酒紅色連身裙$18,030 Chloe

Cover Story

大娛樂家　薛凱琪

2012年12月13日 ~~ 第1188期香港《壹周刊》

娛樂的功能，原應是為大家帶來開心和快樂——本來！事實是有幾多個大娛樂家的笑匠人生，徹頭徹尾的都做得到。
遠的不說，就拿薛凱琪做個活例。
22歲入行，正宗十八廿二青春無敵做夢的年紀，憑着一曲《奇洛李維斯回信》大紅，再拍電視和電影入屋，未嘗新人入行辛酸便已直線越級跳上雲端。看似平步青雲的達之路，卻正正應驗了那句對人歡笑；關掉了水銀燈後的生活，患上抑鬱，叫人羨慕得牙癢的台上女主角，壓根兒根本不快樂。
所以，我是一廂情願的以為，轉會後推出的新曲《冷笑話》，是借喻人生，南柯一夢，何其諷刺。
「其實認識我的朋友都知道我是一個好鍾意講冷笑話的人， even我講的冷笑話常被朋友取笑一點都不好笑。但我覺得任何一段關係裡面，幽默感好重要，而且笑是世界共通語言，如果我能夠講一個笑話，成功令喜歡或不喜歡我的，都笑，我會覺得那種笑容才是最真摯的。」
原來並非抑鬱病發，反而是用心眼看通，真正從經歷中成長過來了，故此矢志向自己的弱項下苦功——挑戰拍笑片，希望終有一日能真正的成為一位大娛樂家。
就在距離傳聞中的世紀末倒數前 22日，心聲為證，立此存照。

催淚彈

轉會的最大原因是想出國語碟，因為太鍾意唱國語歌。我覺得任何一個愛唱歌的人，都希望可以唱到所懂得的語言，故簽新公司之初已定下目標，同 Paco講過想出一隻國語碟，如果成事，來年就可以同步製作廣東碟和國語碟了。
就算是一個唱得幾好的歌手、或演技幾出色的演員，都應該要不斷擴闊自己的選擇。像出道時那首《奇洛李維斯回信》好多人都鍾意，卻不代表以後就要循着這條受歡迎的 formula不斷 copy，就算更鍾意遲早都會聽厭，你唔厭，我都厭！
電影都一樣，如果大家有睇過我早期的作品，就知我強項是催淚，自己喊搞到人哋都喪喊，但近年卻刻意多拍喜劇片種，原因是我覺得進步應該有兩種：一是在懂得的範疇上做得更叻；一是有更多元化的發展。我就是不想重複又重複做自己最擅長的事，不想再做催淚彈，不想再做 Drama Queen，才向自己最不擅長的喜劇埋手。

同步漸進

黑色絨背心$14,900
黑色絨半截裙$15,500
Both from Rue du Mail

坦白講，我以前對拍笑片有恐懼，因為拍過，但拍出來的效果一啲都唔好笑，幾大鑊！如果笑片唔好笑點會好睇，邊有人睇笑片係睇美指睇劇情？入場無非為得到娛樂！也曾因此而不開心，檢討過後發現問題都响自己度，好在我份人唔輸得，鍾意挑戰，要有進步，害怕無變化，除非甘願成世留在 safety zone裡面繼續拍愛情片拍文藝片，否則就要鞭策自己學多啲，勇於嘗試去克服弱點。
想通了，就會明白其實 entertainer可以有好多種， entertainment亦有好多方法，入戲院唔一定只睇藝術性高的電影，有陣時輕鬆啲笑吓都可以得到快樂。
我就是想令觀眾得到快樂。
所以我已經搵到自己的位置，我的位置就是更加清楚知道自己是個怎樣的人，目標是什麼。我唔理出面發生咩事流行緊乜嘢，唔一定爭第一，唔一定要贏人，唔一定搏有獎攞，我只會做自己覺得好玩，有愛的 project， even唱歌 even電影，未來都會繼續雙線發展。現時手頭上已揀緊三、四個劇本，而早前在紅館舉行過的演唱會亦都因為反應好，傳媒至 fans至親戚朋友都叫我快些開 part II，可惜當其時搞緊轉會，要 hold住，希望 2013年會有機會。

