彭家麗的心願是在紅館開騷，當年認為自己不適合娛樂圈而退出，十多年後再次被認同，她說很希望夢想成真。
搜尋氣
走音主席合唱爆 hit 淡定彭家麗：有咩對手未見過！
彭家麗沉寂樂壇 15年，多得近日她與走音主席合唱〈從不喜歡孤單一個〉的片段在網上瘋傳，當然爆笑點是那位朱主席勁走音的歌喉，亦令彭家麗的名字再度 recall，網友激讚她處變不驚、唱歌有專業水準，好過好多歌手等等。
其實 44歲彭家麗並未言休，十多年來不斷教唱歌和登台演出，正如她所說真係「有咩對手未見過吖？」比起摸手摸腳跟蹤騷擾，走音只係雞毛蒜皮。
好多謝咁多人讚！其實教唱歌十幾年，又喺香港、內地登台咁多次，場場都會合唱，有咩對手未見過吖？通常唱之前都唔會考慮佢哋唱成點，不過今次阿主席比較多甩漏，所以打醒十二分精神，有啲位佢冇唱到我 pick up番囉。
呢十幾年教唱歌都遇過驚險事，以前開唱歌學校，有個男 fans成日寫信畀我，後來嚟學校送花，我唔知係同一個人，佢突然捉住我隻手，我即刻衝入班房，同個秘書拉住道門，佢喺出邊鬥力，好驚好驚！報咗警但因為佢冇傷害我，只係出咗禁制令囉！之後我改咗私人方式教，熟人介紹先教囉。
我一路都好鍾意唱歌，𠵱家比以前活躍時更鍾意添，因為教咗咁多年會口痕嘛，而且人生經驗豐富咗，演繹會好啲；以前覺得努力同成果唔成正比，心灰意冷而唔再唱歌，諗番轉頭，以前好似冇 enjoy過個做歌手嘅過程，好想再經歷吓。
呢件事之後真係多咗回響，最近已有朋友 send歌畀我喇，有機會我都想繼續唱，其實之前亦傾緊間唱片公司，希望出番碟。
有人話樂壇已死，我覺得𠵱家樂壇有啲歌手幾好吖，好似欣宜、 G.E.M.同林欣彤都唱得唔錯！容祖兒啲歌，我登台時都會唱；欣宜咬字好好，我教唱歌都好著重呢方面，有啲歌手唱得好但咬字唔正。呢班後生女有排唱有排玩，我都希望啲唱片公司老闆簽啲有實力嘅人，撐住個樂壇。
8月初彭家麗與「紅日娛樂」主席朱壽仁，在灣仔修頓球場合場〈從不喜歡孤單一個〉，朱主席走音甩 beat嚇壞人，卻沒有嚇窒彭家麗，超水準表現獲網友大讚。 
94年蘇永康和彭家麗合唱〈從不喜歡孤單一個〉橫掃多個獎項。雖然彭十幾年冇出碟，但她除了往內地登台，亦在東南亞走埠。 
去年簽約王維基的香港電視，以拍劇為主，彭家麗說：「我想試吓拍打戲，我學過大聖劈掛㗎！」真係估佢唔到。
採訪、撰文：何志衡
攝影：賴穎雋
留言列表
{{ article.title }}
