曹永廉於《大太監》中飾演慈禧及李連英身邊經常周旋的人，他坦言接拍時既開心又緊張，而接拍前的一年多，他一直都甚少劇拍，更被派做兒童節目主持，阿廉坦言當時患上情緒病，要看心理醫生吃藥治療，情況更嚴重到經常想揸車撞埋山，幸而現時一切已有好轉。

曹永廉（阿廉）於《大太監》中飾演太監安德海一角，既是慈禧身邊得寵的太監，又是李連英的好兄弟，戲份不少，阿廉坦言接到消息有機會拍此劇時，既開心又緊張，他謂：「都幾大壓力，因為自己少拍古裝，角色上又多支線，所以做起上嚟都幾考功夫！自己都入咗行廿年，遇過唔少拍檔，不過黎耀祥、黃浩然、蕭正楠佢哋唔會有私心，拍嗰陣我不停問佢哋，佢哋又會不停教我，見到邊個做得好，我哋會拍爛手掌，大家感情好好，米雪姐亦教我好多，好似祥仔所講，拍完呢套劇有兩把刀咁！」

曹永廉指之前因工作、生活壓力大，因而一度患上情緒病。

主持兒童節目心淡

拍此劇之前，阿廉坦言拍劇機會不多，更有段時間被派去做兒童節目主持，非常心淡，更一度諗過離開此行，當時又有家庭負擔，阿廉不諱言曾有情緒病，要食藥治療：「以前入不敷支，欠銀行好多錢，拍《妙手仁心II》後幫我還咗啲債，希望今次《大太監》可以成為我第二個高潮。」問到他的經濟問題，他坦言：「太太冇怨言，佢唔會逼我；但自己屈咗咁多年，結果有情緒病，睇完心理醫生，食咗藥心情好咗啲。我嗰排事業唔順利，成日都想揸架車撞埋個山度，又成日飲酒，喺屋企都唔多講嘢，幸好自己都有一班好朋友，好似林文龍、唐文龍咁，會將唔開心嘅事話畀佢哋知，先冇咁大壓力。」

曹永廉於《大太監》中角色周旋於慈禧及李連英身邊，甚有發揮。

曹永廉與鄭嘉穎、黃智賢多年來一齊互相鼓勵，三人友情甚佳。

此外，現實中的阿廉與鄭嘉穎、黃智賢（Ben）都是好兄弟，三人相識多年，眼見兩位兄弟成績不俗，會否心有不甘？他坦言：「唔好話羨慕，係戥佢哋開心，希望有機會嘉穎帶埋我返大陸拍劇啦！」