CLOSE-UP

商標戰

2012年12月13日 ~~ 第1188期香港《壹周刊》

近年 IT界專利官司七國咁亂，過去兩年單是涉及 smartphone的專利訴訟金額已達二百億美元，日日都有新聞 update，好睇過「爭產」劇。
除了最受注目的 Samsung鬥 Apple，其餘大大小小商標官司多達幾千宗，好似 Apple去歐洲賣 iPhone 5，竟然要交專利費俾電單車製造商 Harley Davidson，聽落風馬牛不相及，認真 O嘴。究竟商標法點玩？今期解構過你知。

Apple中招事件簿

近年最多商標官司纏身的，一定要數 Apple，既是原告亦是被告，立立亂！

「呢個可能係全世界最貴嘅鐘！」
Apple擅自採用瑞士國家鐵路局的標誌性時鐘設計，作為 iOS 6時鐘式樣，被對方入稟控告，最後達成和解， Apple賠約 1.6億港元。

「 IQ題：到底一條線同一架電單車有乜關係？」
iPhone 5新插頭叫 Lightning，商標名於歐洲一早俾 Harley Davidson旗下間 Buell車廠登記，最終達成協議，俾 Apple同 Buell共用，但就無透露 Apple俾咗幾多錢。

「我哋真係賣生果㗎嘛，做乜告我哋呢？」
波蘭網上超市 fresh24.pl的 logo同 Apple相似，因而被 Apple告上法庭，不過 logo又不似蘋果，又無咬了一口，所以最終 Apple敗訴。

「呢次廣告費有排計囉！」
瑞士攝影師 Sabine Liewald一幅拍攝模特兒眼睛的作品，頻頻在 MacBook Pro廣告出現，事主正入稟索償。

強國㩒住搶

Apple話晒市值最高，點會唔惹人眼紅，其中強國人最落力，有少少關係都入稟，搏攞着數。

「一早知你會出 iPad啦！」
iPad一○年在內地開售，但商標早在二○○○年已被唯冠註冊， Apple結果要俾約 4.7億港元，買起商標。

「你有 Siri好叻咩，我夠有小 i機器人！」
上海智臻網絡科技公司認為 iPhone 4S的 Siri功能，與他們○六年推出的「小 i機器人」軟件相似，入稟控告對方侵權，正排期處理。

「釣魚台是中國的！國貨當自強！」
香港公司谷蜂手機搶先在內地註冊及推出外形同 iPhone 5一模一樣的 smartphone，講到明 Apple在內地賣 iPhone 5，就會起訴。 Apple今個禮拜開賣，有好戲睇。

「好用唔用，竟然用我哋公司名，梗係告你啦！」
主力賣清潔產品的江蘇雪豹日化，話 Apple Mac OS X Snow Leopard盜用他們的商標，入稟索償，好似太夾硬！

解構暗號

成日見到品牌名稱後加有特別符號，其實每個都有不同含意。

Registered
已註冊商標，俗稱「註冊商標」。

Trademark
正進行申請的商標，如兩年內沒有人提出異議，可以轉成正式註冊商標。

Copyright
受保護項目包括文學、音樂、戲劇、軟件及藝術作品，保護期為創作人逝世後五十年。

專利(patent)
針對保護任何可使用及製造的發明，而之前並無同類技術公開發表過，保護期二十年。

改名絕招

將「 O」字變成藍點，下面再加隻手指， Alan話更有「 TOUCH」的意思，撞商標機會亦大減。

講申請專利及商標，不得不提本地科研公司 Sengital，八年來推出過無數創新產品，包括機頂盒、遊戲機手掣、電子白板、相機遙控、 GPS組件等等，行政總裁林曉鋒（ Alan）話每年平均會申請八至十項專利及商標，差不多要花一百萬，「擺展覽最驚，好似最近喺秋季電子展租咗個攤位，每日都有好多人問產品原理，而且問得好仔細，後來有行家話其實佢哋係抄襲專家，去展覽會攞完料，就會返去出山寨貨，如果冇申請專利，俾人抄晒你都冇符。」
問 Alan申請專利煩定係商標煩，答案竟然是後者，「專利當然難，因為涉及嘅文件比較多，但只要將技術或者意念寫得清清楚楚，通常問題唔大。反而商標成日撞，每次都要絞盡腦汁諗計去避。」

