即場連體胡杏兒忍唔住 喺台上向男友黃宗澤大講「廁所宣言」，耍花槍話 Bosco好難頂，一落台卻攬實 Bosco呵番，唔怪得攞到視后啦。

今年無綫視帝視后之爭，結果由大熱鄭嘉穎同胡杏兒連掃兩大獎，胡杏兒終趕絕死敵法拉。
雖然網友唔多 buy胡杏兒，不過新視后一於少理，攞足彩之餘，更於台上發表「廁所宣言」，公開同男友 黄宗澤打情罵俏。
得戚杏兒成全場焦點，完騷後更明寸法拉：「冇獎出年再努力畀心機囉！」嘩，法拉聽到唔激到爆血管？

週一（ 5日） TVB台慶頒獎禮揭盅，賽前大熱的胡杏兒，竟先攞豬肉獎「我最喜愛的電視女角色」，以為要將視后寶座讓畀因左邊面癱要返加拿大休息半年的陳法拉，估佢唔到胡杏兒竟可再下一城，憑《萬凰之王》沅宛一角 K.O.陳法拉嘅 Madam Jo奪得視后，連攞兩獎 high到震。



風騷開騷前，滿懷自信的胡杏兒似勝券在握。

苦情胡杏兒攞完豬肉獎後，一臉愁眉深鎖。

我知道我有好多缺點！感動：結果胡杏兒成功封后，嗰一刻真係開心到喊！

法拉速閃

胡杏兒成大贏家，輸得口服心唔服嘅法拉，於頒獎禮上強顏歡笑，完騷後更即時孖住同樣一個獎都冇嘅 Laughing謝天華極速閃人。
其實胡杏兒連攞兩獎，早得操生殺大權的回朝總經理陳志雲暗撐，陳總化名 Eggzero在微博與胡杏兒互相關注，杏兒變「迷雲黨」新成員。坐定粒六的杏兒亦晨早度定「廁所宣言」：「佢（ 黄宗澤）同記者講，我攞獎時佢會去廁所，咁佢冇去廁所，我知道我有好多缺點，但你（ 黄宗澤）都好多缺點囉，都好難頂……一路頂住大家！」
台上攞彩兼公開肉麻偉論，據知最初奪豬肉「我最喜愛的電視女角色」時的驚險情節，只為製造緊張氣氛。知情者說：「根本 TVB一早預咗會頒視后畀杏兒，成班高層都晨早同佢派定定心丸，最慘係法拉一度以為自己有機會攞獎，傻吓傻吓做足成晚馬騮戲，畀着你都火啦！」
賽後問到胡杏兒會否安慰零獎法拉時，胡杏兒說：「吓……呀呀……有獎攞梗係開心啦……我唔識答喎！」之後再潤多兩句：「好高興！我未諗去邊度慶祝，冇諗過之前攞到呢啲獎，如果真係攞唔到，再努力囉！出年畀心機！」嘩，風涼說話，特別夭心夭肺呀！



冧住望台上公開肉麻後，新視后即場拖實黄宗澤。睇佢睇住男友個冧樣， Bosco好難走得甩，不過網友始終唔 buy囉！

嬲到黑面胡囧連攞兩獎，仲要將兩個獎座放喺大髀示威，身邊法拉嬲到唧都唔笑。

拒絕陪襯法拉着住件 Armani晚裝，做足成晚人肉布景，到宣布完「最佳男主角」時，陳法拉已急速走人，連扮恭喜都費事。

賣廣告時， 4大女主角齊齊用披肩圍住心口，不過一樣冇偈傾。

Laughing速閃避嘉穎

視帝獎項比視后競爭更激烈，賽前呼聲甚高嘅 Laughing哥謝天華，竟然連豬肉獎都冇得分，完全敗畀《怒火街頭》「 Law霸」鄭嘉穎。鄭嘉穎攞獎時更鄭重聲明：「我冇續約，證明個獎唔係換返嚟。」曲線讚自己夠實力，難怪 Laughing嬲到即閃啦！



Laughing係個好演員！攞尾彩：鄭嘉穎連奪 3獎大勝食白果的謝天華，嘉穎回應時話：「好遺憾獎就得一個，我覺得 Laughing係個非常好嘅演員。」有獎攞係口響啲。

扮大方成晚得個坐字，謝天華仲要扮大方同鄭嘉穎握手，真係戲屎啲都做唔出。
 

唐詩詠 M胸最索



Nel Nel

年年頒獎禮，姐仔例牌谷到盡鬥咪，冇獎攞起碼有張相見吓報，今年除咗法拉同杏兒係焦點，行紅地氈時奇峰凸出反而係唐詩詠，而著名形象指導 Nel Nel（張學潤）亦說：「好有女人味！」可惜今年撞啱天降橫雨，搞到班姐仔甩晒轆，人算不如天算啦！

唐詩詠再發育

今年 30歲嘅唐詩詠，啱啱同崔建邦復合果然特別精神，一件 deep V谷到盡，平時又唔覺佢咁有料到喎。



晚裝： AF Elegance首飾：謝瑞麟珠寶贊助價值約 400多萬

大個咗，好有女人味！清新得嚟好配合個人氣質。

樂瞳太重手



咁細粒唔應該着呢類裙，睇到身形線條會顯得高啲。

TVB姐仔出名易捱殘， 25歲女樂瞳為遮掩黑眼圈，竟出現白色眼袋奇景，好在胸前夠索攞番分！

鍾嘉欣大富豪



晚裝：本地設計師 Barney Cheng首飾： EtcetEra配合佢清純氣質，好公主 feel又討好，但個嘴太紅。

鍾嘉欣樣靚，行紅地氈時一身閃金晚裝加艷紅唇膏，唔知點解睇落諗起尖東。

汪明荃金至尊



嚇死人！嘩眾取寵不討好！唔知邊個設計畀佢，靠害！

汪阿姐造型一向爆，今年更以一套全金斗篷加熱褲，造型震撼之餘，斗篷頂帽仲可以遮風擋雨，薑果然係老嘅辣。

楊怡落湯雞



晚裝：本地設計師 Alex Lam首飾：英皇珠寶贊助安安全全，冇乜驚喜，只算合格得體！

女大十八變嘅楊怡今年擺明無望爭視后，行紅地氈時更加係收咪冇嘢睇，最黑仔係出場時撞啱最大雨，成身濕晒都仲要照顧鑽飾贊助商擺甫士任影，其實佢幾專業！

陳敏之出意外

奪得「最佳女配角」獎的陳敏之，一貫迷你裙 show靚腳，但因裙尾太長，加上現場橫風橫雨，搞到她落開篷車時一時大意現打底褲，認真失手！



晚裝：本地設計師 Alex Lam首飾：謝瑞麟珠寶贊助

前面短得太刻意！騷長腿唔使短成咁，長番少少自然啲。

徐子珊攬到實

徐子珊出場時撞啱落雨，大會安排佢同緋聞男友 黄宗澤一齊出場， 黄宗澤除了擔遮護花外，隻手更攬到徐子珊纖腰實一實，因住胡杏兒睇見起火喎！



晚裝：英國 designer Millin首飾： Boucheron

不過不失，簡單穩陣嘅晚裝，啱比例但冇大驚喜囉。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