麥加登！我哋冇電影都再打過！

漫遊毒物

變形金剛打前傳　好過睇戲

2012年08月22日 ~~ 第274期 Face

講起電影改篇遊戲，好多人都話雷聲大雨點小，近年難得改得唔錯嘅除咗《蝙蝠俠》就要數《變形金剛》。
好評十足嘅遊戲版今次仲飛甩電影版玩前傳，新一集《 Transformer Fall of Cybertron》講博、狂兩派嚟地球之前喺斯比頓星嘅最後一戰。 30多隻老變精英盡出，連電影版冇嘅角色都玩埋一份，保證好睇過堆角色出咗場都未必認到嘅電影版。

經典角色

鋼鎖 Grimlock
作為遊戲封面人物，鋼鎖會係重點角色，佢變身要用怒氣，同其他角色用法有啲唔同。

大力士 Metroplex
博派移動要塞大力士成座山咁大，只可以喺故事模式上用到， online對戰冇得屈機。

新舊交接有誠意　鋼鎖駕到

故事發生時間係電影版之前，所以角色設計較貼近動畫版，麥加登會變形做槍，星星叫變番紅藍主色，舊 fans玩落親切。故事上又接得番套戲，好似一開場就講大黃蜂被突襲而冇咗發聲功能，新 fans一樣玩得投入。角色方面就有大玩大，除咗恐龍派鋼鎖同移動要塞大力士搶境，狂派都有戰鬥派五機合體布斯達可以用。筆者睇戲就成日分唔到邊隻打邊隻，遊戲分博、狂兩條線，每關都有唔同主角，保證玩家可以細味超過 30款變形金剛。

一開始主角係用大黃蜂，今集佢開場無耐把聲就壞咗，食番電影第一集開頭。

星星叫未變 F-22戰鬥機，紅藍色造型同寸寸貢性格都係似動畫多啲。

變形流暢　變形金剛 D.I.Y.

隻 game操作似《 Lost Planet》嘅第三身射擊，大家最關心嘅變形系統同上集一樣，無論做緊咩動作按一下左控桿就變到。變咗形後每個機械人操作方法同攻擊都有若干變動，好似戰鬥派 Votex變咗直升機， A掣同 B掣（ XBox版）就控制垂直升降。每個機械人仲有一招 R掣使出嘅特殊攻擊，玩落唔覺悶。另外網戰時仲可以儲配件，用嚟設計獨特嘅變形金剛，連變車定變飛機都自己話事，滿足老變迷童年夢想。

變形技

變形飛機嘅變形金剛操作好唔同，一定要練熟飛行技巧先可以越過高低地形，好在關卡設計唔算難，變錯形都未試過跌死！

必殺技

大黃蜂變身當然係車，喺遊戲中可以按 R掣用氮氣加速飛車兼攻擊對手。

狙擊槍

主要攻擊手段係射擊，連狙擊槍都有，另外 R掣必殺技就要等時間 cool down使用。

搵武器

每關都有武器裝置，用能量方塊打開除咗有新武器，有時仲有自動攻擊嘅小機械人。

玩後感：薄甲機械人《 Halo》射擊玩法

記得搵 cover儲護甲，唔係中幾槍就散，當佢係《 Gears of War》打冇死。

初初以為變形金剛咁大隻會好似《無雙》咁打埋身，試玩後發覺反而偏重射擊。有類似《 Halo》嘅護甲系統，被擊中會先扣護甲，但護甲用盡就會開始扣生命值。冇晒甲啲血好似倒水咁，中 3、 4槍就死得！隻 game本身都係一隻紮實好玩嘅射擊遊戲，加上老變角色，算係近來淡季佳作。

機種： PS3、 XBox360
廠商： Activision
類型：第三身射擊
人數： 1人（單機）/
　　　 2-16人（網上對戰）
售價：約$450
查詢：智高（ 2418 8896）