以何種姿態登場，其實並不太重要，離場時還能保住氣度與形象，才是最考個人的修為。60歲的黃柏高，曾先後於華納唱片、正東唱片及金牌大風出任要職，每次皆好聚不好散；而這次離開由他一手創立的「金牌」前，冷板凳給坐了3年，英雄也有氣短時。


金牌經理人被迫入逆境，門前冷落車馬稀，好不唏噓。「咩人睇唔起你唔緊要，最重要自己唔好睇唔起你自己。如果我冇明天，你絕對可以睇低我，但我堅信自己有明天，將來仲會做得更好畀你睇！」今年待冷河一過，即鯉魚翻身，東山再起。這次他卻要豁出去，另創一番新景象：從電影至音樂、玄學家和運動員經理人、私人飲食事業，還自詡為「IT娛樂人」……總之，遍地芳菲。「個個都以為我離開咗舊公司，到家自由身，就會簽埋呢個嗰個，我根本連諗都冇諗過！我只係想做一啲新嘢畀人睇！……因為我嘅本命係『殺破狼』，要上戰場、要衝鋒，即係永遠要做新嘢！」魯迅說「第一個吃螃蟹的人是很可佩服的，不是勇士誰敢去吃牠呢？……像這種人我們當極端感謝的」，畢竟暮年烈士與識貨老饗，也真的不多了。

生氣不如爭氣


一切始於09年5月，一直掌管「金牌大風」的經理人與音樂事務的Paco，被擢升為「亞洲區主席」，處理電影業務，明眼人一看，分明狐死狗烹、鳥盡弓藏，失勢之說不無道理。加上鄭東漢、龐維仁兩代易主，去年他選擇離開，今年正式加盟「太陽娛樂文化」，職司董事總經理，這次不再為人下了。3年光景，起伏挺大。「當你睇番轉頭，其實唔係咩大不了。當你經歷緊，就真係好艱辛。」始終走出低谷、事過境遷了，今天他說來雲淡風輕。「好多人嘅眼光都覺得你『明升暗降』，就會有好多白眼㗎啦，好正常！
「其實在95年我仲艱辛，嗰一個浪仲大，我係一浪接一浪捱過嚟。」指的是當年任職華納唱片高層的他，與公司發生磨擦，而轉投當時新成立的正東唱片，但此一役，Paco捧紅了陳慧琳、楊千嬅等人。但錦上添花易，雪中送炭難啊！然這一次又嘗透人情冷暖吧？
「當然有，第一個（向我）雪中送炭就係李丞責。我冇問題㗎，睇緣分，你鍾意同我做朋友，我當然好開心。或者你覺得我冇利用價值，我亦冇所謂……你唔想見到我，咁大家咪唔好見囉！我又唔會講人壞話嘅。
「譬如我以前有100個朋友，在低潮時有70個走咗。以前我要用24小時輪到同佢哋食飯飲酒，咁家我就可以對剩低嗰30個朋友好啲啦！原來你覺得我翻唔到身、唔得㗎啦，咪唔需要見我囉，對我都好呀，我集中精神對30個朋友再好啲囉。唔係我篩選人，而係人哋自己走。
「當你係一個好鋒芒嘅人，飲醉酒時啲人會覺得『佢又有得醉喇，咁過癮』；但當你係一個失意嘅人，大家會話『你睇吓個醉貓，借酒澆愁』，都係同一個情況之嘛，但就有分別。你要話我借酒澆愁，我都冇說話好講，人哋眼光咁睇你，但我完全冇問題。我唔係一個living in the past嘅人，我唔會成日話你聽以前點威點叻，好同唔好都係is gone！我最緊要係明日，我明日會點好法，我做畀你睇。


「家我好滿足㗎，更加會明白珍惜生命、珍惜我得到嘅一切。我食一隻鮑魚又得、我食一隻鮑魚菇都得，睇你同咩人一齊食嘅啫。我唔會刻意話今日要食翅，你求其畀個例湯我，我都得嘅。」

