漫遊毒物

生化危機 6　義無反顧玩快打

2012年10月10日 ~~ 第281期 Face

《 Biohazard》經過多代演化愈趨動作化，有部分 fans或者懷念以前古堡探索破機關嘅玩法，但慢吞吞打喪屍實在太落後。
最新一集《 Biohazard 6》決定繼續深化動作，加入飛身閃避加旋風腿等大量新招，一改上集企定開槍嘅緩慢打法。故事方面仲出動到
三主角加 Bio女神 Ada Wong重出江湖，舊 fans都一定被引到！即嚟搶試快打喪屍新體驗。

互動片段

真人示範 Bio6

機種： PS3、 XBox360
廠商： Capcom
類型：驚慄動作
遊玩人數： 1-2人
售價：$368
查詢： Capcom(2366 1001)

奴 Comment

上集我都有玩，係好掛住以前古屋嗰種恐怖 feel，但𠵱家主力同朋友上網合作打都幾有趣，希望佢之後可以出一隻舊式 Bio畀 fans喇！

娜姐？冰冰？ Who is Ada Wong？

今集最令 fans期待嘅，首選新 look示人嘅 Ada Wong，亦正亦邪嘅神秘身份加上同型男 Leon嘅感情線，令到佢一直人氣高企，《 4》嘅索爆高衩旗袍造型更係經典，周秀娜都扮過，如果想喺《 Bio6》用 Ada就要先打爆 3個主角嘅故事先，要見女神就要畀心機喇。

猛人卡士節奏明快

《 Bio6》故事發生喺《 Bio3》 10年之後，玩法上都 update咗，有好多動作新招， R1可以直接出腳玩體技。此外，系統上都有好多新方法幫你加快爆機，按 L2成個畫面會變 monotone，似足《普羅米修斯》入面啲 3D地形掃瞄，直接顯示你知向邊度行，而且地形幾暗都會睇到路，絕對唔怕盪失，爽係幾爽，但冇晒探索元素，質深機迷可能未必 like。

對住狙擊者仲好似 Leon咁傻仔企定開槍，死硬！旁邊個女仔就衝埋身，按 R1直接出腳玩體技，唔怪得《生化危機》電影係用女仔做主角，好勇呀！

戰場上有唔少位置係可以引發特殊攻擊，比如可以執起小喪屍放入微波爐入面叮！

按住 X掣跑會進入 free run狀態，遇到障礙會自動跳，追趕情節出現時似玩《 Uncharted》。

就連喪屍都活潑咗，會碌地避招，甚至會飛撲攻擊，唔可以再企定定射。

呢個 L2雷達偵測唔單只有箭嘴顯示去邊，仲會自動幫你個角色校正方向，打機白癡都唔會盪失路。

《 Bio6》版放冷箭

打爆晒《 Bio 6》 3個男主角故事，就可以開 Ada劇情。場景有初代《 Bio》 feel，武器為十字弓，武器幾有型，但新造型就冇咗中國風。故事中佢已經比《 2》出場時老十歲，但個樣仍然 young，係咪打 botox？

《 Bio4》冰冰旗袍裝

Ada呢個旗袍裝超級經典，李冰冰都算跟足，但係就有 fans話髮型肉酸。

《 Bio2》
初出場勁娘

於《 Bio2》初出場造型都幾娘，但憑住悲劇愛情線贏得 fans喜愛。

三個主角各有特點

今集節奏太似荷里活片一味快一味爆，冇晒初代《 Bio》 feel，好在故事都幾吸引。原來，世界各地忽然出現新種 C Vrius，於是 Chris同 Leon就各自追查事件源頭，終於喺香港撞埋一齊！此外，新主角 Jake更係不死奸角 Wesker嘅私生子，佢會喺北歐地區打喪屍，佢究竟係邪定正，有乜目的？都係《 Bio6》故事令人追玩嘅賣點！