文字變圖

有時要試幾次，轉大細楷或者加減空格，先可以撞中「處女名」。

「試過設計完數碼白板，覺得叫 DIGITOUCH最貼切，點知無論將啲字黐埋定分開，改埋大細楷，都俾人註冊咗，結果律師建議不如將其中一個字轉成圖案，成個圖案入紙申請，於是我將 O字加工成一個圓點，就申請到喇！」自始發現此招萬試萬靈，改名改到無頭緒，就會將字變圖。

香港行先

Google早前斥資約 975億港元收購 Motorola，就是睇中萬幾項涉及 smartphone的專利技術，減少買專利費用之餘，仲可以賣番俾人。

除了商標， Alan申請專利亦有心得，「如果件產品唔急住外銷，最好先喺香港申請專利，因為知識產權署收到申請，會先做一次全球性 patent search，確保其他國家冇類似設計或技術，先會批核；所以如果喺香港申請成功，之後再申請歐美地區專利，成功率就會高好多，否則去到外國先做 search，分分鐘撞咗，要再做幾次，用成幾萬蚊，價錢講緊係香港幾倍，好蝕！」 Alan話一定要直接搵專利律師，「第一次搵律師行轉介，埋單收我八萬蚊，第二次直接搵專利律師，結果只需四萬，足足差一倍！」

考 P牌

申請專利要等幾年，未必每間公司都等到，原來想短時間獲得保障，可以申請臨時專利（ provisional patent）。 Rehab-Robotics幾年來一直研究協助中風病人訓練肌肉的「希望之手」，今年四月中決定去日內瓦國際發明展參賽，臨行前三星期，先醒起一直無申請專利，行政總裁徐錦輝話，「當時先識驚，擔心參賽嗰陣俾人抄橋，但得番廿幾日，唔知點算。」
即時請教專利律師，先知美國原來有得攞「臨時牌」，「所需文件同申請正式專利冇分別，一樣要寫清楚成個專利嘅內容同涵蓋嘅技術，但申請時間短好多，而且只需一萬港元，攞到保障後，仲有一年時間俾你決定係咪申請專利，等你有時間考慮清楚，好靈活。」結果上機前收齊確認文件，可以放心參賽，「做科研已經用好多時間，如果要再等批專利，大家等到頸都長，先有新產品用。」
有辣有唔辣，「臨時牌」勝在夠快，但都有壞處，「如果中間有人抄你，你唔告得人住，一定要等正式專利批出，先可以開始告；好就好在有追溯期，追討嗰陣會計埋臨時專利期間蒙受嘅損失。」

成功考到專利「 P」牌去日內瓦參賽，徐錦輝最終擊敗 788個開發團隊，奪得全場最高榮譽的格蘭披治發明獎。

自訂車牌每年有接近十次拍賣會，價高者得，商標及專利就無得拍賣，通常由買賣雙方直接傾價錢。

內地對商標及專利的保護未夠完善，湖南長沙甚至出現過山寨 Angry Birds主題公園，徐錦輝話：「做潮流嘢容易俾人抄，專注做科研，情況可能會好少少。」

政府資助

成功申請到十五萬資助， Eric即時入紙在香港、美國及內地申請正式專利，而家等緊批。

Eric早前在 iOS推出社交 app Beyond SIX，同樣為公司的營運模式申請臨時專利，除了要鬥快，背後另有原因，「只要批出專利，就可以向生產力促進局申請資助，最多可獲批十五萬港元，足夠支付正式申請專利嘅費用。」資助規定每個人一世只可申請一次，可以幫發明家踏出第一步。

幾年先發市

九七年已開始炒域名， Kelvin當時諗住本小利大有錢途，「當年網頁興起，好多人都覺得域名有升值潛力，搏命霸域名，等人高價收購。」不過，十幾年過去， Kelvin話要靠賣域名發達，其實好難。「好似 YouTube、 Facebook，如果唔係有人做起個名，邊有人無端端走去買呢幾個域名返來擺？雖然每年俾幾十蚊註冊費唔算貴，但隨時要擺幾年先有人買，少數怕長計。」埋單計數， Kelvin話最高試過一個域名賣到三、四萬蚊，其中包括 sales.asia，至今手上仍有百幾個域名待沽，「不過通常幾年先有一單。」

Kelvin指出國際明星的域名都好有機會賺到錢，「近排爆紅嘅 PSY，好有可能會整個美國網站宣傳吓，分分鐘有錢賺。」

去亞洲域名爭議解決中心（ http://www.adndrc.org）可以睇到近年有爭議的域名同裁決，發現不少內地人雖然搶註香港名牌做域名，不過最終都要交番俾商標持有人。

