娛樂八掛大放送★

陳茵媺將筍盤陳豪私有化，外界反應全線唱好，唔關事嘅甲乙丙包括八珍，都希望「雙陳戀」快啲開花結果。
上個星期四（十月十三日），陳豪陳茵媺情侶檔合作新劇《天梯》開鏡拜神，二人一齊面對傳媒，雖然冇任何親密舉動，但八珍睇相，都feel到佢哋有幾恩愛，幾咁旁若無人。

上香拜神，陳豪同女友孖咇上，在場同劇演員加埋採訪記者，異口同聲笑佢哋十足拜堂結婚，雖然當事人唔俾反應，但就冧到連眼都曉笑。
化寶之後，見陳豪差啲踩到跌落地未熄嘅火，陳茵媺緊張到手口用晒，提對方小心。比起細心女友，陳豪都唔輸蝕，又攞生果又咖啡，雖然佢話啲咖啡係大家有份，不過，裝咖啡豆嘅密實袋就寫住「YEMEM」，所以，咖啡豆同咖啡仔，都係茵媺所有。
好老實，如果我係廖碧兒，此情此景，真係撼頭埋牆，呻笨！
####

好呀！幾時？（設計對白）
嫁俾我吖！（設計對白）

情侶檔上香，塘邊鶴個個笑似拜堂，陳豪陳茵媺齋笑唔敢駁嘴。

人多擠逼，陳豪左右開弓，為女友護駕。

陳豪差啲踩到火，陳茵媺手口並用嗌唔好。

例牌帶咖啡去開工，陳豪話大家飲，兩包咖啡豆，一多一少，多嗰包寫住「YEMEM」個名，明啦！

蘋果橙太普通，陳豪將桃駁李分俾咬緊蓮霧嘅陳茵媺，身邊張可頤只有靠自己。

陳總重掌大權，有份做《天梯》PA嘅崔建邦繼續留喺TVB唔去Now。