名、利、伴侶、親人、仔女、自己，細想一下，到最後其實統統都無關痛癢，光陰流逝，所有事都只是過眼雲煙。
但對蔡楓華（Ken）來說，要活着，為的就是要追回昔日浪費了的光陰。
因為「四大癲王」時代，很多同事問我到底蔡楓華現在瘋不瘋和燶不燶？
是的，光陰過去、機會流逝，永不會再回頭，要追回來更是難上加難。
「我曾經係五棲藝人，歌、影、視、播樣樣有我份！」雖然數來數去其實係得四樣。
從前種種
蔡楓華的說話中，最讓我印象深刻的是「never too late！」這一句。
「終於再開演唱會，有人問我年紀大喇，仲得唔得？我話never too late！唱得幾耐得幾耐啦！我不信命運，我也不是不幸，很多事成功定失敗，都是人為的。」
講得出這樣一番話，此所以我相信蔡楓華不再站在以前的位置，可以從「四大癲王」中除名。
「過去的事追唔番，光陰過咗去就過咗去，我落後咗，只想迎難而上盡快追上去。從前的事我不想提了，現在最重要是做好演唱會，做完演唱會之後再說吧！」
蔡楓華自言18、19歲就入娛樂圈，年紀輕就是衰在做人太直率。
「我一生人都好直率，我不是奸詐，以前做藝娛圈要假面具，我唔識，但係我冇做錯！」
「最唔好就係缺乏經理人同公司，就算有market都失晒機會。好多當紅經理人我都識，只係今時今日我梗係冇資格同人傾啦！但係若果有人幫我少少都好，就算係佢冇時間，可以搵下面啲人幫我都好呀！」
時代轉變，當這位第一代主持人重上《勁歌金曲》，更有fans現身支持。
「好感動，真真正正第一次有fans現身支持。當那一刻有位電視台攝影師同我講『唔緊要，阿Ken向前望就得！』，好多事即時湧上心頭，各種回憶一齊衝出來，我真係好感動。」
決心事成
蔡楓華說自己的星途是史無前例咁奇怪，能夠令他支撐到現在的惟有親情：
「50歲喇，人生有幾多個十年，浪費時間，但係經歷了很多事，我媽媽從來都冇責怪過我一句，所以我話世界最寶貴就係親情。」
「從自立開始從來冇要過阿媽養，佢今年八十幾歲啦！我一向都係靠積蓄，靠慳來維持生活。」
「做人不過係為兩餐一宿，我一日食一餐都係為減肥，做藝人最好就係食唔飽瞓唔夠，咁就代表佢紅，我以前都試過咁嘅日子。依家就唔係喇，日日都休息充足。」
「我一簽好約就打電話畀媽媽，話畀佢聽我再開演唱會，媽媽好開心咁話希望我『一直唱落去、一直唱落去！』。我今次請埋媽媽來聽，哥哥、姊姊、妹妹都請，希望可以一家人一齊開開心心。」
絕對空虛
蔡楓華曾經說過，對他最具傷害性的事，其實是十多年前與女友分手。
「本來已經準備結婚，係一段非常好的感情，突然之間因為有第三者出現而分開，我都只係一個普通人，係好hurt。」
「十零廿歲白馬王子形象時，我想講畀人聽我拍拖都唔得，拖住女朋友行街要分開隻手你話慘唔慘？試過有老闆見到我女朋友，即刻面都黑埋啦！
「我知道做藝人一定要留些幻想畀fans，好似劉德華結咗婚都咁避忌，我明喎！但到依家我想拍拖、恨拍拖咁又可以點？搞好事業先啦！我都希望我有老婆仔女呀！但我冇吖嘛！」
Fit馬王子
製作公司更特別為他準備了十多副黑超替換，不過Ken就只鍾情於拍攝海報的一副，點都唔肯換。三月開演唱會門票銷情極理想，初時Ken還滿淡定的說：
「我唔會理賣得幾多（門票），最緊要只係最好自己本分，唱好歌。」
但當知道第一天開賣就全部售罄之際，Ken即時開心得與工作人員擁抱。「我一個大男人，三十幾年冇喊過，真係忍唔住！好開心！好開心！」
恩重如山
這次蔡楓華能夠重出江湖開演唱會，最要多謝的當然是他的好朋友孫敬安、盧敏儀夫婦，Ken以「恩重如山」來形容這兩位他認識了三十多年的朋友。
「錢我好滿意，仲有bonus添！孫生直頭係我話幾多就畀幾多。」
訪問開頭我問Ken的第一個問題，就是你覺得自己：「黑仔嗎？」蔡楓華沒有回答。但他有這樣的朋友，在落魄潦倒廿年後，還出錢出力來幫他開演唱會，蔡楓華無論如何都不算是黑仔到尾的人。
留言列表
{{ article.title }}
