娛樂八掛大放送★

早排播完嘅《潛行狙擊》收視口碑雙贏，無綫高層梁乃鵬即刻做嘢，响電視城設宴慰勞台前幕後，連陳志雲樂易玲都嚟黐餐，鼓勵員工士氣。劇中憑Madam Jo角色成為今屆視后大熱嘅陳法拉，難得一次過見到三大高層，當然要逐一招呼落力為自己拉票。

盛傳陳法拉一直係「迷雲黨」成員，自從發生陳志雲貪污案，醒目女即刻跳槽投靠樂易玲。點知時移勢易，陳志雲單案雖然仲有手尾跟，但依然係六嬸方逸華至愛，要討好兩大高層，陳法拉握手攝位吹水樣樣做齊，仲帶埋私伙相機幫梁乃鵬影相留念，果然係世界女。漁翁撒網鞋油唔怕多，最緊要用得其所，相反，《壹》仔就冇咁好彩，明明兜口兜面俾Neway新抱三鞠躬家屬謝禮，點知陳法拉做咗唔認數，八珍自問同《壹》仔都冇薛少奶咁好「戲」，唯有祝佢早日捧走視后！ ####

家屬謝禮噃！（設計對白）記住俾一蚊！（設計對白）

攝靚位樂易玲原本同黃宗澤徐子珊傾得好地地，企後面嘅陳法拉，突然夾硬攝埋嚟加把嘴，旁邊嘅謝天華都唔敢行埋去，證明面皮唔夠厚。

四萬口各人埋位影大合照，陳法拉笑到四萬咁口，截住陳志雲握手打招呼，醒目！

同樣係視帝大熱嘅謝天華，只係幫高層斟吓酒，擦鞋點到即止，唔及陳法拉咁落力。

扮龍友

陳法拉攝正樂易玲梁乃鵬中間祝酒，之後又攞部私伙相機出嚟，幫梁乃鵬影靚相，好識做！