斷水斷電逼遷李進反控兄長惡行壹週刊 1065期－娛樂八掛大放送★

上星期，本刊披露黎明、Sammi前經理人李進，與兄長李航（前稱李康）為元朗逢吉鄉五萬呎圍村地反目，並由李進親戚提供他破口大罵的片段，以及如何霸佔其中Lot no. DD107「561RP」地段起屋起office。
報導出街後，李進㷫爆，指兄長顛倒是非，惡人先告狀。上週六（七月三十一日）李進任由記者入屋拍攝，並詳解兄長李航如何霸地，以及問題地「561RP」的來龍去脈，李進甚至親自上門，找李航父子當面對質，討回公道。

惡人先告狀
十幾年前，李進在其兄李航名下的「561RP」地段，興建了一幢兩層高的村屋做住宅，兩年前，再加建了一間佔地數百呎workshop，連同李家住了數十年的三百呎祖屋，亦在同一地段。
李進說：「呢度有五萬呎，我喺度得三間細屋，加埋幾千呎，佢（李航）喺我同我兄弟姊妹名下嘅地上面起魚塘、起屋、起簷篷放雜物，呢啲嘢佢又唔講，佢用咗五分四嘅地，邊個霸？仲喺度惡人先告狀。」
李進憶述「鬧交片」是上月九日被李航父子偷拍，當時李進帶工人入屋整水喉，遭李航父子阻止。「我嘅地方整嘢都鬧，晨早九點幾又未瞓醒，咪鬧鬼佢囉！段片對我聲譽影響好大，我個女藐我呀。」李進說。
李進解釋，「561RP」地段是李航以不道義手法攞到手。「原本塊地係人哋嘅，但我哋嗰間三百幾呎嘅祖屋亦喺『561RP』，一家人由細住到大，十幾年前佢（李航）話幫阿媽搞易權（住滿十二年可易權侵佔，轉自己名），未得我哋同意，寫咗自己個名。之後我返祖屋住，佢想趕我走，cut水cut電放狗、去政府部門投訴、郁吓就報警，呢樣唔俾嗰樣唔俾，話全部嘢都係佢嘅，講咗一百次都有。而家仲掉番轉頭屈我放狗，我冇養狗，貓就有養。」

李進寓所放滿曾合作的藝人所送的入伙禮物，證明自己一直居於此。黎明九四年更送了一部黑色保時捷答謝他，同樣泊在上址。

亂晒龍
李進兄弟在逢吉鄉各自擁有地皮，李進被指霸住兄長佔地，但其兄李航也同樣霸用其單位放雜物，現場所見，李航佔用的地方的確比李進多。

借託管霸地
李進表示，父親在八二年已將圍村地一人一塊分給李家子女，當時李進獲分較細的「812」，因此搭嚿豬骨分多塊「808」細地，後來另一兄長移民，將名下地段授權李航管理，李航轉埋名，再將「561RP」易權，變相有三塊地。「但其他兄弟姊妹唔肯俾佢管，授權俾我，我唔貪心冇要人轉名，所以啲地仲係佢哋（眾兄弟姊妹）名下。」李進理直氣壯說。
一家人互相借用地方，理應有商量，李進對於事件要循民事訴訟解決，認為是浪費資源，曾要求對方議和，但李航拒絕，還將事件向傳媒披露，令他不能不吐忍了十幾年的冤屈氣。

當面對質
之後，李進還帶記者到李航家，找對方對質，其時李航出外未返，只得其子李奧Leo及李航太太在場。
進：李進Frankie　奧：李奧Leo　
航：李航　李太：李航太太　壹：記者
進：阿嫂，報導出嚟搞到我，公平起見，你回應一吓。（冇人出聲）
壹：你哋其實想Frankie點？
奧：冇乜要求。
進：唔好要我體諒，你哋做過乜心知肚明，唔係我去搵報館o架！
奧：係我去搵嘅！
進：搞咁多嘢做乜呢？我張告票hold咗十年，希望用時間化解呢件事。
奧：或者我哋搵日出嚟傾。
進：叫你爸爸，我個好兄弟李航傾。
李太：大家都唔心平氣和。
進：發生呢件事，我冇打俾你吖，阿嫂，咁搞法我聲譽破壞晒。咁「809」、「808」邊個用你又唔講？
奧：姑姐嘅「809」我哋用咗。
進：點解唔簽租約呀？
奧：可以傾。
進：我哋一早提出咗你哋唔肯，仲走去同記者投訴。
奧：「561RP」係我爸爸個名。
進：佢冇徵求阿媽同意落咗自己名，你出咗世未呀？
奧：呢啲唔重要。
進：你都未出世，冇經歷過唔了解，憑咩嘢代表阿爸？

轉軚道歉
之後李進向記者介紹村長及村主席，二人同聲表示撐李進。之後李航駕車返家，李進即上前向他質問。
航：我只針對「561RP」，塊地原本係人哋，經過我同對方協商攞返嚟，之前，已經有魚池喺度。
進：咁點解又會有間屋呢？
航：我起嘅囉。
進：點解我可以喺度住呢？
航：我俾你住咪得囉！
進：你cut水cut電想趕我走。
航：呢個係你自己幻想出嚟。
之後李航太太催促他出外食飯，他邊駕車離開邊說：「所有嘢唔可以聽人作，去查法律文件就會清楚。」
不過，事隔兩日，記者再致電李航兒子李奧回應，他突然轉軚不再企硬，表示不接受訪問，只發出向李進道歉的聲明。李進亦表示同樣在email收到道歉信，但認為誠意欠奉。「佢行二十步路就可以同我當面講，大家一家人，我睇唔到有誠意。」

右：你想趕我走？（真實對白）
左：塊地係我嘅！（真實對白）
上週六中午，李進截停兄長李航架車，要同對方當面對質。

速逃
雙方各執一詞，李航在妻子（白衫）勸諭下駕車走人，李進冇符。