03年入行做有線電視娛樂主播，沒花多少時間，陳貝兒已經是一姐兼台柱，見慣國際巨星、包攬時裝週和奧斯卡採訪。
6年後離巢，一入無綫就拍住鄭裕玲主持港男、一入bma就成了市場推廣部副總裁，那一年，她才28歲。
今年遇上電視風雲，新朵更響亮，now觀星台台長是也。
一姐、副總裁和台長，未見人聽到一連串頭銜，心頭先是一怯。
其實，只要點中要穴，女強人也可以是小女人。
22日即將出嫁，我問陳貝兒，未來老公是怎麼叫她的。
陳貝兒笑成一團，臉紅紅說：「鄧bur芝……潮州話『陳貝兒』
係咁發音，佢成日叫我『bur芝、bur芝』。」
「咁你又點叫佢？」
「……咦……講出嚟好核突呀……」副總裁扭扭擰擰，愈講愈細聲：「咪『公公』囉……即係老公咁解呀……」
兩年前，上一次接受本刊專訪，感情空窗8年的陳貝兒說自己正在煲台劇《敗犬女王》，淚流滿面咀嚼男主角對女主角說的對白：「你值得別人對你好的，因為你本來就是一個好人！」
兩年後，32歲的敗犬女王要嫁人了，就在12夜（10月22日）以後。

相睇姻緣
陳貝兒說過，找個好男人比找好工作要難得多，所以，大學畢業以後，她一直單身。兩個月前，卻突然在微博公布婚訊，說要與從事物流業、相戀兩年的M先生於10月22日成婚。
出身良好、出落大方，學業成績和工作表現都出類拔萃，重點是一直單身，陳貝兒說自己一直是父母叔伯之輩安排相睇飯局的鐵膽人選。抱着一見無妨的心態，兼且天生被動，十幾次相睇經驗以後，竟然被她遇上終於嫁得過的M先生。


我同滿蓮法師（陳貝兒婚禮主持人）合著一本佛教書，未來奶奶見到我嘅插畫印象幾好，因此拖中間人周美鳳約我見面。第一次午膳，第二次就帶埋佢個仔嚟……阿媽生我出嚟咁嘅樣，身高5呎9吋、永遠留短髮，相睇十幾次，食完飯睇完戲，就冇人夠膽再進一步。但呢一個，我「叮」一聲，有「過電」感覺。佢好鍾意做運動，除咗身形高大之外，我覺得舒服得似係遇番個舊朋友。識咗冇耐，佢幫我搬屋，一大堆電視線、寬頻線，佢轉個頭幫我搞掂晒，我覺得好man。第一次，我認定佢係我要嫁嘅人，係拍拖以後，一齊去不丹旅行。我哋去到一個海拔三千米嘅景點，落住微微雨又濕又跣，個個都行吓停吓頂唔順。佢係運動健將，行到頂唔係問題，但佢一個男人揹晒全團所有女人嘅嘢，慢慢陪住我哋登頂，亦都有佢自己嘅方法扶持我完成目標，而唔係好似有啲人咁：「咁辛苦，算啦，唔好行啦。」人人覺得我叻，其實我都有惰性，好需要身邊有一個人改變我、帶動我。就係呢一次，我認定咗佢係我要嫁嘅人。

強人本色
距離婚禮就剩兩個星期，陳貝兒照樣身兼數職，有宣傳有訪問照接不誤，準時出現。不過，人坐下了，眼珠卻不停在全場轉、兩手兩腳左擺右放靜不下來，說話更是像機關槍一樣極速狂掃。我問陳貝兒急甚麼，陳貝兒說甚麼都急，心裏那本「To do list」長過匹布。


點解咁鍾意老公，就係工作方面，太多嘢需要我做決定，返到屋企對住佢，真係可以乜都唔使諗，交晒畀佢決定。好似今日咁，做完訪問要去中環出席活動，返到屋企已經十點幾。每次夜麻麻set行頭返到屋企攤喺度，佢會攞對拖鞋畀我，幫我拆個頭、幫我按吓摩。佢每朝返工早過我，出門口前都會斟定杯暖水，提我睇住我飲埋杯水先至走。佢知我哋藝人平時化太多妝，皮膚好需要唞吓。我哋兩個出去拍拖，佢會叫我：「唔使化妝啦……」我貪靚，覺得唔化妝唔見得人，所以我話佢比我自己更了解我、更接受到完整嘅我，佢與別不同嘅安全感正正來自於此。我由細到大都留短髮，除咗因為短髮的確適合我，亦因為細細個媽咪已經幫我剪短頭髮。我嘅成長從來唔係小公主，媽咪一直嚴格，被我形容為魔鬼教練。佢令我覺得唔應該犯錯，連放暑假，每日都有一套嚴格嘅作息時間表，冇得玩、冇得偷懶。我怕煩，費事俾人罰，所以從來唔反抗媽咪。入行以後我記稿有一套，我諗都係媽咪由細到大訓練，佢嗰一套我絕對認同，結婚以後生小朋友順其自然，但教育下一代，我諗我會沿用媽咪嗰套。

