港姐冠軍張名雅被吊到 3層樓高又要快速做出轉圈動作，全程只靠一條絲帶支撐身體，仲要靠手臂扯實絲帶，冇威吔又冇安全措施，手一滑後果不堪設想。
真面目
冇命賠 吊高 20呎 冇威吔冇墊 TVB收買港姐命
一年悶過一年的《星光熠熠耀保良》上週六（ 22日）舉行，埋單平均只收 16點，比起前週播《造王者》大結局時段，急挫 13點；今年更由紅館轉移至將軍澳電視城，場租慳番一筆。
無綫出名慳皮，用人則使到盡，今年《保良》騷忽然安排三位出爐港姐表演凌空「絲帶舞」，被迫在冇威吔又冇墊的情況下，靠條絲帶吊高 20呎又轉又跳，最慘係班港姐得 3日時間練習，上速成班又冇安全措施，難怪連冠軍張名雅亦呻：「綵排時真係有唔舒服。」
應屆港姐三甲張名雅、 黄心穎及朱千雪當選後，首次出席大型慈善活動，今年港姐先搞單 hang機事件，結果張名雅 0票當選爆，據知無綫綜藝科總監余詠珊為重振港姐聲威，實行力推 3女作高危演出，雖然最初提議的「踩鋼線」行唔成，卻換來另一驚險的空中絲帶舞環節。
轉足 10圈
轉咗大約 10個圈，張名雅終於鬆綁，慢慢放番落台。
落地見頭暈
一到地，張名雅都要幾秒先企得穩，雖然仲暈暈哋，但佢依然保持笑容。
凌空拗腰
季軍朱千雪要空中拗晒腰，都係靠條絲帶借力。《蘋果日報》圖片
懸垂倒掛
學咗 12年中國舞的亞軍 黄心穎先後表演一字馬及倒吊，瞓身演出後仲話完全冇難度。《蘋果日報》圖片
半空做體操
今年 24歲的張名雅身材一般，除了是非多，表現一直平平無奇，忽然爆冷奪后，令網友質疑賽果。
當晚（ 22日），三名港姐在名為「絲情畫意舞翩翩」的環節出場， 3人分別於半空中表演旋轉、一字馬及凌空倒掛等動作，全場睇到拍爛手掌，但實情係港姐們被吊到離地 20呎的半空中又扭又轉，但全程只靠兩條絲帶「吊」命，無綫又安排「是但」，三日前才讓全冇雜技經驗的港姐們開始練習，簡直搏命過特技人，不過無綫連「吊港姐」籌到幾錢都冇公布，真係搏得唔抵。
得三日練習
無綫綜藝科總監余詠珊喺 TVB舉足輕重，是次港姐表演項目亦有份參與畀意見。《蘋果日報》圖片
表演完畢後，氣都未唞順的張名雅說：「公司有幫我哋買保險，但係綵排嗰時真係有唔舒服，仲轉到想嘔，之後食咗止暈嘔藥再轉就好啲。」對於班港姐要搵命博，無綫外事部總監曾醒明說：「我哋一定會同佢哋額外買全保，有咩意外都會保到。今次呢個項目我哋搵咗專業人士楊盼盼小姐做指導，跟佢專業意見去做，絕對安全。」但楊盼盼週一（ 24日）則在電話中說：「唔係我訓練㗎，只係之前喺另一個會議度提出過不如試吓呢啲動作。可能 TVB搵咗另一啲專業人士訓練佢哋啦， TVB一向都係得幾日練習，咁個表演冇想像中咁危險啫！」人命攸關，冇得是但喎！
亡命換民望
今屆港姐無綫學人玩一人一票直選，結果發生爆 hang機事件後，由張名雅奪后，可惜賽前張名雅背負名導演張堅庭外甥女身份，加上賽前又被爆於加拿大愛溝仔兼疑似加工，結果令張名雅民望拍得住狼振英。
《耀保良》表演完後，張名雅（紅圈）於 TVB門外應酬一班 fans，之後再截的士返回大圍豪宅名城。
返名城
《蘋果日報》圖片
曾於加拿大新時代衞視擔任節目《熒幕八爪魚》主持的張名雅，被網民起底話佢靚樣大改造，又話佢喜愛夜蒲兼狂仔，是非一籮。
玩高危易出事
TVB籌款騷經常有歌手藝員做高難度表演，可惜往往因綵排時間不足，亦曾發生不少意外，今次喺保良騷三位港姐「吊高絲帶舞」，有驚無險咪算好彩囉！
張栢芝
飛車險變癱
《忽然 1周》圖片
02年栢芝為錄影《慈善星輝仁濟夜》飛車項目時，出意外受傷，險些變癱，需入院留醫 17日。
鄭希怡
傷腰爆
《蘋果日報》圖片
06年始連續多年為《歡樂滿東華》作高難度表演如「飛簷走壁」及「空中飛人」等，除了曾因飄移項目而引致腰傷外，其中 06年跟錢嘉樂表演空中飛人時，褲子忽然滑下露出 T-back，爆全城。
江若琳
下體作痛
《蘋果日報》圖片
10年為《歡樂滿東華》表演徒手拿着絲帶凌空跳舞，表演完後，疑因絲帶綁得下體太緊，江若琳大呼下體隱隱作痛。 
留言列表
{{ article.title }}