敢為天下先
今天的Paco，當然繼續以往「金戈鐵馬，氣吞萬里如虎」的氣勢，繼續擔任經理人工作之餘，亦兼任Neway的音樂顧問。「我只會畀意見佢哋嘅歌星、同將會簽嘅新人，全部都係音樂上（的事），其餘行政上嘅事，我唔會去干涉，亦唔會去處理。我都冇時間！」正職當然是管理由澳門財團注資的新公司「太陽娛樂」，投資、監製、開拍電影；另投資協辦演唱會，「我唔係要做一、兩個成功嘅藝人……呢度有好多投資項目，譬如投資演唱會賺錢，唔成功就會蝕本，真係一盤生意嚟。
「呢3年過渡時期，我只係冇在音樂上作出過任何貢獻，但就做咗好多個人工作同意想唔到嘅事。我第一個得着就係（李）丞責。我們唔只係朋友，仲可以做合作夥伴……大家以為我作為李丞責經理人，就係幫佢客人book睇風水，其實我哋係將玄學develop為一門可以更全世界嘅生意……例如e-booking、手機app，呢啲我哋合作前都冇諗過。
「同時我又簽到一個全港最年輕嘅職業哥爾夫球手（廖樂天），我希望可以將佢打造成super idol，成為亞洲區Tiger Wood，如果成功塑造到大家好proud of嘅運動員，好似林書豪咁嘅話，我覺得自己都好大貢獻，哈哈！
「其實上天對我好好，畀咗個改變我，去做一啲從來冇諗過可以做到嘅嘢。我有好多時間去籌備我想拍嘅電影，卒之今年內全部實現。而製作音樂方面，我更加想建立一個改變大家、幫到大家嘅新平台嚟推動音樂。呢3年改變我過去10年做電影、音樂嘅睇法。我諗冇邊個音樂人嘅資歷、年份、仲高得過我？我係最早、亦係最後剩低落嚟（的音樂人），但我仲有新嘅衝擊、新嘅衝刺，我都覺得好神奇、好幸運。」


在席間，Paco不斷跟我強調：「你想同我合作，就唔好擺晒啲希望喺我度，自己又唔努力，又會自動得咗，在現實係冇可能。」那是因為大家都相信，貴為金牌經理人的他，可以化腐朽為神奇吧？
「千祈唔好咁諗呀！點解12年前我遇唔見周杰倫吖？可唔可以今日俾我再遇番周杰倫呢個金礦吖？點解大家梗係要我挑戰，將啲唔得嘅人交畀我嚟捧呢？哈哈……點解唔可以係「得」先搵我啫？點解唔可以畀最好嘅（人）我呢？我唔係神仙嚟嘛！點解要我做得咁辛苦？我唔鍾意做啲困難嘢㗎！」
自22歲擔任唱片店售貨員的Paco，跟本地樂壇結下淵緣逾30年，其中捧紅的歌星，從80年代的陳百強、90年代的許志安，陳慧琳及楊千嬅、至21世紀10年代的古巨基、方力申、鄧麗欣等，不勝枚舉。沒有點石成金之能，總不能常押對注吧？當中還有他自言「絕對是自己在音樂工作、經理人事業上最漂亮嘅一頁」的側田！
「咁佢（側田）係唱得好嘛，如果唔係我點可以咁做呢？如果佢唱得唔好，我又在紅館訂個演唱會俾佢，你係咪覺得我神經有問題吖？……咁有時我做嘢都唔跟傳統諗法嘅！我點解要跟人哋啫！點解我唔可以話你知咁做都得啫！我05年就做畀大家睇，未出唱片我就在紅館book咗期，有邊個會咁做？」