簡稱有商機

霸域名另一個難度是要有前瞻性，不能等到其他人推出了專利產品，先註冊對方件專利產品做域名，「註冊域名時間一定要早過對方拎到產品商標，如果你見到件產品賣緊先註冊域名，就算俾你註冊到，但對方可以搵香港國際仲裁中心處理，有九成九案例都會將域名判番俾商標持有人。」反而留意出名網站的簡稱，都有機會賺大錢，「之前就有人睇準機會註冊 fb.com，一○年就俾 Facebook以六千幾萬收購，真係一朝發達。」

sedo是英國其中一個出售域名的網站，仲可以幫手搵律師查證擁有權同交收註冊資料，夠專業。

註冊域名後，年年都要俾註冊費，為回本， Kelvin將待沽的域名製成廣告網頁，靠廣告費回本。

高價圖利

雖然想靠域名發達，難度好高，不過近幾年都有不少天價收購域名個案，以下為五大最貴域名，俾你參考吓有無商機。

排名/域名/成交價/成交年份
1. insure.com/約$124,800,000/2009年
2. sex.com/約$109,200,000/2010年
3. fund.com/約$77,922,000/2008年
4. porn.com/約$74,100,000/2007年
5. fb.com/約$66,300,000/2010年

商標與專利

最多人關心，始終是 Samsung同 Apple的官司糾紛，幾年前開始於多個國家互告，中間互有勝負，範疇涵蓋硬件設計（長方形機身設計）、軟件功能（按兩下放大畫面）、圖像（圓角 icons），甚至背後的技術（ 4G LTE），告得就告。最震撼要數今年八月，美國法院判 Samsung敗訴，要向 Apple賠償 10.5億美元（約 81億港元），之後 Apple仲要求法院頒令禁止 Samsung於美國出售十二款產品，全面禁絕。
Apple可以如此高調，香港工業總會知識產權中心高級經理朱炳源話因為 Apple大把專利在手。根據世貿知識產權協議，成員國都需要遵守，「商標註冊登記後，保護期為十年，之後每十年續一次。不過，註冊商標，最重要揀啱種類，因為商標種類分四十五類，如果漏咗註冊又俾人發現漏洞，隨時俾人告，好似○八年 G2000因為喺內地買漏咗襪、圍巾、領帶類別嘅註冊商標，於是俾杭州個體戶趙華告上法庭，結果要賠二千萬人民幣。」朱炳源指出如果在香港註冊商標，可去知識產權署申請，費用為千三元，但保護範圍就只限香港。

Samsung同 Apple對簿公堂，之前在 San Jose開審，要用手推車先裝到所有同專利相關的法律文件。

入到大陸， Apple都要認低威，今年七月要賠約 4.7億港元俾手持「 iPad商標」的唯冠科技，先可以繼續賣 iPad。

朱炳源話香港申請商標註冊數量逐年增加，上年全年有廿七萬宗，今年截至十月已經接近三十萬宗。

有效年期

不同範疇，專利同版權年期亦不一樣，全世界有統一計法，部分要等作者死後一段時間先用得。

藥物
新藥可享廿年專利權，其間任何人不得擅自生產。

文學及藝術作品
作者死後九十五年，其作品版權將開放給公眾，任何人都可以免費使用。

錄音製品、廣播及有線傳播節目
版權在製成或發行後五十年屆滿。

電影
版權通常在主要導演、劇本的作者、劇本對白作者，以及電影原創音樂的創作人全部逝世五十年後屆滿。

福布斯每年會公布「最賺錢的已故藝人」，瑪麗蓮夢露今年依然以 2.1億港元排第三位，不過，明年是夢露死後第五十一年，部分作品版權會過期，「收入」有可能大減。

申請專利

分為標準專利及短期專利，在香港只能申請短期專利（標準專利須到內地知識產權局辦理），保護期為八年，費用為$823，需時約兩至三個月，但保護範圍只限香港。如果新發明或產品打算賣到外國，就要申請標準專利，按國家或地區須分別向內地知識產權局（約$4,000）、歐洲專利局（就指定聯合王國的專利而言，約$10,000）或聯合王國專利局（約$2,800）辦理，保護期為二十年。
知識產權署網址： http://www.ipd.gov.hk