《名媛》陳玉蓮 拎 史迪仔 手袋？
■陳玉蓮拎住個小手袋，遠睇花紋勁似史迪仔。電視圖片
無綫台慶劇《名媛望族》，開頭一輪江美儀黑絲誘松哥、楊怡施展鼻上頂功，一開始係威係勢，坊間討論不絕。點知一去到中段講情情塔塔嘢，按TVB劇集方程式，節奏變得越嚟越慢，真係冇睇幾集都仲追到劇情。
前晚播出第36集，節奏依舊老鼠拉龜，但居然有網民金睛火眼睇，無他嘅，搵錯處啫，結果又真係俾佢搵到喎！
花紋相似
話說前晚嗰集講到松哥決定放陳玉蓮一條生路，寫封休書叫佢走，臨走前一家人食餐最後午餐，哭哭啼啼悶到呢。唔使驚，因為戲肉終於嚟啦！
蓮妹執拾包袱離開大宅嗰陣，松哥循例都要追出去，鏡頭一轉，蓮妹拎住嗰個手袋仔，點解咁似迪士尼隻卡通人物史迪仔？之後個近鏡睇真啲，手袋花紋依然勁似史迪仔。補充資料先，《名媛望族》係民初劇，而史迪仔就係1985年畫家Chris Sanders製作嘅。其實馮仁昭都相信純粹係花紋似啫，應該唔係史迪仔嚟，因為冇理由蓮妹揸上手咁耐都唔發覺㗎嘛！
撰文：馮仁昭
■史迪仔係85年嘅產物，唔通身為外星人嘅佢穿越時空出現？ 
■前晚《名媛望族》講到陳玉蓮被休，食埋餐飯就鬆人，劇情頗悶。電視圖片
全站熱搜
留言列表
{{ article.title }}
