧敏》（ 88），《 A Long& Lasting Love》（ 91），《冬日浪漫》（ 92），《盆栽》（ 11）。電視劇《大時代》（ 92）。電影《三人世界》（ 88），《金裝香蕉俱樂部》（ 96），《得閒炒飯》（ 10）。
「屋企窮，有日，我問媽媽『今日有冇錢？我想食雲吞粉。』佢一聽，眼淚係咁流。」 
「我 enjoy做演唱會，老公話『開心就唔怕做』，我唔可以辜負佢。」《蘋果日報》圖片 
「我係因為 Lorraine至跟基仔稔熟。」《蘋果日報》圖片
佢服侍我多過我服侍佢
Vivian Chow藍色刺繡印花紗裙（未定價） Escada
訪問時，我問 Vivian食晚飯未？「食咗件蛋糕，我係蛋糕人。」據聞倪生廚藝了得，娶個老婆只愛蛋糕，更吊詭的是，男愛煮，亦愛管家事，女對此卻一竅不通，「你問我街市行情，超級市場價錢，我唔知，亦冇興趣知。」那你做得乜呢？「我有我貢獻……係比較少……帶俾大家好多好多愛囉！」
工作上，事事親力親為，估唔到返到屋企咁識歎。「佢服侍我多過我服侍佢；「照顧老公唔係我強項，我一定唔會做全職主婦。」
一直以來，大家主觀認為（希望）倪震是個大男人，老婆聽佢指揮，事實不然，女主內原來行不通，最近，周小姐更成立經理人公司「主意工作室」，工作至上，並由老友古巨基女友 Lorraine揸旗，大家識於「天荒愛未老」年代，一拍即合。「前經理人（ Ambrose）走得突然，之後，好多事我 control唔到，搞到晚晚失眠……
「適逢 Lorraine有意搞 management公司，即係話，佢可以 free一半時間放低基仔工作，我至敢開聲搵佢幫手。」
倪生意見呢？「唔使俾意見，佢話我哋都係鍾意打爛沙盤問到篤嘅人，雙劍合璧一定冇問題。」
父親早亡，家中缺丁，她已習慣處事強悍如男人，「佢成日話我乜都要理，新公司點解唔叫『多多主意工作室』。」事業主導，唔代表老公借歪，她強調，日後接工作，首要過到信仰（ 09年二人成為基督徒）一關，接着，便是等他 say yes，「佢話份工好玩至好，唔好攞嚟辛苦。」有了這句話，哪怕千斤擔？「老公成日話，我哋呢個 stage，應該 relax，收入再多，生活都唔會變，太緊張就唔好做，搞到我一有少少壓力都唔敢話佢知；「呢方面，我要交代㗎！」女人再強，也愛被寵被呵護，她的絲絲甜意，單聽把聲都感受得到，將老婆情緒放在首位，這種關懷，唔係個個男人都識得宣諸於口。
老公係我個 happy仔
開公司，很多人（包括我）誤以為 Vivian打算捧新人，她每日收到過百封電郵，毛遂自薦，更搞到 Lorraine個 we chat爆廠，即時停用，「新公司只照顧我一個，簽新人，將來再諗。」頭炮計劃推出福音碟，現正收歌。
歌路逆轉，做人態度也不同了，「依家 humble好多，唔係話睇低自己，而係放低執着，睇自己合乎中道。」
她坦言，有一段長時間，做人很焦慮，事事急進逞強，煞是辛苦，「總覺得，我係向外承擔嘅人，若因團隊達唔到原定要求，影響形象，好唔 fair；「其實，一直以自己準則 judge別人，自從 Ambrose過身，我經歷唔同人照顧，唔可以唔去學習寬容待人；「當覺得太緊張，即刻停低去祈禱。」信仰幫助，令她找到生活方向，「廿幾歲時，好介意得唔到別人認同，細個就係咁㗎啦！去到我呢個 age，唔使再向人交代。」這份價值觀，老公也有份出力令她改變，「佢只想我開心、健康，做自己鍾意事情，做人輕輕鬆鬆。」
生性緊張，怎輕鬆？「見到佢就安樂晒！老公係我個 happy仔。」
那倪震除了扮周慧豹跳上台之外，仲會點𠱁你 happy？「我哋比較怪，係非典型老公老婆，做事喜歡不按常規，情人節、生日送花，拎住紮花去食飯，我最驚，佢亦係呢類人，大家唔使煩。
「人係唔可以要求另一半做你想做嘅事，我哋唔會將對方一套準則變成自己負擔，曾經我都鍾意買衫俾佢，依家唔會。」那你又可以為他做些甚麼？「老公駕馭到我，佢咁 man，自己做番女人本份，遇事留俾屋企呢個男人去決定；「佢對我已經冇乜要求，我俾到佢嘅，就係 respect。」
Vivian's tips
Q：天氣轉，怎樣護膚？
A：最重視眼部皮膚，最近，身邊朋友覺得我好似幾精靈，可能因為用咗精華液及眼霜，雙管齊下。
Q：如何養生？
A：我夜瞓，惟有盡量唔好太早工作，多點休息，平時，照顧七隻貓已夠忙，連畫畫都冇時間，但見到佢哋就開心。
Vivian Chow鮮桃紅色 satin綴金屬頸圈晚裝$21,995 PAULE KA桃紅猄皮高踭鞋$7,680Rupert Sanderson 
（左起）SUISSE PROGRAMMEPlatinum Precious Luxe Eye Cream$1,680Platinum Precious Luxury LiftingEye Concentrate$1,800
後記
周慧敏喜歡自備各款私伙高踭鞋入影樓影相，其中一對只消八百蚊，「唔買唔得。」慳妹上身。
我遇過另一個同類人，對自己要求嚴謹，便是關淑怡。二人好姐妹， Shirley有事， Vivian總會拍心口力撐，出外靠朋友，自己有義氣，連帶前經理人也是，臨終「託孤」一眾好友落力照顧，有驚但無險，現在，也得靠老朋友兩脇插刀。
人到中年，最需要的就是穩定，伴侶、朋友、家人、宗教、工作、經濟，均是人生餘下的籌碼，想儲夠樣樣齊，唔係咁易，乜都有齊，難怪她的焦慮問題不藥而癒。
Shop List
Dior尖沙咀北京道 1號 G1號鋪 2269 5000
Dolce& Gabbana中環歷山大廈 G02號鋪 2877 5558
Escada http://www.escada.com 
Lanvin中環國際金融中心 2043號鋪 2234 7323
PAULE KA金鐘太古廣場 218號鋪 2813 7381
Rupert Sanderson中環安蘭街 8號地下 2530 3391
SUISSE PROGRAMME Sasa 2505 5023
Swarovski中環國際金融中心 1051號鋪 2234 7126
撰文：伍淑嫻
形象： Annie Hung
攝影： Ray Siu
化妝： Gricha Chan
髮型： Coren Cheung@HAiR
留言列表
{{ article.title }}
