BigBang演唱會最講噱頭，又扮外星人又做天使，仲出動埋高科技玩意，雷射槍、電動車等誇張登場。咁豐富，唔怪得連彩排證都叫價二千七，貴過頭等正價飛。

外太空

BigBang救世

2012年12月13日 ~~ 第1188期香港《壹周刊》

上月底 MAMA頒獎禮， BigBang唱咗首歌就收工，輕輕鬆鬆，隊長 G-Dragon仲有閒情同 Angelababy合照惹緋聞。一星期後，輪到 BigBang五子擔正開騷，原定只開兩場的香港演唱會，門票開賣一小時內，二萬四千張全數售罄。追加一場，最貴$1,680企位門票竟然被炒至過萬元，更有歌迷早三天排隊紮營，只為霸靚位見偶像。
BigBang點解咁紅？夠浮誇！五子齊齊從太空艙現身，成員之一太陽爆衫露巨胸、另一位大成則孭上天使翼。過萬歌迷 high到極點，仲有人暈低送院。好誇？揀正末日前開演唱會， BigBang在 MV聲言要用音樂打救世人。講到自己耶穌一樣，港女受晒。對，任何受歡迎的男人，講到底，最緊要都係叻吹水。

太空艙現身

一開場， BigBang五子由太空艙現身，意念夠科幻，氣勢十足。最突出係一頭紅髮的 G-Dragon，不枉他聲稱冒脫髮危險都要 keep住染髮。

玩雷射槍

單純吊威吔邊夠喉，勝利在獨唱環節帶埋雷射槍上台，唱完《 Strong Baby》再唱《 What Can I Do》，玩得仲開心過歌迷。

太陽連環爆衫

講咩都假，成晚高潮始終係爆衫。一向親民嘅太陽，喺獨唱環節明益 fans，唱唱吓突然自行扯爛上衣，女歌迷即時尖叫聲震天，好彩無落埋台，唔係相信連條底褲都不保。

坐位變企位

全場一萬二千名歌迷，齋對住開場 MV都興奮到大合唱，到 BigBang正式出場，個個狂揮舞打氣用的 BigBang皇冠燈，成晚無人肯坐低過。

隊長尷尬笑

平日 COOL爆的 G-Dragon，始料不及記者會上被追問到如何保養頭髮，尷尬到以笑遮掩。他坦言無護髮秘方，純粹為給歌迷新鮮感而不斷染髮。

BigBang母公司市值七十億

BigBang在 06年出道，成員包括 G-Dragon（隊長）、太陽、 T.O.P、大聲、勝利。其中 G-Dragon及太陽早在十二歲時便被經理人公司 YG娛樂選中，接受長達六年的嚴格訓練。 06年 BigBang在韓國首爾奧林匹克競技場舉行的演唱會上正式出道，一年後推出首張迷你專輯《 Always》，橫掃韓國樂壇多項大獎，包括首爾音樂大賞的「年度藝人」獎。
08至 11年間， BigBang成員多數各自發展， G-Dragon、 T.O.P等分別在日本出道，參與韓劇、日劇、電影演出，其間推出的新歌《 Love Song》 MV，短短兩日內網上點擊率已過百萬。到今年二月， BigBang舉行世界巡迴演唱會，更是首名登上格林美和 Billboard官方網站首頁的韓國組合。 BigBang的強勢，令母公司 YG娛樂股價暴漲，集資上市不到一年，市值已升至 1萬億韓圜（約 70億港元）。