Cut咭爆粗老屈許志安賤招趕女女友 Michelle 余德琳壹週刊 1065期 @ 娛樂八掛大放送★

一直處心積慮部署翻啅鄭秀文的許志安，上週六（31/7）忽然公開自爆因性格不合，已跟女友Michelle（余德琳）分手，還刻意擺出一副有風度形象，對感情有交代，不拖泥帶水。
糖衣包裝，為了搣甩Michelle，許志安根本是無所不用其極，出盡賤招。過去四個月，他不時向女友爆粗，又老屈對方濫交大使，唯Michelle採取逆來順受唔願放手，許志安見無計可施，最終在一個月前，當面向女友攤牌：「我唔×想再見到你！」並火速終止他送給女友的附屬咭，絕！

賤男現形
過去大半年，不斷傳出許志安求與鄭秀文復合，對此，許安與Sammi均未有強烈表態，但上週六，許志安竟一反常態，公開自爆跟拍拖三年的女友Michelle已經分手。
原來，安仔作出此舉前，早已同身邊兄弟露過口風，聲稱有意同鄭秀文重修舊好，大家識於微時，身邊兄弟當然歡迎「前阿嫂」歸位，幫手撥行大葵扇。
為伺機親近Sammi，許志安經常借故搵機會與Sammi合作，由於二人同屬一間公司，許安的翻啅大計，進展得事半功倍。
許安攞正牌翻撻舊愛，女友Michelle早已察覺有異。去年底Sammi舉行演唱會，尾場請Big 4做嘉賓，其中一晚Michelle亦是座上客，「秀安」復合被熱炒，其時許志安仍會裝模作樣，安慰吓女友。「嗰時佢同Sammi嘅關係未係咁密切，佢仲會整色整水解釋吓，叫Michelle唔好信，話傳媒亂講！」知情者說。
不過，自從愈多機會接近Sammi，翻啅愈來愈有把握，許志安便開始賤男現形。「大約四個月前，佢趕Michelle離開加多利山屋企，之後亦唔再俾女友去，就算約晒啲兄弟朋友去屋企玩，都無Michelle份。有時大家喺出面見，就算喺我哋班朋友面前，佢對Michelle都好冷淡，講多句都嫌費事，莫講當事人，旁人都好難堪，Michelle試過喺朋友面前喊！大家都睇得出，安仔好care Sammi啲嘢，佢女友真係好慘！」Michelle及許安身邊好友說。

大動肝火
今年三月，Big 4舉行演唱會，許志安主動提議請Sammi做嘉賓，二人台上眉目傳情，對Sammi的態度表現親暱，完全當女友無到。
尾場當晚，Michelle亦有到場睇騷，當時有人在後台問安仔：「嗌唔嗌Michelle去慶功？」點知安仔即刻大動肝火，爆粗大嗌：「唔×使理佢！」嚇得在場的人都唔敢再出聲。
「嗰晚無人敢嗌Michelle去慶功，點知佢自己落咗嚟，不過，安仔就全程當佢透明，副嘴臉真係好難睇！Michelle只係自己坐埋一邊，走嘅時候佢仲眼紅紅！但安仔由頭到尾都無理過佢！」Michelle友人說。
男友態度劇變，這半年來，Michelle開始抑鬱，經常不受控落淚；由於她跟蘇康女友Anita及梁炳老婆Karen亦傾得埋，每每情緒低落，便找二人訴苦。
「Michelle好多次同佢哋飲飲吓嘢，都忍唔住喊出嚟，佢壓力好大，唔知自己做錯乜，令安仔成日躁到爆粗！Anita同Karen都好幫Michelle，每次都會返去同蘇康梁炳講，叫佢哋幫口勸吓安仔！」

阿嫲過身
Michelle愈忍，情緒愈不穩，但一早求去的許志安，卻毫不動容，絕無心軟，一個月前，更將自己送俾Michelle的附屬咭cut埋，甚至不准她到加多利山探望在家中飼養的狼狗。
「舊年年中，佢哋嘅關係仲係好
OK，嗰陣安仔經常會拖埋隻狗同女友出去玩，又成日去女友屋企，同對方爹哋媽咪食飯，隻狗好黐Michelle，但依家佢連狗都唔俾見，好絕情。」知情者說。
前陣子，Michelle祖母過身，更令她大受打擊。「Michelle有打電話講俾安仔知，但佢話安仔反應好冷淡，好似一個陌生人咁；屋企有白事，心情已經夠差，點知安仔仲約Michelle出去攤牌講分手，仲無情到爆晒粗：『我唔×想再見到你！』搞到Michelle喊咗幾日，乜人都唔肯見。安仔咁心急要公開俾大家知佢回復單身，佢想點，係人都知！」

