面對面
鬚 far鬚 good 林德信
除了歌聲，林子祥的個人標記，無疑是五十年不變的一撇鬚。林德信湊巧也是因為撇鬚，望落狂野愛冒險，被廣告人朱祖兒睇中拍攝了首個相機廣告。
據說林子祥入行前是網球教練，業餘夾 band，夾夾吓夾到返香港做歌星；林德信亦教了五年瑜伽，興趣夾 band， 27歲才半途出家，處男 EP十月面世。
台下的林子祥，說話斯文得像中氣不足，上台卻是音域廣 濶感情澎湃；台下的林德信，更是輕聲細語文質彬彬，我要把錄音機貼到他嘴邊才能保證收到音。
我不禁問：「你 哋兩父子一齊，個環境咪要好靜至聽到對方講 嘢囉？」
林德信用手撥撥鬈曲長髮，大笑表示認同，露出兩排潔白的牙齒和酒窩，和爸爸一點也不像，靚仔得多、可愛得多。
林德信說，爸爸成就輝煌讓他驕傲，卻不構成壓力：「如果我想做另一個佢，先至會有壓力，我淨係想做自己。」
我想說，每個星二代，路其實還是得靠自己走。入行兩年， Lam仔表現 so far so good，他比爸爸強的是，撇鬚，可以留，亦可以剃。
因父之名
85年在美國出世、長大，林德信大學畢業以後瘋狂愛上瑜伽，做起瑜伽教練。兩年前， 25歲的他回港探望外婆，在陳奕迅的演唱會後台遇見正在籌備 Canon廣告的朱祖兒，拍攝了人生第一個廣告。然後，被從小看着他長大的林珊珊邀請在 now節目教瑜伽，再被環球邀約試音簽為旗下歌手，整個入行過程，爸爸林子祥雖然沒有參與，卻脫不了關係。父蔭這東西，誰不想靠？
「爹哋對我當然好大影響，我由細到大坐佢車，佢每日播 嘅音樂，亦都成為我長大後我 嘅最愛，我 哋兩父子 嘅話題，最好傾 嘅都係音樂。爹哋唔興 喺車入面播自己 啲歌，但係我細細個就跟住佢去綵排，聽佢練歌、錄音，睇佢做騷，佢所有歌我都識唱，好細個我就鍾意企上去飯枱扮開演唱會，不過媽咪話我唱得唔好聽……入行呢個過程，雖然唔係爹哋安排，但係每行一步，我都有問佢意見。接廣告時，佢話：『好呀，拍廣告好！易搵到錢。』環球搵我試音、話想簽我，佢話：『 25歲唔冒險，等老咩？』第一隻碟、第一隻歌，我第一時間攞畀佢聽，佢話：『嗯，幾好喎……』爹哋份人不嬲說話唔多，聽到佢咁講，我好滿意 㗎啦！返香港以後，每日去到邊都有人同我講：『好鍾意你爹哋唱歌。』講真，我覺得應該要自豪，從來唔覺得有壓力。有邊個可以好似我咁幸運，身邊有一個咁 嘅人教我呢？我好佩服爹哋 嘅成就同才華，但係佢叻，唔會對我造成壓力。我入行第一日就係諗住做自己，唔係做佢。」
林子祥 86年推出的《最愛》唱片封套上的畫鬚小男孩，正是當年才一歲的林德信。
一步一生
本來留鬚，林德信最近為了拍廣告看起來年輕點便剃光。他說當年留鬚，是為了年紀輕輕就教瑜伽，一班四十多個學生個個比自己年長，留了鬚看起來成熟有威信一點：「我大學讀英國文學，畢業之後搵唔到工，咁 啱當時又瘋狂愛上瑜伽（受現時在美國教瑜伽的母親吳正元影響），索性去 咗考牌，做 咗瑜伽教練。我都鍾意打籃球、跑步，但係帶氧運動係對身有益，瑜伽係對心，以前好多人話我脾氣差，朋友、前度女朋友都係咁話，玩瑜伽，幫助我平和心境，思考都會清晰 啲。我好鍾意爹哋 嗰種處事方式，無論對自己、對人，都畀到好大空間。佢成日話，同人過唔去，即係同自己過唔去，最終 嘅咪又係自己。一路順境，我覺得唔係因為人同事，係因為自己 嘅心態。我玩瑜伽以後，目標好清晰，心境好平和，對所有事情，唔強求，咁樣去行自己條路，自然順利。」
