馬德鐘同太太一齊剪綵，又邀請了大班圈中人撐場，人面極廣。《蘋果日報》圖片
真面目
老婆話事 靠晒外家 馬德鐘冇股份扮鋪王
自從去年 11月發生橫店狼啜陳嘉桓事件後，形象大跌的馬神（馬德鐘）近月積極洗底，高調同前 model、現為大學講師的老婆張筱蘭晒恩愛。
婚姻冇問題， 44歲馬神可以專心搵錢養家，除了密密北上拍劇賺人仔，更打算轉型從商。早前馬德鐘出席一家具店開幕，聲稱該店與哥哥合股，更投資全副身家買入相連鋪位，非常豪氣！不過本刊發現，無論家具店或鋪位股權，均沒有馬德鐘名字，反而他妻子張筱蘭與胞兄夫婦一同買樓開公司，靠晒外家。
2千幾萬間鋪都唔落自己名？馬神投資得好低調喎！
曾經幾度傳出離婚的馬德鐘與太太張筱蘭，近年感情愈來愈好，兩人經常唔怕肉麻在微博調情，即使發生橫店雙狼事件，張依然第一時間撐老公，更罕有地孖住接受週刊專訪，兩夫婦一齊解畫。
「快意」（ Finest）位於尖沙咀的鋪位以 2,600萬買入，物業由張明國及梁翠蓮各佔一半業權，兩人另外還持有 4個物業，共值約 6千萬。
見馬神巡鋪
「快意辦公室傢俬」位於尖沙咀漆咸道南，樓高兩層，主打寫字樓枱凳。店中的寫字樓凳全由外地入口，價錢由 1千多至 7千不等，職員強調大部分產品由著名設計師設計。
店內有多名職員駐場，其中一名女員工表示知道馬德鐘有份投資，間中都會見馬神巡鋪。
店內擺放了多款辦公室家具，圖中的塑膠椅由意大利入口，約 1千多元，價錢合理。
馬德鐘近月高調與家人出席公開場合， 14歲兒子生得高大靚仔，更識法文、跆拳道及 4種樂器。《蘋果日報》圖片
現於上海拍劇的馬神，據知約收 10萬人民幣一集，吸金力強！
自爆買鋪
老婆投信任票，馬德鐘亦不敢怠慢，戒掉夜蒲努力做住家男人外，又着手搞生意搵錢養家。
正在上海拍新劇《同一屋簷下》的馬神，上週日（ 16日）帶埋老婆及 14歲囝囝馬在驤，為尖沙咀一間名為「快意辦公室傢俬」開幕，當日馬以主人家身份剪綵，聲稱 瞓晒身投資該店，「哥哥做 咗 20年，係做原創設計 嘅寫字樓傢俬，下一步會喺天津開分店。今次我連買兩個地鋪，全副身家投資晒落去，可能做埋代言人。」
外家投資
今年母親節，馬德鐘特登由內地趕返香港陪外母過節，可見馬神與老婆的家人關係良好。
講到似層層，但有傳家具店並沒有馬德鐘份，而是由張筱蘭家人擁有。根據資料顯示，「快意」由「萬廣國際有限公司」全權持有，而市值約 3千萬的尖沙咀鋪位業權則由「天昇有限公司」擁有，兩間股東同是張明國及梁翠蓮，其中梁與張筱蘭一齊開公司，去年合資以 1,420買入屯門榮華花園獨立屋，兩人更報住同一地址。
口供與事實不符，本刊週一致電馬德鐘，他強調確實有份投資，「間鋪係我太太嘅阿哥同阿嫂名，佢哋喺呢行做咗好多年，而我同佢哋亦做咗廿年屋企人，所以好信任佢哋。其實我今次真係全副身家放晒落去，至於出咗幾多錢就唔好講喇，我哋協議咗要保密，但好多謝大家咁關心我！」
勁賺 610萬
馬神一直與老婆兒子居於西貢寶珊苑，單位 04年以 410萬買入，剛於上月以 1,020萬賣出，賬面狂賺 610萬！
寶珊苑由馬德鐘與張筱蘭聯名以公司名義買入， 8年賺 600萬。《蘋果日報》圖片
張筱蘭去年與大嫂梁翠蓮以 1,420萬買入屯門榮華花園獨立屋，兩人均報住寶珊苑地址，不過馬德鐘又冇份！
真鋪王
馬德鐘自稱一口氣掃入兩個鋪位，但物業並冇馬神名，極其量只係掛名鋪王。其實娛樂圈有唔少真正鋪王，用 嚟收息錢滾錢，好過日捱夜捱做餐死。
5鋪揸手
謝霆鋒
05年以 2,080萬買入擺花街壹號廣場 6至 8號鋪，今年再買入 26號鋪，又獲老闆楊受成送贈 28號鋪， 5鋪總值約 5億！
買鋪收租
古巨基
今年 5月以 5,400萬買入擺花街 22號鋪位，單位現時丟空等放租，租金市價約 12萬。
炒賺過億
留言列表
{{ article.title }}