理智與感恩

22歲入行，若論入行十年得與失，一定是得的比失的多。
小時候，是哥哥張國榮的 die hard粉絲，每一趟紅館演唱會都不會錯過，每次睇都會諗：嘩！紅館咁大，究竟台下面係點？人落咗台係點樣上返嚟？企在台上望向觀眾席的感覺到底是怎回事？就是從來無想過，自己有朝一日真的可以站在台上，見識所有歌手都夢寐以求的境地，所以我好應該感恩！
因為，我做緊一份我好愛好愛的工作：我愛唱歌，我竟然可以做到歌手；我無諗過自己能夠拍戲，上天卻送埋個 bonus俾機會我不斷磨練。試問世上有幾多人，可以做到自己鍾意的工作？仲要有空間可以不斷發揮，而並非機器人一樣被任意控制擺布。因此很珍惜每一次機會和每一個工作，尤其當下時勢，作為一個香港藝人，賺到錢，兼且日日有工開，這種幸運更加得來不易。故此，縱然，我失去的是自由度和私人空間，四年幾以來無放過假，理智卻話我知，我冇資格怨。

丟掉抑鬱

米色喱士上衣$15,470
米色喱士半截裙$14,940
Both from Chloe

當然，沿途走來，一定有唔開心的 moment，但我寧可報喜不報憂，只在訪問裡頭 share開心事。因為我賣的是娛樂，我的職責就是帶給大家開心和快樂，做乜要講一些唔開心的事情迫大家知？我又不是要喊苦喊忽講到自己有幾慘去博同情，希望得到你們的可憐！
前些時候，之所以公開向大家講我有抑鬱症，那是因為我做咗隻歌《 Better Me》，內容是關於這方面，希望藉此作反面教材，勉勵大家。 Between我同另一位經理人 Anita之間的共識，就是一有時間就要做多些社會公益，近年更多了出席相關的情緒病分享活動，令大家好好正視這個愈來愈嚴重的社會問題。唔講唔知，我身邊好多親朋戚友都同我講患上了這種病，好想知我點樣好番……我只可以說除了睇醫生食藥，信仰也是其中一個令我病好的重要渠道。
若果只能夠用一個字來形容現階段的自己，那應該是「 funny」，因為 I try my best to be funny！我覺得開心好緊要，雖然，好多時得我自己一個的時候並唔係咁 funny，比較 dark side，但我唔開心的時候、失落的時候、沮喪的時候，都會畫畫或祈禱，藉此過濾負面情緒，希望透過神去 remind自己唔好再做傻事去傷害自己，請給我能量去 think positive。

人不理我　就當自娛

深藍色背心連身裙$52,000
Jil Sander from Lane Crawford

薛凱琪真的很愛講冷笑話。
為了原汁原味筆錄，以下隨機抽樣對話，平鋪直說。
事例一：影相期間，髮型師覺得鏡頭前的她頭髮亂了「要 touch一下！」，她會說「你結咗婚，唔可以隨便 touch我㗎噃……」縱然現場氣氛靜止得似日本漫畫情節般鴉雀亂飛沒人陪笑，薛凱琪也可出力的笑到青筋暴現，哈哈自娛。
訪問亦如是。
事例二：當問到女兒家夢想中的婚禮情景時，開頭兩句還算正經八八的說「我想要一個室外婚禮，最好見到日落。」以為伊人愛浪漫，誰知追問下去，冷笑話又來了。
「因為日頭好曬，我又容易吸黑，曬 20分鐘就已經好黑，連曬幾個鐘會變咗黑人，婚紗以外全部黑晒，咁會貨不對辦，所以為咗遷就 skin tone，最好 magic hour至開始……哈哈哈哈！」今回的冷笑話成功了，博得滿堂大笑，當事人更加笑到眼水狂標，真正的娛人亦娛己。
果然人如其詞：人不理我就當自娛，沉迷若叫人髮指，亦決不休止，亦決不羞恥，回收這心意。
領教領教。