Chris香港槍戰

Chris線講述虛構嘅中國城市「蘭祥」，敵人係有復生能力嘅生化武器傭兵，以槍戰為主，以香港為背景設計嘅城市睇落比《 Sleeping Dogs》更有真實感。

Jake東歐傭兵

Jake本身係東歐小國嘅傭兵，但發覺傭兵用嘅藥物令佢哋身體出現異常狀況，察覺到嘅 Jake決定同美國特工 Sherry一齊行動脫離組織，玩落其跳躍動作同潛入元素比其他 2條線較多。

Leon喪屍圍城

Leon係《 Bio 6》第 1個故事主角，佢會先喺中國打一陣（話晒係新賣點），之後就會以回憶形式講佢喺美國逃出總統府，成個城都受到神秘病毒侵襲，喪屍橫行，似舊時嘅《 Bio》。喪屍數量多，子彈數目亦比較少，經常要喺喪屍海中搵路逃生。

新操作要識用

C Virus喪屍唔再好似 4、 5集咁似正常人，有番初代嘅肉酸怪物 feel，而且仲幾有智慧，識得有組織咁攻擊，識噴口水、識跳，甚至開槍射你，所以難度都有番咁上下，唔想成日俾喪屍同你有肌膚之親，就要學識以下幾招又型又好用嘅新操作，練定自衞術包冇蝕底。
不過今集比上代更動作化，外國網民評價相當兩極，網站 gamespot更打出 4.5/10嘅不合格分數。不過記者玩落覺得佢幾有誠意，場景多、新操作夠流暢，好適合網上同朋友 Co-Op打。

無雙回旋踢

唔同上集，今隻唔使射中喪屍嘅弱點都可以直接按 R1出腳踢，初初玩你會覺得好勁好似打《無雙》咁，但其實係計體力嘅，亂踢好快就冇力。比較好嘅方法都係先用槍射中敵人嘅頭、手或腳先用體技。食回復生命值嘅藥草都可以回體力，千祈唔好慳。

R1旋風腿有樣好，就係一出腳就踢爆對手個頭，唔使再慢慢瞄準打 head-shot。

遇到背對住你嘅敵人可以直接按 R1暗殺佢，玩埋《 Metal Gear》。

擊中敵人弱點後再用體技會有特殊動作，例如搶佢武器再還擊，此時有無敵時間，要多加利用。

無敵碌地沙

今集瞄準中都可以移動，但其實行得好慢，用嚟避招一定趕唔切，反而要記住新操作緊急回避。按咗 L1「掹雞」之後再推方向←或→加 X就可以打橫打筋斗碌開，速度快避招一流，碌完之後會進入今集新增嘅仰臥姿態，一樣可以開槍同左右碌，推上掣好快就起得身，唔需要驚慌。

瞄準中都可以向左右碌，令到今集動作靈活好多，長期瞄準移動都唔怕。

緊急回避或者被敵人重擊擊中都會進入仰臥姿態，被擊倒時起身時間較長，好在同伴可以埋身救起你。

快射識追蹤

同時按下 L1加 R1可以省卻瞄準直接開槍，而且會自動瞄準敵人，不過連射能力差，面對突然埋身嘅敵人可以快射再用體技打飛喪屍。最實用嘅情況都係冇子彈時用刀仔快片， Jake嘅徒手攻擊用快射亦能達到最佳效果。

快射動作相當浮誇懶型，面對成村喪屍都有空擺鋪屎，真係服咗你。

用刀仔或 Jake嘅徒手攻擊時按 L1加 R1可以直接片，令近戰武器實用性大增。

同場加演
3DS漢化版 Biohazard Revelations

3DS同 3DSXL推出香港行版相信唔少人聽過，但應該幾難喺街見到，事關只可以玩香港區碼遊戲，暫時首發只有《 Mario Kart7》同埋《 Biohazard Revelations》兩隻 game，冇乜鋪頭夠膽入。不過隻《 Bio》係完全中文版，有齊中文介面及字幕，作為史上首隻漢化版都有話題嘅，但係部機都係睇吓日後中文 game發展如何先諗喇！

隻 game歐美日版今年 1月已經出咗，所以就算中文版吸引力都唔算太大。$349

同期落 game場睇吓，《 Bio 6》香港銷情真係唔錯，行家就話《 Sleeping Dogs》效應，有香港場景都好賣，初回限定件風褸一度高開$500。