娛樂八掛大放送★

李彩華（Rain）跟從事保險業的男友王傲山（Marcus）拍拖兩年，去年十月，男方更將新購入的御龍山千呎單位供女友一家入住，但好景不常，近年因李彩華長時間留在大陸拍劇搵食，男方難耐寂寞，竟多次瞞住女友偷食，加上兄弟許志安推波助瀾，六月中，趁女友在橫店拍劇時要求分手。人、屋兩失的李彩華唯有搵屋搬。

搵人攝期
六月開始在橫店拍內地劇《回家的誘惑》後，李彩華一直留在上海，上週六（七月三十一日）趁劇組小休，即返港探屋企人。下午三時左右，被撇的李彩華相約朋友到跑馬地Benson飲下午茶消磨時間，一傾三個鐘，接近黃昏六時才離開。翌日中午一時，李彩華又再搵節目打發時間，相約前經理人趙雪英到灣仔福臨門食晏，之後又陪對方周圍睇豪宅。

趁機識女
據了解，王傲山跟李彩華在過去大半年，因女方不斷接拍內地劇，甚少留港，向來鍾意夜蒲的王傲山隨即趁機頻頻出動，在網上溝女外，還故態復萌，跟好兄弟許志安周圍玩。
「佢哋拍拖無耐，已經有人提阿Rain，話Marcus喺Facebook扮單身識女仔，不過當時佢信晒男朋友，根本聽唔入耳，而家咪知道係咩一回事，佢近年成日喺大陸拍劇，好多時打電話都搵唔到Marcus，問佢又支吾以對，唔使講都知道係出咗去玩，兩個人因為咁都嘈過好多次。」知情者透露。

一走了之
性格火爆的王傲山，試過跟女友嗌交後一走了之，連屋企都唔返，搬到酒店過夜，甚至數日後才蒲頭，其實係借頭借路，約埋一班兄弟酒店開房玩樂。
「Marcus同安仔（許志安）好friend，次次同阿Rain鬧交都會搵佢呻，安仔梗係幫兄弟，覺得阿Rain唔應該管住男朋友，雖然Marcus爹哋好鍾意阿Rain，不斷催婚，不過安仔就叫Marcus諗清楚，如果冇打算結婚，就唔好阻人時間，加上見到安仔同May May（身邊好友對許志安女友Michelle另一暱稱）分開咗之後，成個人輕鬆晒，Marcus咪下定決心同阿Rain分手囉。」

有晒部署
因王傲山同許志安係兄弟，李彩華與余德琳（Michelle）亦變得熟落，兩人更差不多時間甩拖被飛！
「其實阿Rain仲慘過May May（安仔女友），事關Marcus有晒部署，喺香港嘅時候扮冇事，直至阿Rain返咗橫店開工，佢先喺電話講分手，完全唔俾機會對方，仲要即刻出咗架瑪莎拉蒂（跑車），而家日日揸住新車周圍溝女，阿Rain覺得佢好絕情，所以都死心，亦積極搵屋搬。」知情者透露。
上週三（七月二十八日），每日有司機接送返公司的王傲山，下午五時放工返家，晚上七時左右，他揸住溝女戰車外出，當發現記者，即踩行油撇記者。
對於被男友電話狠撇，已經返回上海拍劇的李彩華在電話中回應：「多謝關心，我而家開緊工，唔諗其他嘢。（係咪搵緊屋搬？）屋企兩個老人家不嬲冇停過睇樓，搵啱心水咪搬。」

好事多磨
李彩華（Rain）入行近10年，雖然緋聞唔算多，每次以為感情穩定，點知又遇到風波，好事多磨。

林峯
01年二人合作電影《別戀》撻着，阿Rain被傳媒拍到夜訪男方舊山頂道帝景園寓所，又送太陽油做聖誕禮物，但戀情只是維持了年多。

蕭定一
03年6月，接拍M8電視劇《功夫足球》，傳出劇集監製蕭若元大仔蕭定一狂追，04年二人被拍到於的士上激嘴，蕭定一更為阿Rain以二萬元月租半山單位避債，又在背後策劃令阿Rain得以與金牌解約轉投寰宇旗下。二人拍拖四年，多次離合仍分手收場。

我唔怕做剩女。（設計對白）

上週六
李彩華相約女朋友飲下午茶，狂呻三個鐘先肯離開。

週日
她再約前經理人趙雪英飲茶，之後陪對方睇樓打發時間。

今年初，二人雖然不時因王傲山唔見人而炒大鑊，但依然雙雙出席慈善攝影展。

溝女戰車
王傲山坐七人車放工返屋企後，即揸過百萬溝女戰車外出，繼續happy。

去年十月因租約期滿，李彩華一家由跑馬地搬入沙田御龍山，王傲山新購入的千呎單位。

今年四月Big Four演唱會，王傲山跟李彩華拍拖捧場，更坐定定俾記者任影。

王傲山跟許志安十分老死，○五年許志安獲十大傑青，王傲山就出現撐場。

去年余德琳生日，王傲山跟李彩華都有出席生日派對，壽星女則飲到醉晒，要朋友扶住離開。