冧望
《蘋果日報》圖片
一直盛傳已翻撻的 Sammi同許志安，甚少被傳媒影到單獨約會，直至上週四（ 3日）有報章記者撞破二人於佐敦太平館撐枱腳，復合一事終於有聲有畫。
唔認博宣傳
週一為 5月個唱開記招的安仔，被記者追問復合一事時表現鬆毛鬆翼，「我同 Sammi係講感覺，好 natural，冇話邊個主動。」但就好主動在記招上提住 Sammi囉！
問：怕唔怕俾人話博宣傳？
呢方面我睇得好開……咁樣好侮辱愛情。
問：時間夾得好啱喎？
要嚟嘅我都冇得去計……
恨嫁出口
Sammi上年接受馬時亨《以時相聚》訪問時，表示願意為婚姻付出，更明言一旦再戀愛不排除即嫁，「我以前唔願意付出，我家好希望感受吓婚姻嘅幸福，我諗我將來嘅另一半會好幸福！」
送 999枝玫瑰
其實 Sammi同安仔早於農曆年前已復合，不過二人相當口密冇向身邊人透露。安仔上年 7月同前度余德琳（ Michelle）分手後，曾一度情緒低落，好在 Sammi一直為佢祈禱，又經常約埋查經， Sammi更會親自下廚整沙律畀安仔食，繼當年廚房宣言後再次在廚房撻着，而安仔亦送了 999枝玫瑰畀 Sammi做情人節禮物，成功追番 Sammi歸。
不停講 Sammi
復合收埋 2個月，但 5月開個唱的安仔，卻校啱時間任人影。許志安背後下過唔少工夫，「當日有人打電話去報館，話見到 Sammi同安仔喺太平館撐緊枱腳，時間地點有齊晒，連坐邊張枱都講埋，有冇人咁神心先？」知情人士透露。
合照影埋，安更名正言順公開戀情。週一早上先在查小欣的電台節目認復合，其後更在演唱會記招上四萬咁口話：「我同 Sammi呢幾日有個共識，覺得應該要畀一啲朋友去知道呢個（復合）係一個事實，我哋嘗試開始番一齊，重新認識。」但對於被指借 Sammi宣傳，安仔就話：「呢一方面反而我睇得好開喎！同埋我相信冇人會拎一段真嘅感情去做宣傳，如果係咁樣會比較侮辱咗愛情。（時間夾得好啱喎？）要嚟嘅時間，冇得去計嘅！唔好理人點睇啦！」
Sammi講過當年因為唔識珍惜而分開，家 Sammi識諗晒，安仔都係時候學吓珍惜喇！
一直相愛
04年分手、到 09年開始傳復合， Sammi同安仔經常傳翻撻，唔係今次安仔公開承認，又以為另一次煲水。
宣傳易
安仔同 Sammi由 91年拍拖到分手再復合，每次都鍾意擺女方上枱製造話題，咁啱咁蹺，每次安出新碟或開演唱會前，都會有關於佢同 Sammi的新聞見報！橋唔怕舊呀！
MV抽水'03 10月
同 Sammi熱戀期間，安仔喺新歌〈一步一生〉 MV加插 02年「廚房宣言」的片段，及二人的親密合照，安更在 MV晒當年二人的訂情戒指。
分手谷碟'04 2月
04年宣傳國語碟《好得很》，當時安仔計準時間宣布同 Sammi分手，又接受曾志偉的訪問，「呢一刻我係單身，佢係我呢世最好嘅朋友，只不過關係角色唔同咗，感覺同感情一樣，呢一世佢都係我最尊重嘅人。」
個唱反口'07 7月
舉行入行 20年音樂會的安仔，當時已同余德琳一齊，被記者問到個唱會唱咩歌時，安仔無端自爆，「 Sammi係樂壇一個重要歌手，所以都會唱佢嘅歌！」但幾日後又忽然反口話「唔會唱 Sammi嘅歌！」擺明自製話題。
爭請嘉賓'09 7月
被傳有意翻兜 Sammi的安仔，同梁漢文、蘇永康、張衛健一齊開 Big 4演唱會，記招時自動波向記者表示會請 Sammi做嘉賓，「梗係要請佢啦！大家一齊成長，如果佢唔嚟，到佢演唱會時，我哋 4個衝上台搶期呀！」
採訪、撰文、攝影：娛樂組
留言列表
{{ article.title }}