95年，年僅十歲，爸爸林子祥就為了葉蒨文與媽媽吳正元離婚。林德信說，爸爸對待感情事亦一樣，不能繼續的不會強求：「細個時，我已經唔覺得父母離婚對我有咩影響，莎莉（葉蒨文）又好錫我，連我入行都係問佢意見在先。大個 咗以後，更加明白兩個人相處一 啲都唔簡單。我做人都想好似爹哋咁，唔好強求，唔好迫自己，輕輕鬆鬆順其自然。」
最近熱播的「 Moov」廣告父子兵上陣，碟未出，廣告先爆。 10年做歌星前初曝光的 Canon廣告（右圖），當時電視機、隧道口宣傳鋪天蓋地到處都是。
父親林子祥 95年與母親吳正元（左）離婚，林德信說與妹妹林德懿的生活和情緒並沒有受到影響。
離婚兩年後，林子祥與葉蒨文再婚，林德信說葉蒨文比林子祥更錫兩兄妹：「佢 哋有佢 哋 嘅決定，我冇怪任何一個。」
《蘋果日報》圖片
林德信 20歲開始受母親影響愛上瑜伽：「媽咪其實覺得我淨係教瑜伽好浪費，我話入娛樂圈，佢第一個贊成。」
《壹週刊》圖片
早熟遲戀
林子祥高中年代曾在英國讀寄宿學校，愛在家分享寄宿時代的喜樂。林德信說，自己十一歲升上中學，主動要求離開成長十一歲的美國，獨自一人去英國升學寄宿：「我當時開始認真考慮吓將來做乜 嘢、條路點行，覺得美國 嘅學校環境太鬆散，冇乜紀律，主動要求去寄宿，體驗吓唔同 嘅文化。每個小朋友開始為未來打算，都係由十一、二歲開始 㗎啦！」十一、二歲？打算未來？
在和尚寺裏度過高中生活，林德信大學回到美國升學：「我大學先至第一次拍拖，唔係遲熟，係幾年都冇見過女仔咁滯。大學返去美國，重回有女仔 嘅世界，先至發覺，嘩……」嘩咩呢？我問林德信，是不是有女的世界繽紛得多？林德信又露出牙齒，笑得面紅紅：「係呀……」拍了三次拖，三次都係女追男，入行後被偷拍次次又係一拖二、一拖三被女圍，林德信堅決否認自己的現任女友是吳雨霏：「被人偷拍、仲有同記者打交道，我冇問過爹哋同莎莉意見，我鍾意做自己，一講大話我就覺得好唔舒服，呢一刻，我係單身。」 
經常被拍到有女相伴，林德信說：「我的確女性朋友比較多，但係成日俾人寫，搞到真係有朋友因為咁怕 咗我。」
去年為吳雨霏主演〈我本人〉 MV傳出緋聞，其實二人份屬同一唱片公司，煲水居多。
女殺手
不管 1歲還是 27歲，林德信說自己一直在女人堆裏長大，特別受女性歡迎。
林德信說初戀最傷，與學畫畫的女同學相戀年半以後，感情變質無法溝通下協議分手：「我有好長一段時間匿埋唔見人，狂做運動發洩精力，跟住又為佢寫 咗好多歌……又唔捨得又要分開，真係好辛苦好辛苦。」
說「好辛苦好辛苦」的時候，林德信右手五隻手指揦住心口件衫、又揦住口面的模樣，和笑起來一樣好看。
林德信說，自己也不知道為甚麼女性朋友特別多，事實明明擺在眼前。 
撰文：朱小博
攝影：范仲良
髮型： Eve@Queen Private i
化妝： Kristy Lam
服裝： 5cm@ithk
留言列表
{{ article.title }}
