專呃 o靚仔傳銷借錢一條龍 @ 娛樂八掛大放送★

上週三下午，旺角道一間財務公司，收到一封裝有白色粉末及寫有「內有炭疽」文句的恐嚇信。
看似惡作劇的恐嚇案，經警員調查後，懷疑事件可能與同一商廈內的一間傳銷商有關。
原來，一間專氹青少年入局的傳銷商為推銷產品，經常游說他們主動到財務公司借款，警員不排除有人以惡作劇方式報復。

財務公司報警後，警方大為緊張，除派出爆炸品處理專家到場檢查藏有粉末的信件外，消防更派出一輛核生化事故車到場戒備。
最後，虛驚一場，信件內白色粉末發現未帶毒性，而案件由旺角反黑組接手調查。
經警方深入調查後，暫時雖未有人被捕，但案件調查方向，包括同一商廈的傳銷商。

恐嚇案背後
據一名警員表示，懷疑事件涉及有人不甘受傳銷商騙財及被誘到財務公司借貸，憤而寄出假炭疽粉信件恐嚇。
每日約下午二時許，大批青少年開始出出入入旺角道一號商業大廈，他們全是到樓上一間傳銷公司聽講座，及介紹親友幫襯各種課程及美容療程等。
記者曾嘗試上門查看，卻被內裡職員以年齡太大為由拒絕，據知該公司主要以青少年作對象，貪他們夠單純。
現年廿歲的阿Wing便曾在這裡被洗腦，自中五畢業後，她一直未找到工作，只偶爾做些part time。今年三月，她收到中學女同學阿Ann的電話，說有工介紹，就這樣，阿Wing便跟了舊同學「見工」，「入到去至知唔係正式見工，阿Ann話要先聽聽講座及公司簡介，心諗一場嚟到，聽吓無妨……
「先係一大班人，聽台上講者猛講要讀好英文之類，又話英文好咗，自信心返晒嚟……之後，就係小組討論，一班新人圍住組長坐，組長會猛sell自己成功經驗，話上咗英文課程後，即刻搵到份唔錯嘅工，而每個新人背後，坐咗一位職員，當組長講賺幾多錢時，佢哋唔單只即刻大聲附和叫『好』、『好啱』，仲舉高晒手拍掌支持，仲要班新人一齊跟住咁做。」

洗腦式銷售方法
阿Wing承認，在現場環境氣氛感染及舊同學的游說下，她漸漸覺得英文課程很有用，「開頭第一、二日未講錢，到第三日，見我信晒佢哋，組長就話我要報一個一萬六千八百蚊嘅英文課程，我見又唔係買啲無謂唔等使貨品，讀多啲書對自己又有用，咪問媽咪借錢交學費囉。」但當阿Wing到旺角一間進修中心上堂後，她已覺被騙，「課程好流，只係教一般普通英文會話，仲衰過平時返學上英文堂，上課時間又唔可以改，所以好多人返了幾堂都無返。」
感覺被騙後，阿Wing便沒到上址聽其他推銷講座，但上月頭，阿Ann又來電，將阿Wing再拉入「迷魂局」。「佢誓神劈願話，呢次真係可以搵到份好工，叫我再上去聽；話介紹親友報讀課程有佣抽，係雙贏局面，幫到親友之餘，自己又賺錢……」不懂如何拒絕的阿Wing，又糊裡糊塗受騙。

初時立定決心不再掏錢的阿Wing，最終仍被說服，今次她參加了一個近三萬元的美容療程，「組長叫我用紙筆寫低晒親友名及電話，仲叫我call佢哋上嚟聽talk，話幫到人，又幫到自己。仲話我成功開到一張單，就有一成佣抽，越多單，就抽佣越高……點知，講講吓，組長轉sell美容護膚品，仲叫我買美容療程，話唔親身試用產品，第日點向客人sell……」阿Wing結果再被騙多一次，她發現美容療程比平時自己花幾千元買的美容中心療程更「求其」，明顯上當，一次又一次被騙了四萬多元，她除了怨自己愚蠢外，也覺這間傳銷商專騙她這種無知青年，實在太可惡，即使多番投訴及追討，均沒獲任何理睬。
「我算好彩，只係問屋企借錢，我當場見唔少新人，被氹去樓上即時借財務公司。唉！點解呢類公司可以一直响度係咁呃人o架？」阿Wing投訴無門，結果在網上發現一大堆同樣的受害者，大家爭相公開自己經歷，希望其他人不再被騙。
「好多人好嬲，被呃咁多錢做傻仔，有人諗唔開，我覺得一啲都唔奇。」

奸商手法投訴無門
據李國銓大律師表示，以講座形式來轉介課程及美容療程等服務，並因此而介紹他人向財務公司借貸，這樣並沒違法。「英文課程或美容療程是否貨不對辦或物無所值，當中涉及好多爭拗，顧客最多只可以去消委會投訴。」
銅鑼灣一間「有名」的香薰傳銷商，同樣利用相類似手法，除售賣香薰產品外，還主動鼓勵會員向財務公司借貸來買貨，雖然同樣被人投訴多次，甚至有會員以自殺來控訴及遊行到立法會請願等，但該香薰傳銷商依然屹立不倒，因懂走法律罅。

傳銷公司內，全是廿餘歲的青年，因他們欠缺工作及社會經驗，故易被「洗腦」。