CLOSE-UP

炒股秘 apps

2012年12月27日 ~~ 第1190期香港《壹周刊》

大量熱錢持續湧入，推動港股愈升愈有，唔少分析員都話，嚟緊兩三個月仲係入市好時機。打算瞓身 all-in又好，小買賺茶錢都好，都要時刻追貼股市行情。
今次搵嚟幾位投資專家，話俾大家知邊啲免費網站同 apps最實用，有錢齊齊賺！

胡孟青(青姐)
獨立股評人，於多份報章撰寫財經專欄及主持財經節目。
推介：鉅亨網、和訊網、大智慧

鄧威信(Wilson)
新城數碼財經台總監，博覽本地同外國財經消息。
推介： Google Currents

利世民(Simon)
報章財經專欄作家，亦係研究經濟政策嘅獅子山學會創辦人之一。
推介： ZeroHedge、 Seeking Alpha

平時搵財經專家同股評人，多數叫佢推介股票，今次轉話題講點用手機搵料，三位行家即時傾到雞啄唔斷。大家齊心一致推介財經網站 Bloomberg，青姐同 Wilson話資料又新又齊， Simon大讚：「 iPad版介面靚到爆。」青姐仲話睇 Bloomberg，最好睇埋中文版，因為有更多內地國情，例如之前十八大、老人社福等話題，都有講到。

網誌氣候

除咗睇大路網站， Simon亦會睇埋外國財經 blog，好似 ZeroHedge同 Seeking Alpha寫嘅 blog容易追貼大方向，「 blog裡面有好多分析同留言，容易睇到呢期話題，對於價值投資好有用，例如今年九月 Apple股價首次升穿七百美元，有財經專家誇張到睇好佢會升破一千美元，不過成班 bloggers都睇淡， iPhone 5又冇突破，眼見好多人都轉用 Samsung，已經預計股價到頂。」（編按：上星期 Apple股價跌至約五百二十美元）。
青姐就認為路透社、《紐約時報》網站都要睇，「《紐約時報》中文版翻譯唔錯。」 Wilson突然插口問大家有冇用 Google Currents，仲即時 demo將《華爾街日報》、路透社同《紐約時報》等等十幾個財經網站新聞擺晒入去，搞到青姐同 Simon齊齊讚好，仲話轉頭會即刻裝。

http://www.bloomberg.com
Bloomberg集合各地金融市場資訊，全球有近 130間新聞分社，係金融從業員必睇網站。

http://www.zerohedge.com
提供大量經濟分析係 ZeroHedge嘅賣點，唔少財經報章雜誌亦會喺呢度搵料。

內地推介

至於大陸股票行情，青姐認為「鉅亨網」、「和訊網」同「大智慧」推出嘅手機 apps都唔錯，「呢三個網站嘅文章相當有參考價值，出街睇好方便。另外，玩開外匯投資嘅話，就要睇德國《明鏡周刊》（ Der Spiegel）英文版，分析同評論都好中肯。」講吓講吓，三位由交流財經 apps變成講行內秘聞，內容梗係唔會話俾記者知，青姐仲好鬼馬咁話：「咁樣收風好過晒所有 apps！」

「大智慧」、「和訊網」同時提供 iOS及 Android版本，而「鉅亨網」則只有 Android版本。

用 Google Currents可以集合多個新聞來源，毋須逐個 app開嚟睇。

數據從何來

雖然電視台都用 Bloomberg嘅資料，但都會自己再做後期，令每個節目顯示嘅圖表都唔同。

每朝開電視睇財經節目，主持人㩒兩下就睇到股票報價同圖表走勢，究竟數據點得嚟？其實係由大利市報價系統，實時連接香港聯合交易所伺服器攞數據。圖表同分析工具，就靠 Bloomberg、 AASTOCKS等公司製作。

即查佣金

http://calc.waylonchan.net
有齊全港 45間銀行同證券行收費，其中以工商銀行（亞洲）最抵。

每次買賣股票，都要俾印花稅、交易所徵費同埋佣金，到底幫襯開嗰間收費算唔算貴？邊間先最抵？可以參考「股票交易計算器」網站，或者安裝港股交易計算手機 app，入面有齊銀行同大部分證券行嘅股票買賣收費資料，只要輸入預計買入價位、賣出價位、股數及手數，就即時計出唔同公司佣金同存倉費，一次過格晒價。
keyword
iPhone•香港股票交易計算器/ Android•港股交易計算機

追貼美股

每朝六點幾就要揸車返電台準備開咪， Dickie全程開着手機，收聽最新美股消息。

黃德几(Dickie)
金利豐證劵研究部董事，香港國際專業學院金融分析技巧證書課程導師。
推介： CNBC、 Bloomberg、港交所

係人都知要預測港股開盤走勢，一定要睇前一晚美股表現，如果好似 Dickie主要玩早市，就更加重視美股新聞，「我每朝七點就喺港台開咪，如果仲講緊前晚美股消息，實俾聽眾笑死，所以我每分每秒都要 keep住 update。」 Dickie會安裝 CNBC免費手機 app，方便即時追蹤各路行程，「呢個 app最大好處係有推播（ push）功能，美股一有新消息，系統就會自動喺手機顯示，唔怕有甩漏。」
的而且確，同 Dickie做訪問，全程雙眼都冇離開過部手機，因為除咗睇 CNBC，佢仲會𥄫住 Bloomberg新聞，仲撈埋短片汁，「但凡財經人都會睇 Bloomberg，不過收費成 1,500美元一個月，小股民唔會幫襯，反而應該裝官方嘅免費 apps，雖然比起收費版少好多專業投資分析工具，但就有好似動新聞嘅短片報導同股評，我而家每日揸車返工都會開住嚟聽，慳番唔少搵料時間。」

