娛樂八掛大放送★

牡丹雖好，但總需要綠葉扶持，一部叫好叫座的電視劇，除了有小生花旦坐鎮外，一班好戲的資深演員也功不可沒。在無綫劇集《公主嫁到》中，李國麟和韓馬利飾演丁來喜（關菊英飾）的堂弟丁財旺和夫人米仁慈，二人襯到絕的造型和啜核演出，令觀眾睇得開心，雖然如此，二人日前接受訪問，韓馬利自言還未夠誇，實際可以更上一層樓。　撰文：何慧斯

李國麟和韓馬利日前在佐敦接受訪問，談到劇中的造型配襯度與城中名人周啟邦夫婦相似，他們異口同聲笑說：「小青姐（監製梅小青）希望我哋呢對夫婦行出嚟嗰陣，要畀人覺得眼前一亮，出親嚟都要好夫唱婦隨，行徑要夾同抵死，加上又要我哋由着嘅衫到坐嘅轎都要襯晒，所以出嚟個效果咪好似囉。」李國麟則說：「小青姐仲好刻意要用同一幅料做衫，最多不過係款式唔同，而且 Mary姐（韓馬利）又要有好多頭飾，搞到我又要襯埋一份，我以前拍古裝片都未試過用咁多飾物。」

李國麟：喜劇難過喊戲

雖然不少人覺得二人的演出很啜核，但 Mary姐笑稱仍未夠誇，她笑說：「其實我哋每次開工前夾晒，例如今次出邊條橋呀，啲眼神動作又要點樣一致，不過我之後睇番部劇，如果早知佢哋三兄弟（阮兆祥、陳豪和黃浩然）做得咁誇，我仲可以做得誇啲，尤其係話我同麟哥、菊姐俾人綁票嗰場戲，仲可以玩多啲嘢。」記者笑指二人今次的策略成功，李國麟笑稱只是沒有失手，他反而覺得拍喜劇有難度，他說：「喜劇係觀眾睇得舒服，演員要好吃力同埋要好大能量，先可以引起觀眾共鳴，所以我覺得拍喜劇係難過拍喊戲，拍喊戲只要有足夠淚水，基本上已經有 80分。」在旁的 Mary姐也同意說：「做喜劇真係要有個好對手，咁先至好玩，不過我好佩服祥仔（阮兆祥），佢轉數真係好快，真係好嘢。」

放大圖片

丁財旺和米仁慈經常情侶裝上陣，兩人的衣服刻意用上同一幅布料。電視圖片

放大圖片

劇中米仁慈愛子心切，為了阻止馬國明飾演的有維往找銀屏，遂以死相逼。

韓馬利入行 30年重健康 放大圖片

入行 30年的韓馬利表示最重要是身體健康，這樣才會長做長有。

今年是 Mary姐入行 30年，問她打算怎樣慶祝？她笑說：「冇喎，我前排同公司傾約，講講吓都講到呢個問題，我就笑自己做咗 30年嘅答案係如此下場，呢個下場咪就係開心囉，家我覺得最重要係健康，有健康乜都可以做到，冇健康就算有幾多錢都冇用。」李國麟也認同健康就是福，他說：「以前同啲朋友見面，通常都係講開心嘢，但係家好多時都係話邊個邊個有事，又或者佢自己唔舒服，一世人得嗰幾十年，開心又係咁過、唔開心又係咁過，所以不如選擇開開心心，玩完先算。」場地提供：圓方

笑聲之最最好笑同劇男演員　阮兆祥、陳豪 放大圖片

阮兆祥、陳豪韓馬利：「我梗係揀祥仔，佢真係做得好笑好過癮。」李國麟：「我反而覺得陳豪好搞笑，佢平時好正經，估唔到可以咁放。」

最好笑同劇女演員　佘詩曼 放大圖片

韓馬利和李國麟異口同聲讚佘詩曼：「其實做公主嗰幾個都好，不過阿佘真係令人眼前一亮，佢做得幾好呀，佢以前都好少做呢類角色，佢啲搞笑 timing好好。」

最好笑自己演出的一幕　幕幕都精采

「全部都好好笑喎，次次出嚟都有嘢搞，反而覺得賣相好笑。」


韓馬利和李國麟演技毋庸置疑，兩人演起一對愛財如命的夫妻啜核搞笑，甚為搶鏡。攝影：葉君海