娛樂八掛大放送★

近排打機興上人身， PSP隻《 The Third Birthday》飛嚟飛去搵替身好過癮，嚟緊家用機又有一隻《 Mind Jack》玩心靈入侵；呢隻 Game擺明玩駭客元素，不過就唔係 Hack入人哋部電腦，而係 Hack入人哋個腦！文：阿洛

心靈反恐戰 放大圖片

■可以脅持敵人，成為你嘅心靈奴隸。

射擊遊戲唔係玩異形就玩過去未來，呢隻都唔例外，講緊嘅係西元 2031年，喺呢個未來高科技世界出現咗一班可以 Hack入人哋身體嘅人體駭客，而有呢種能力嘅當然有好有壞，主角就係好人一方嘅 FIA聯邦諜報局特務 JIM，同埋反乜反物組織靚女 Rebecca，目標好明確，就係阻止心靈上嘅恐怖襲擊。

放大圖片

■ Hack入腦嗰吓，痛到爆腦一樣！

放大圖片

■人物面相真實程度好高，一貫靚畫面。

行家親家認唔清

講到頂癮之處，就係隻 Game玩埋現實網絡，只要將遊戲機連接網絡，就可以心靈入侵其他「在線玩家」；同一時間下，最多要面對 6名其他玩家 Hack入閣下遊戲世界。作為入侵者，可選擇幫主角定反主角，即係你打打吓機，隨時敵人會由電腦 NPC，變成其他在線玩家，同時間又有可能有老友記上網幫你拖；身邊市民隨時「鬼」上身偷襲你，又有可能會突然幫你清卡數、擋子彈！增加難度之餘，邊個係朋友邊個係親家，都好難話得埋！

放大圖片

■可能突然被偷襲，而且網上玩家梗係比電腦蠱惑，難度大增。

放大圖片

■戴有色隱形眼鏡，喺 2031年依然係潮流。

機械怪物照上身 放大圖片

■機械都可以入侵，好似安全好多喎。

入侵無界限，可以使用街道上任何人物或敵方身體，甚至係機械或者其他合成生物都可以操控，而隨住操控對象唔同，攻擊能力及方法都會有唔同。自閉仔女唔想同人有聯繫，可以熄咗個網上入侵功能；同樣如果想玩分隊對戰、大亂鬥都有線上模式可以玩。

Profile《 Mind Jack》 放大圖片

主機： PS3、 XB360類型：射擊廠商： Square Enix推出日期： 1月 27日