訪問當日，姜依蘭只淡掃娥眉，打扮 casual，她笑言是遺傳自母親。

姜大 衞長女姜依蘭和曹永廉由拍拖至○七年奉子成婚，別人總是愛將二人比較，姜依蘭既是影帝女兒又是大學生，曾在煙草公司 Philip Morris做市場部經理；中學畢業的曹永廉在 TVB做二線男藝人，極其量拿過十大勁歌金曲新人獎銅獎。在電視劇集裡擅演小男人角色的他，現實生活依然演着女尊男卑，甚至被傳禮金都慳番的小男人。
最近姜依蘭辭工搞生意，與朋友代理畢彼特、碧咸也愛買的紐約童裝 Appaman，鋪頭在中環萬宜大廈及金鐘 Harvey Nichols，於是又有人話老婆叻過老公，姜依蘭卻不慍不火說：「我表面俾人感覺好硬，其實我係連一隻蜘蛛仔曱甴也驚，搵老公一係搵好有錢、一係搵靚仔、一係搵個保護到我嘅，佢就係保護到我。」

抗拒娛圈



Elaine○七年大住七個月肚下嫁曹永廉，不怕人家講閒話？已經卅七歲的 Elaine說：「我又唔係十四、五歲大肚。」

姜依蘭（ Elaine）有個影帝父親，母親李琳琳、伯父秦沛、叔叔爾冬陞，甚至剛過身的嫲嫲紅薇亦是藝人，她反而無入娛樂圈，她自嘲說：「我腳唔夠長，身形唔夠高，唔想自己被擺上報紙寫。」畢竟從小到大，同學仔也借故問她拿影星父母的簽名， Elaine多少也抗拒入行，「有一年轉校，我覺得係機會，開學自我介紹時，我會說爸爸從商。」他們一家人關係好，過時過節一定幾家一起食飯，提起上月剛過世的嫲嫲，她說：「嫲嫲不用榮華富貴，只想一家人開開心心食飯。」



兩夫婦不時同兒子合照，對兒子有何期望？「性格品格要好，想佢嘅童年開心。」

但她和洪金寶兒子洪天明由細玩到大，是老友兼雀友，和做藝員的曹永廉打麻雀打到撻着，拍拖五年，○七年奉子成婚，半隻腳插了入娛樂圈。當年有記者煞有介事問姜大 衞意見，他力撐愛女說：「我自己當年都係奉女成婚。」反而曹永廉諸多顧慮，驚影響星途， Elaine又極力替丈夫辯護：「無端端一個偶像個老婆有咗，啲 fans對佢無晒遐想佢就大鑊，所以係正常。我反而話可以唔結的，因為我哋唔會分手。」

老公搵錢多

正因為出身演藝世家，她和老公也有共同話題，不知就裡者，就覺得姜依蘭是大女人，又拿她和曹永廉的學歷比較，說 Elaine在夏威夷太平洋大學修畢市場行銷學，而曹永廉只是中學畢業，講到曹永廉連禮金亦無給外父外母， Elaine又一一澄清：「屋企無要求，不過老公俾咗負擔得起嘅禮金俾父母。」就連屋企燈油火蠟開支，也有人懷疑要女方支付，「咁多年我也有自己收入，無理由佢俾晒，大家 share，當然去旅行、出街食飯佢請我。」她早已習慣傳媒形容他倆女尊男卑，「有人俾我寫得更慘也未出聲。我唔係 head住個男人，大家叻嘅嘢不同，讀書我叻過佢，但其實佢搵錢多過我，大家互補不足。」她又澄清父母亦從無反對他們一起。曹永廉吸引到姜依蘭，原因二人夠夾，「佢任何嘢也同我講，好舒服，我係尋求真愛，我在佢面前不用刻意做另一個人，譬如我三百六十四日唔化妝，只得一日化妝也 OK。」



二千年，姜依蘭（左三）與母親（左二）、伯父秦沛（右三）、妹妹依文（右二）及當時只有五歲的弟弟卓文（前排）一齊和嫲嫲（右一）賀壽；上月尾九十三歲的嫲嫲因病逝世， Elaine與母親李琳琳（右圖左）送她最後一程。


對 Elaine來說，最難是入貨款式及數量要拿捏得準。

其實好易理解曹永廉點解會被列為小男人。他九四年學人做歌星，出過幾張唱片唔賣得，九八年重返無綫月薪只得三千，做的角色都是小男人，因而被定型；相反太太由打工仔進身老闆， Elaine卻反駁說：「我真係唔想做女強人，亦唔係大女人，我識換燈膽也扮唔識。」她只想花多些時間留在屋企陪三歲多的長子曹保熙，及五個月大的女兒曦文，所以早前便辭任做了八年幾的煙草公司市場經理一職，和朋友夾份做童裝生意，在今年四月開了第一間鋪頭。「過去三年得好少時間在兒子身上，我返到屋企已八點，仔仔九點入房，我不想錯過兒子咁多嘢，以前我在兒子心中排第三，第一係老公，跟住姐姐，依家佢任何事也叫媽咪。」

相處之道

Elaine一直想做有關小朋友的工作，「我好鍾意小朋友，細個諗過做接生、兒科醫生、做護士在 BB房工作，但讀唔到。」做老闆可以彈性上班方便湊仔， Elaine覺得不妨一試。至於入 TVB前做過童裝生意但蝕光，又做過安莉芳賣胸圍的丈夫有無俾意見？「佢問我諗清楚未？我自己都擔心，我放棄人工攞筆錢出來，依家無糧出捱儲蓄，睇吓捱唔捱到出頭天。」



Elaine和他的煙草公司舊上司曾志燿（左二）一齊搞童裝，問她入 Harvey Nichols有冇靠關係？「無，真係落標書㗎！」

今年六月誕下女兒，會否再追？「暫時唔會，帶大小朋友唔易。」

九二年他們一家移民加拿大，姜大 衞加港兩邊走，夫妻關係維持得辛苦，他亦由此悟出夫婦相處之道，就是什麼也要一齊參與。而 Elaine亦有自己一套，「放大佢嘅好處，縮小佢嘅短處。」 Elaine說丈夫的短處是不夠浪漫，但很細心，「佢會上車開定冷氣俾我，落車提我帶烏龍茶。」收到。



四歲的 Elaine和父親合照。

父母抱着剛滿月的依蘭。

arrow
arrow
    文章標籤
    最佳保護　姜依蘭 壹週刊 1132期
    全站熱搜

    stacylife 發表在 痞客邦 留言(0) 人氣()

    E-mail轉寄