歌星只是我的同事
我問Paco跟旗下藝人的關係是怎麼樣的？真的一如他去年替無綫主持的清談節目《Paco的風花雪月》所言「會（把歌手）當成商品」嗎？
「我係從來冇用『仔女』嚟形容artist，我只會用『同事』！記者話『你啲仔女……』，我問『咩我啲仔女？啊，我啲artist之嘛。』大家合作只算係同事之嘛，我要強調番個公私分別，要公事公辦。但你問我會唔會放私人感情、會偏心？我都有偏心嘅，但我偏心一個人，係因為其他人做唔到佢做嘅嘢，而佢亦做唔到你做到嘅嘢，之間冇conflict。我唔會在同一個level嘅歌星入面，偏心邊個多啲，畀晒機會佢，我從來都冇咁做過。……譬如人哋係動作演員，而你唔係一個武師，你唔可以話我偏心佢囉。
「我一路都覺得我唔可以擺私人感情、或者作為朋友關係嚟合作，但經過咗廿幾年，我先知原來做錯咗！原來我多啲同人溝通、多啲同人食吓飯，對大家係有幫助㗎。唉，早知我以前就做多啲啦，唔係同人食餐飯就等於我偏心、或者等於同佢friend啲，其實都係睇你點處事啫。
「家大家相處會輕鬆番啲囉。如果因為你懶或者唔鍾意而唔做一啲工作，我唔會接受。但當大家分析咗……你講得出個理由，我咪接受囉。……以前我會用『強迫』，家我會畀你（了解）『清楚』。」

植樹者
Paco的辦公桌上放了一本Steve Jobs的自傳《賈伯斯傳》，誓言朝「IT娛樂人」身份發展的他，跟蘋果教主的遭遇倒也有點相似。創立的Jobs在30歲時被公司的其他董事解除業務職責，最後只能選擇離開自己一手創立的公司，直至過身前他還不時調侃自己：「我怎會被自己創辦的公司解僱呢？」不過最後被奉迎回朝，整肅一切。與其猜Paco也會不會吃回頭草，我倒不如了解一下何謂「IT娛樂人」。「我最想在全中國建立一個平台，在media方面，而實質內容要一年後先話到你知，到時候先會有嘢畀到大家睇。我唔想講，只想做畀你睇，到時候你一定會話『嘩，原來係咁?！』」Paco笑着對我大賣關子。 ####

 
我食一隻鮑魚又得、我食一隻鮑魚菇都得！

 
新人歌手陳僖儀是Paco旗下首位藝人，他說：「我會陸續簽一啲唱得好有styling、又好有character嘅新人。」《蘋果日報》圖片


今年Paco的新公司「太陽娛樂」除自資開拍3部電影外，亦有投資其他電影，包括上週已上映、由余文樂、舒淇主演的《情謎》。


自09年金牌大地震後，Paco被調往電影部，實權則旁落陳輝虹（左一）手上，至11年1月初，Paco亦與舊老闆兼拍檔鄭東漢（左二）向新老闆龐維仁（右二）呈辭。《壹週刊》圖片


Paco接管金牌電影部2年，都仍未有開拍過電影，但甫加入太陽娛樂，即為去年已上映的《戀夏戀夏戀戀下》任監製。《壹週刊》圖片


Paco創立金牌娛樂，捧起鄧麗欣、方力申和側田為年青人偶像，但自他失勢以後，各人不是約滿離便是過檔。《蘋果日報》圖片


96年Paco轉投正東唱片，先捧紅陳慧琳，到02年更任楊千嬅的經理人，把當時事業陷入低谷的她，重新打造成天后。《壹週刊》圖片


Paco因緣被華納唱片公司老闆賞識而擔任唱片製作，杜德偉（右）亦是他在華納工作時期所合作的藝人之一。





arrow
arrow
    全站熱搜
    創作者介紹
    創作者 stinglife 的頭像
    stinglife

    娛樂八掛大放送★

    stacylife 發表在 痞客邦 留言(0) 人氣()

    E-mail轉寄