漫遊毒物

《 DEAD OR ALIVE 5》水着 sexy lady

2012年10月10日 ~~ 第281期 Face

雖然香港已經入秋，但有性感靚女穿水着的話，當然百看不厭， Kasumi、 Tina等《 DOA》靚女今次唔打排球，重披戰衣喺最新嘅《 DEAD OR ALIVE 5》打格鬥！之不過，愛好「體育」嘅用家都唔使失望，事關今次隻 game勁多隱藏條件，除咗買限定版送 code之外，其實買普通版打多幾次爆機，都可以得到靚女嘅水着造型。好難打爆晒？唔怕！就等《 Face》同你一齊品評呢班靚女啲隱藏水着，夠唔夠 sexy先啦！

可愛女主角　 Kasumi

女主角 Kasumi穿起霧幻天神流忍術天神門嘅忍者衫大家都見得多，今次件粉紅色水着就改走可愛路線。
獲取方法：只要一打爆 Story Mode就會出現，絕對係賣大包。

熱情多粉絲　 Tina

論人氣 Tina絕不比 Kasumi差，而且筆者覺得 Tina真係好打啲，啲撻人技比 Kasumi硬淨得多！不過佢平時件戰鬥服都夠晒性感，所以件美國旗泳衣，可說係意料中事。
獲取方法：只要喺 Arcade模式，打爆 Master難度，就會出現 Legend難度，再一次過爆埋 Legend就得。

Cosplay至愛　 Ayane

同樣來自霸神門嘅忍者 Ayane，更係 Kasumi同母異父嘅妹妹。魚網絲襪同內衣，令佢引嚟唔少 cosplay迷扮演。今次件隱藏迷彩泳衣，襯上一頭紫髮夠晒 sharp。
獲取方法：用佢打爆 Arcade、 Time Attack、 Survival模式都可以獲得一件新衫。

導彈突襲　 Hitomi

修練空手道嘅 Hitomi，一向唔算難打，平時打架着牛仔褲加背心，只可說平易近人，但就冇乜驚喜。估唔到換上水着後，就見到迫爆身材，勁震撼！
獲取方法：用 Hitomi打爆 Arcade、 Time Attack、 Survival模式就可以獲得一件新衫。

Cool爆 sexy　 Christie

一頭白髮嘅 Christie，平時着殺手服 cool到爆，雖然拉鏈拉到好低，但略嫌包得太密實。所以換上泳衣感覺好似揭開神秘一面，而佢又咁啱揀上蛇皮圖案，睇落更 sexy！
獲取方法：只要喺 Time Attack入面，一口氣過晒 Legend難度先得到呢件泳衣，超難打。

脫去旗袍　麗鳳

玩太極嘅中國麗鳳，正常情況下都係着旗袍，雖然高衩，但都性感有限。好在有件隱藏花邊泳衣等佢着，如果冇個娘娘「 EAGLE」字就更型！
獲取方法：打爆 Arcade、 Time Attack、 Survival模式就能夠得到新泳衣。

玩法照舊囡囡主打

另一格鬥大作《 Virtua Fighter》主角結城晶來《 DOA 5》 crossover，雖然有八極拳超好打，可惜玩家們眼中只有水着女。

其實，不論係格鬥定打排球，大家對《 DOA》已經被一大班靚女所掩蓋。好似今次《 DEAD OR ALIVE 5》玩法照舊都係格鬥，逐 round將對手打贏爆機，最緊要睇準時機用拳腳駁招就得，唔似《街霸》有波動、昇龍之餘，玩法亦簡單得多。由於一眾女角當道，所以今次 TECMO明明找來《 Virtua Fighter》男主角結城晶來 crossover亦冇乜人理，冇辦法！男人嘅胸肌絕對唔夠女人嘅導彈咁有賣點。

玩後感：全力儲水着

唔只人物做得靚，其實每版都好有心機去做，好似呢個戰場版面，真係有飛彈炸埋嚟扣你能源。如果喺可玩性攞番個平衡，應更受歡迎。

貫徹過往風格《 DEAD OR ALIVE 5》喺畫面上仍然做得好靚，不論水嘅倒影同角色流汗特寫都做得好 detail。奈何玩法真係冇乜突破， Story Mode一路跟住 Kasumi查 DOATEC組織嘅秘密，似練功多過玩。所以玩家 focus都去晒儲水着造型，狂打 Arcade、 Time Attack、 Survival模式，隻 game好唔好玩，反而變成其次。

機種： PS3、 XBox 360
廠商： TECMO
類型：格鬥
人數： 1-4人
售價：$449（普通版）、$649（限定版）
查詢：智高（ 2418 8896）