報名狗隻以小型犬居多，貴婦狗、史納莎最旺場，大狗數埋得兩隻。主辦單位更考慮下次讓貓、兔等其他寵物參與。

寵物家

狗狗遊巴士河

2012年10月11日 ~~ 第1179期香港《壹周刊》

帶狗仔上巴士，一路搭車一路睇風景？發吓夢好啦！但上星期日（ 10月 7日），狗主們終於夢想成真。近百名狗主帶同逾四十隻狗仔，雲集尖沙咀碼頭「寵物巴士站」排隊上車。貴為香港史上首批狗乘客，個個隆重其事， set晒頭扮靚，甚至 cosplay狗警察出席，沿途揮手尖叫、開心到爆的主人宣布：「今日我哋班狗仔，光明正大搭巴士！」

狗巴凱旋出巡

今年初，愛狗人士杜淦煒和義工們自發成立動物團體「香港寵物巴士企劃」，「狗巴」 idea不到一個月已有二千人響應。團體向巴士公司爭取寵物可乘搭巴士，但因法例所限，巴士公司拒絕。後來義工們想到可租用開蓬巴士接載寵物，由此促成香港首次寵物巴士試行日。
首個試行日在下午兩點開始，由尖沙咀太空館外出發，停旺角非牟利獸醫診所 NPV和大埔墟港鐵站，目的地為沙田彭福公園。約三點半抵達公園後，大家有約一小時自由活動時間。不少狗主說因住得遠交通不便，第一次帶狗來彭福公園玩。香港寵物巴士企劃的發起人杜淦煒聽後滿足地說：「狗巴的緣起，正因為我想帶狗仔去玩，但無私家車，搭的士又貴，好想有架巴士接載。」

上車

司機余先生有廿年揸巴士經驗，他說做狗巴士車長前，公司先問他會否對狗隻敏感，他不但無，仲好鍾意同狗玩，啱晒。

車箱內

為安全計，所有狗仔必須繫上狗帶，好似人坐車要扣安全帶一樣。

又乖又乾淨

幾十隻狗仔，以為亂到七彩，一定有狗仔打交、賴尿，甚至咬爛座椅的鏡頭出現，點知捕咗成日，秩序良好到主辦人都唔信：「我哋準備咗大量狗尿片、狗隻用嘔吐袋、大便袋等等，竟然無一隻狗要用。」負責清潔的 ec clean公司更說車上無發現大小二便，最多只有狗毛，簡單清理十分鐘已可還車，比平日人類租來開派對更乾淨。加上今次報名人數短短五日內已過四百人，巴士公司應該要認真考慮一下定期舉辦，若然成功，香港廿萬狗主封你做偶像呀！

睇風景

參加狗隻必須已植入晶片，另帶備針咭給大會檢查，出發前四至六小時不可大量餵飼狗隻，以免牠們暈車浪。

兜風兼吹風

開篷巴士全程風勢強勁，主人要小心捉實狗仔，更要顧住隨身物品，當日有前座乘客頂帽被吹走。

沙田放狗

由尖咀出發，去沙田的士費閒閒哋過百元，全靠今次有狗巴士先可以$30就去到，不少狗主話第一次帶寵物嚟玩咋。

盛裝出場

第一次帶狗上巴士，有狗主開心到帶狗做美容、化妝扮靚，仲約定要 cosplay狗警察，代表今次唔係偷坐巴士。

寵物巴士第二次試行日

本月底香港寵物巴士企劃會舉行第二次試行日，路線與今個試行日相若，只是減少了大埔墟港鐵站，以免車程太長，狗仔不適。
時間： 10月 27日 2-6pm
路線：尖沙咀碼頭→旺角 NPV→沙田彭福公園
收費：每隻狗或每人$30來回（例 1人 1狗$60， 2人 1狗$90）
報名： http://www.facebook.com/99bushk