唱衰趕絕
為掟Michelle，許志安絕對係精心部署，近日他更夾埋一班兄弟，商討如何淡化自己同Michelle的一段情。
「Michelle仲未死心，好想箍煲，但安仔早已心向Sammi，所以佢就搵埋班兄弟諗計趕絕Michelle，除咗反對自己老婆同女友黐Michelle，安仔亦擔心分手影響形象，於是不斷對外唱衰對方，話佢好大使，又話佢鍾意溝仔，人品好差，總之衰到貼地！」
公告回復單身，安仔名正言順同Sammi過生日，但失戀Michelle就連工都唔敢返。「同安仔拍拖，Michelle已經好怕公司同事指指點點，依家搞到咁大件事，佢呢幾日都匿埋喺屋企，唔敢返工，又唔肯聽電話。」三年情，許志安痛快一刀切，難為Michelle近幾個月被折磨到走晒樣，唔傷就假！

欲斷難斷
許志安同鄭秀文分手多年，卻餘情未了。08年安仔搭上余德琳，由絕口不提Sammi到不時將舊愛掛在嘴邊，Sammi亦由當初祝福對方，到不排除復合，充滿弦外之音的言論，完全為他日復合鋪定路。

2008年
•同余德琳拍拖，Sammi：「我哋冇復合，總之我祝福佢。」
•許志安是非纏身，Sammi：「不需要再講太多，他有事，我隨時stand by！」
•Sammi在訪問表示，難回頭與舊愛復合，安仔：「轉頭，有幾難？」
•年底「東亞華星演唱會」上，安仔隔空與Sammi合唱《唯獨你是不可取替》，唱罷向觀眾說：「我諗起當年好拼命工作，好清楚邊個坐喺我側邊陪我、支持我……」話未說完，Sammi搶說：「嗰個咪我囉！」
•在《大搜查之女》上海記者會上，Sammi自爆：「我而家唔會強求姻緣，不過有好幾個階段都想結婚，而且係同一個對象。」言下之意暗示此人是許志安。

2009年
•有指許志安有意與Sammi復合，安仔：「我同佢嘅關係唔可以用文字去形容，我哋乜都會講，大家好信任大家，佢係我一生一世會support嘅人，我同佢而家嘅關係係very good。」
•拍《罪與罰》MV，24味極力向Sammi推介隊員Brandon做男友，她婉拒說：「我鍾意單眼皮的男仔（許志安是單眼皮）！」

2010年
•「The Big Four世界巡迴演唱會：香港站」尾場，Sammi同Michelle分別前往捧場，克勤踢爆Sammi甜到要抹口水，許志安說：「我鍾意的人來了！」
•在《Big 4大四喜》上，安仔被問到被哪一位女性傷得最深，他說：「我覺得在感情上冇得講俾人傷害，如果一定要講一個令我好心痛嘅人，來來去去咪又係嗰一個。」默認Sammi在他心中的地位。
•Sammi宣傳國語新碟《信者得愛》，被問到同安仔舊情復熾，她說：「我哋冇復合，呢個階段冇呢個可能性，但係將來嘅事我唔敢講。」

落藥踢走管家婆
助手「細佬」（潘恒章）自華星年代已同許志安合作，亦暗戀對方多時，04年安仔與Sammi分手後，終於有機會埋身，暗中坐正做女友；07年10月安仔老豆過身，「細佬」更戴孝以家人身份打點喪禮。
仆心仆命，公私兩忙十五年，分手後，安仔仍讓「細佬」處理投資、財政大事，直至08年同余德琳拍拖，Michelle眼見「細佬」凡事有權過問如管家婆一樣，開始向男友落藥，由於當時兩人打得火熱，安仔對新歡言聽計從，拍拖幾個月，安仔便炒掉「細佬」。

換女如換衫
為咗一棵樹放棄整個森林，談何容易，尤其娛樂圈，誘惑多，拍緊拖、結咗婚，一腳踏兩船、三船，多的是。
梁榮忠
05年與鍾麗淇拍拖，卻被傳媒影到同朱慧敏玩車震，事業、愛情即「震散」，分手後，更催促鍾麗淇變賣早年贈送的物業分身家。
羅嘉良
前妻方敏宜守在他身邊，由繪圖員捱到視帝，其間曾與合作花旦如宣萱、陳慧珊、佘詩曼等傳緋聞。08年氹掂前妻離婚，唔夠半年即與內地女星蘇岩拉埋天窗。
崔建邦
同唐詩詠拍拖四年，不時被影到攬女夜蒲，08年，同唐詩詠拍拖同時又搭上o靚模鄺敏慧，但因發生動粗事件，揭發崔一腳踏兩船。