娛樂八掛大放送★

惡魔城都係橫向 2D好！奈何遊戲壇由西人主導，首度高清示人嘅《 Castlevania: Lords of Shadow》亦焗住 3D化；從大量巨型波士及主角條鎖鏈鞭嚟睇，風格極度有《 God of War》感覺，不過男主角就無中年脫髮嘅煩惱！文：阿洛

小島秀夫監修名牌 放大圖片

■班惡魔好搞笑，自己剝個頭落嚟，嘩！嚇死人咩！

作為《惡魔城》 Fans，之前受過陳年《惡魔城 3D》嘅苦，見到都已經退後一步；再嚟見到設定主角唔係吸血鬼獵人貝爾蒙特家族後人，又退多步；而且，今次首先推出嘅係歐美版， Konami剛剛先喺東京遊戲展宣佈會好快推出日本版，相信遊玩意欲已經跌到冰點。呢個時候，救世主出現喇，因為呢個遊戲係由小島秀夫領軍嘅 Konami小島製作室作監修，西班牙 MercurySteam Entertainment負責開發，信心返咗啲埋嚟，再睇埋極有惡魔城氣氛嘅畫面，又吊橋、又城門……算啦！同《 Winning Eleven》同一道理，信埋佢今次啦。

放大圖片

■十字架可以變長鞭，保留番元祖《惡魔城》感覺。

放大圖片

■特典版有畫集、角色設定等，不過最重要係個封面有氣氛啲。

光明會聖騎士 放大圖片

■個人覺得敵人設定比較有心思，堪稱古靈精怪。

今次新作以「末日」為背景，雖然係正統系列作，但就採用全新故事劇情，古仔係講地上聯盟同天界受到不明惡魔勢力「 Lords of Shadow」侵襲，而原本喺地獄嘅惡魔亡靈同時出現向人類作攻擊。英雄嚟喇！佢叫 Gabriel，有吸血鬼獵人血統，但唔係德古拉啲子孫，只係同吸血鬼獵人家族有關嘅組織「光明兄弟會」成員，作為聖騎士嘅佢，感應到已死妻子 Marie嘅靈魂召喚，當上救世者角色，探究關鍵之物──神魔面具背後嘅真相。而主角右手拎住可變鎖鏈鞭嘅十字架，左手則係鐵爪，可以擒城牆之外，仲可以配合使出連續技，呢個時候，又唔只似《 God of War》，仲似埋《 Devil May Cry 4》㖭呀，抵玩啦喂！

放大圖片

■令人懷念，一鞭即散骷髏怪。

放大圖片

■爬城牆，之前《惡魔城》都無呢招，叫做幾有新鮮感。

放大圖片

■巨型敵人角色，相當有逼力，亦好鬼《戰神》感覺。

放大圖片

■同《戰神》一樣，有時可以騎上啲怪物個頭。

主角得把聲 放大圖片

■留意左邊角色，似乎係同伴，但應該只係由電腦控制。

今次先推出歐美版，對本地 Game迷嚟講仲方便咗，話晒英文都可以查字典，而且配音陣容強勁，有《迷幻列車》嘅 Robert Carlyle、新版《 Star Trek》艦長 Patrick Stewart，以及美劇《 Californation》嘅 Natascha McElhone等。而剛公佈嘅日版聲優就有大塚明夫、藤原啟治、菊地由美、大塚芳忠等；想唔想等？自己決定。而遊戲更有分為特典版同普通版，最大分別係個封面，特典版型好多。

Profile

《 Castlevania: Lords of Shadow》主機： XB360/PS3類型：動作廠商： Konami人數： 1人發售日期： 10月 5日


■類型偏向寫實、血腥一類，都係歐美風格。