○八年出品的電影《葉問》收旺場，帶挈演員人氣急升，並掀起一片功夫熱。長拍長有，繼《葉問前傳》後，正在籌備中的《葉問終極篇》亦計劃明年三月開拍，晚年葉問是有五呎十吋高，鬼鬼哋的黃秋生。與葉問外形不相符，但作為男主角大熱人選的黃秋生，已積極備戰，勤習詠春，更以檸檬水加辣椒排毒，節食、著膠衣焗身三招偏激減肥法，踢走廿磅，由高大影帝變縮水葉問。
隊酒減肥有後遺
年屆五十，開始出現中年發福的黃秋生，體重高達一百七十五磅，本來比標準體重只多十磅，但為求達到做晚年瘦削葉問的目標，他實行「非常」減肥方法，可望於明年《葉問終極篇》開拍前，減到一百五十五磅。早年黃秋生接拍《頭文字D》亦為火速減磅搵命搏。一日兩餐只食芽菜，每晚隊一支威士忌，加速身體排水，加埋每日運動一粒鐘，成功減去十多磅，但卻帶來胃病後遺症。「減完個胃好傷，花咗成年先醫番好。」秋生話諗起都驚。
辣椒檸汁排毒
銳意減走廿幾磅的秋生今次雖然不敢照辦煮碗灌威士忌，但他採取的方法同樣偏激。有指個多月前開始，他每日以檸檬汁加紅辣椒溝一公升水飲，飲足一星期，以此偏激方法幫自己排毒。對於此，黃秋生沒有正面回應。「我唔想講，因為我減肥方法係唔健康，唔想人學。鬼叫我係飲啖水都會脹番嘅人，為咗將角色形態發揮得最好，無辦法之下先會以地獄式減肥。今次我唔敢飲酒，但就狂節食，每日只食中午一餐，主要係白肉同菜，因為要戒澱粉質，所以一星期最多俾自己食幾匙羮飯，呢啲全部都靠意志。唔想忍得太辛苦，咪一個月『擦』一次焗豬扒飯，當係獎勵自己囉。減咗個幾月，依家減到落一百六十八磅，仲有半年時間俾我減十幾磅，應該無問題。」無啖好食之外，運動方面，秋生一樣將自己迫到極點。每日跑步半粒鐘，但他會著住件焗到爆的膠質運動衫，加速排汗。
有膽接無壓力
《葉問》內地票房億億聲，男主角甄子丹兩年唔夠，片酬由千五萬跳到三千萬人仔。珠玉在前，黃秋生接棒，竟毫無壓力。「無壓力噃！各有各做，投資者夠薑搵我，我咪夠膽接。由四十幾歲做到七十歲，當中講好多係師徒情義，動作場面同內心戲，我有信心應付得嚟。」《葉問終極篇》投資者，詠春正宗傳人冼國林，對大膽用混血樣的黃秋生做晚年葉問回應說：「其實仲有其他人選傾緊，都想過搵甄子丹同元彪，不過就以學過大聖劈掛，有功夫根底又有演技嘅秋生係最大機會。我哋想拍出葉問精神，所以外形似唔似唔重要。依家仲要等批文定咗，先至落實男主角。」
下苦功
以葉問傳奇一生為藍本的電影，雖出現三、四個版本，但每個飾演葉問的演員，都願為演活這位一代宗師，下番苦功。
《葉問》、《葉問2》甄子丹
宇宙最強甄子丹為葉問這角色，開拍前一年，專程造訪廣東佛山的葉問故居，做好資料搜集，苦練詠春，並與洪金寶鑽研招式，他曾表示，「學詠春不難，難在如何放下原本的功夫。」為演活葉問的書生味，他還忍口節食，清減近20磅。
《葉問前傳》杜宇航
杜宇航六歲習武，18歲成為最年輕世界武術冠軍。六年前拜冼國林門下，是葉準（葉問長子）徒孫，亦是詠春正宗傳人。08年甄子丹拍《葉問》，也搵過杜宇航做詠春顧問。去年杜宇航首次擔正演少年葉問，拳拳到肉，更邀得師公葉準在片中客串，真功夫無花假。
《一代宗師》梁朝偉
沒有功夫根底的梁朝偉，為演好葉問一角，09年隨五位師傅學功夫，包括跟葉問入室弟子梁紹鴻習詠春拳。偉仔試過與眾師傅對打練功時，遭踢斷左手手骨，要停工休息一個月，之後為免阻礙開拍時間，偉仔寧願忍痛，唔肯打石膏都堅持埋位。 ####
學過大聖劈掛的黃秋生，兩個月前開始跟詠春正宗傳人冼國林學詠春，加埋節食減肥，其身形明顯比之前消瘦好多，難怪是演晚年葉問的大熱之選。
去年發福年到半百的秋生，去年已出現中年男士的大肚腩，點知一年之內，身形可以脹完又縮。
狂操為咗可以隨時隨地練習詠春，他隨身帶住一個膠圈，方便練習圈手。
打完木樁的秋生仲打埋沙包練氣，積極狂操。
就算屬影帝級人馬，有機會接棒演葉問的秋生，一樣做足功課，買了大堆詠春書籍幫助揣摩拳法。
貴為葉問徒孫，冼國林（右）除是《葉》新片的出品人兼動作導演，據知他還考慮親演師傅葉準一角。 （《忽然1周》圖片）
膠衣包到冚
每日在跑步機跑步半粒鐘嫌排汗唔夠，早前花四嚿水買件全膠質的運動衫，由頸包冚到腳去跑，務求加大排汗量。經過個多月減肥，秋生已經減走肥腩，佢話褲頭都鬆晒。
《葉問終極篇》中，會有不少鮮為人知的師徒情義內容，其中當然不乏他與愛徒李小龍之間的點滴。
02年同契仔周杰倫拍電影《頭文字D》時，秋生為減肥每日狂隊威士忌，結果磅數係下降，但就減到胃都傷。
今年三十二歲的黃奕，有指她是《葉》片女主角，在戲中化老妝演葉問妻子。
留言列表
{{ article.title }}
