蕭亞軒張惠妹爭做基界女神壹週刊 1067期－娛樂八掛大放送★

每年10月底，台北市都會舉行大型嘅同志遊行，幾萬人集體上街為基界爭取權益，由舊年開始，遊行地點更伸延到高雄市及南部，個個上下一心，比起4巴工潮團結100倍。

另類市場
為咗引起社會上嘅關注，「台灣同志遊行聯盟」每年會邀請唔同歌手，擔任活動嘅「彩虹大使」。至於今屆熱門人選，係連續10年獲同志票選為「女神」嘅張惠妹，但盛傳蕭亞軒有意爭飯食，仲趕頭趕命製作關於同性戀嘅新歌。

純粹谷碟
可能你會問：「有咩好爭？」其實講到尾都係為咗自身利益。近年台灣樂壇發現同志勢力不斷擴充，每逢歌手出碟做宣傳，必到城中熱門Gay Bar「Funky」開騷，爭取同志支持，吸納另類擁躉。
早年靠基界食胡走紅嘅曹格公開話過：「我今天不是同志，不表示我明天不是。」甜言蜜語扮基爭取支持，兩年前終於榮登金曲獎歌王，以為自己宇宙最紅嘅曹格，當日攞獎時上台自爆有女朋友，仲好決絕話：「我不是gay！」擺明忘恩負義。
基民如夢初醒，集體抵制曹格，歌王人氣即時急跌，所以你又好難怪兩位天后爭崩頭做「彩虹大使」，加上蕭亞軒9月出新碟，你話如果遊行班同志，每啤人幫襯你買一隻碟，年度銷量大獎，蕭亞軒攞硬有乜出奇！

蔡依林G奶打格
台灣天后Jolin蔡依林，新碟造型劣評如潮，好在第二首派台作《玩愛之徒》，Jolin預告會重現G奶長腿，仲有全裸出浴香艷鏡頭，聲稱入行以來未試過咁大膽。
萬眾期待MV，上個禮拜YouTube終於有得睇，點知歌迷睇完界刂櫈嗌回水，事關Jolin嘅出浴鏡頭，G奶位置全部俾馬賽克覆蓋，僅僅見到鎖骨，連條事業線都睇唔到。
唔係話要三點盡露先叫值回票價，但係用「全裸入鏡」四個字做宣傳，作都唔好作到咁大嘛！

朱孝天失戀大晒
最近台灣驚爆F4成員朱孝天同林熙蕾嘅五年地下情，因為「太了解」而分開。
曾經傳過去日本秘密結婚，外界一直睇好「朱熙戀」可以開花結果，可惜林熙蕾個幾月前已經搬離二人昔日愛巢，至於屋企班貓狗，朱孝天會負責照顧兩隻狗，林熙蕾就帶走四隻貓。
連「子女」撫養權都搞掂晒，但分手消息曝光前一日，朱孝天响西湖出席電視劇《沒有承諾的愛》記者會，當日有記者問佢，就快七夕情人節，會唔會送禮物俾「妻子」，朱孝天面色變黑問：「你說什麼？」記者解釋外傳佢同林熙蕾已經結婚，朱孝天繼續鬧：「你可以不尊重我，但是不能不尊重女生。」
冷靜過後，在場傳媒反擊朱孝天，問佢點解成日黑面，同埋點解唔減肥，朱生繼續妙語連珠：「給太陽曬，臉當然會變黑……如果我算胖，那很多人就是大象了！」肥人無錯，死撐嗰吓乞人憎嘛！

去年底，蕭亞軒舉行跨年演唱會，張惠妹有錢唔賺，推晒所有跨年騷嘉賓，擔任蕭亞軒個唱嘉賓，明明姊妹情深，但講到爭做「彩虹大使」，完全無情講。