時來運到
工作一路順境，20歲在加拿大西門菲沙大學傳理系畢業後就一直平步青雲，陳貝兒說最忙是這段日子。身為bma宣傳部副總裁，新球季即將開鑼，新宣傳企劃排隊等落實；剛剛開台的now觀星台，既要忙着幕前工作、還要負責培訓新人、決策主播淘汰賽人選；同時自己還是bma旗下的藝人，拍照宣傳司儀代言工作照舊排得密麻麻，別忘了，還有大日子就在兩個星期以後。


我希望世界上有另一個陳貝兒，想有另一個我去分擔工作……好多嘢做呀、好多嘢諗呀……bma最近已經唔得閒返，但新球季開始，就嚟要忙；觀星台培訓完新人，要開始淘汰賽啦；仲有宣傳工作同專欄要寫……10月22日結婚，我工作去到18日，好多嘢未搞，帖都未派呀……我雙子座，坐唔定，大學時代已經做緊四份兼職，入行以後每個機會都唔想浪費，趁住後生乜都想試吓，結果愈做愈多……不過做人唔好投訴，雖然辛苦，但每個過程我都好enjoy。我真係唔覺得自己好叻，係好彩就真。你講得啱，睇我個履歷表，的而且確幾好睇，好短時間得到好多曝光，幸運地去到邊都得到認同，所以先至一個接一個機會發展。做人最重要係把握機會，機會以後有咩等緊你，you never know。佛家思想話齋，你種落去嘅種子唔知幾時會發芽，但係你唔種，就永遠都唔會發芽。以前，我成日都話，工作太順利，一定係我嘅運氣去晒事業嗰邊，冇剩俾愛情。原來要嚟嘅，始終會嚟。

情人眼裏
陳貝兒說手機裏有五十多條短片，都是未來老公打網球、打golf拍下。工作以外最大樂趣就是陪老公打球，自己站在一旁拍片。在場的bma宣傳人員，人人都說常常在公司「被」分享M先生球場英姿，記者和攝影師一說有興趣，陳貝兒當然樂意非常即刻去片配埋旁白：「佢個身形似祖高域、手勢就似拿度，祖高域咪啱啱贏咗個唔知咩盃……我都唔記得，我都係陪佢睇知少少……係咪好型呀？」我附和說：「型，好型……」陳貝兒說：「乜你咁行㗎……」另有人說：「OK喎啲手勢，啲小動作真係似拿度喎……」陳貝兒即刻雀躍：「係呀，都話似㗎啦…… 佢六歲開始打波，你睇清楚啲，真係好勁㗎！」副總裁的這一面，還真是頭一回見，可愛又帶點傻氣，老婆眼裏，老公總是最勁的。 ####



大學畢業後8年冇拖拍，以為註定做剩女的陳貝兒，相睇時遇上未婚夫M先生，拍拖兩年，二人將於今個月22日結婚。


世紀勾手指，被有線派去康城影展，有幸訪問木村拓哉，絕對是響朵作。《蘋果日報》圖片


出道8年，由一個普通主播到今時今日now觀星台台長，上位速度拍得住寬頻。


貴為bma市場推廣部副總裁，陳貝兒的工作卻似打雜，要度橋宣傳，同時又要落手落腳湊掂班波牛。《壹週刊》圖片




父親陳永鎬（中）是著名演唱會監製，張國榮、梅艷芳、張學友等巨星，個個睇住佢大。


畢業於加拿大名校Simon Fraser，郭羨妮亦是校友，咁啱得咁蹺，兩人同樣搵到個好老公。


分享M先生球場英姿時，副總裁笑容最甜。



arrow
arrow
    文章標籤
    12夜　陳貝兒 FACE 週刊 229期
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