刨埋港交所

除咗兩個外國 apps， Dickie話股民要喺開市前收料，就要睇埋港交所網站內嘅「披露易」，事關每日都會喺開市前公布唔少上市公司嘅消息，例如盈警盈喜，又或者股權變動，「雖則話開市後有好多因素影響股價變動，但股民可以參考定呢類資料，開市後有異動，都約莫知道發生緊乜事，再決定追貨定止蝕。」

對應機款： iOS、 Android

除咗推播功能， CNBC報價功能亦相當齊全。

對應機款： iOS、 Android

App版 Bloomberg內有齊當日主要新聞嘅短片， Dickie話好處係更新得超快。

http://www.hkexnews.hk
好多人會忽視披露易嘅資料，但其實呢啲資料對分析個股開市走勢相當重要。

短長任玩

開咪前， Kenny會用 iPhone睇股市變動，取得第一手資料。

鄧聲興(Kenny)
尚乘財富策劃有限公司證券業務部總經理、中國人民大學金融與證券研究所香港首席研究員、香港專業財經分析及評論家協會副主席。
推介： AASTOCKS、經濟通

短炒宜睇 AASTOCKS

平時電台聽眾最鍾意叫 Kenny俾「冧把」，今次叫佢推介炒股 apps，都冇托手踭，仲話根據個人投資心態，可以搵唔同 apps幫手。「小股民短炒即日鮮，不外乎跟大隊買當頭起，咁就可以用 AASTOCKS app內嘅到價提示功能，預先輸入定幾隻心水股，當股價突然升破目標價，系統會自動發出通知，提醒用家入市。」

對應機款：
iOS、 Android

用 AASTOCKS可以𥄫實股價
升幅最大嘅股票，短炒最實用。

對應機款：
iOS、 Android

Kenny讚經濟通介面好 user friendly，唔怕唔識用。

長線搵 etnet

至於中長線投資， Kenny話可以下載「經濟通」（ etnet） app，「中長線投資，網民好多時會分段式買貨，逢低吸納，但買得多，未必記得幾錢同幾時入過貨；經濟通 app內就有個『心水組合』功能，俾用家記低入市成本，仲會用即市價計算賺緊定蝕緊，唔使自己慢慢計。」

了解術語

分析工具固然重要，但金融術語一樣要識，連報紙講「牛證」定「熊證」都未識分就走去入市，好易蝕到渣都冇。網上有大量解構金融術語嘅網站，好似曉の財金學院（ http://shaw-moneygame.com）及雨林投資 blog（ http://blueskyyulin.blog.hexun.com.tw），就有唔少術語解釋，睇完必定獲益良多。

一秒快炒

小魚追新款 iPhone 5，全因貪 4G上網速度快。

江小魚
九七年開始炒股，於股海打滾十六年，曾於報章及雜誌寫股評專欄，現時主持無綫財經節目「小魚大茶飯」，同埋喺 Facebook分享炒股心得，強項在於即市短炒。
推介： AASTOCKS、 TVB Finance

最緊要快

對小魚嚟講，炒股最緊要快，快一秒得一秒，所以專登出部可以 4G上網嘅 iPhone 5，「用乜股票 apps都好，如果上網速度唔夠快，講乜都冇用。」佢話手機 apps雖然速度唔夠證券行嘅大利市機快，但始終 4G上網有優勢，「起碼睇股價、落盤會快過唔少炒家。」

對應機款： iPad

小魚大讚 AASTOCKS iPad版介面好睇， load得又快，所有資料都可以一覽無遺。

對應機款： iOS、 Android

TVB Finance直播嘅財經節目，經常推介冷門股票，隨時執到寶。

繁忙鬥順

落盤用 4G鬥快，至於睇股價，小魚就推介 AASTOCKS，「差唔多試勻所有手機股票 apps，功能大同小異，主要都係用『股票到價提示』同埋『每日二十大股票升幅』功能。不過開市同尾市呢啲繁忙時間，其他股票 apps都 load得好慢，係得 AASTOCKS夠流暢。」
另外，小魚亦推薦即日鮮炒家安裝近排先上架嘅 TVB Finance app，「難得有本地大市分析嘅直播節目，可以追貼大市消息，唔怕錯失炒賣機會。」

股票機絕跡

○八年陸叔仲有做股票機代言人，但而家股票機已好少人用，逐漸被智能手機股票 apps淘汰。

早五、六年前，喺中環行一轉例必見到好多西裝友拎住部股票機猛㩒，即時𥄫實股價，今時今日又點？海通國際環球投資策略部副總裁郭家耀話身邊朋友同埋公司客戶，都已經冇用股票機，「而家智能手機咁普及，好多證券公司都有專用 apps可以即時落盤，齋睇即時報價亦有好多免費 apps做到，仲有晒圖表同技術分析，好少會特登帶多部股票機出街。除非上咗年紀用慣唔想轉，先會繼續用。」

投資大師

沈振盈
著名股評人
推介： Reuters.com、瑞信

「環球資金近期好活躍，預計好多熱錢會繼續流入，要追貼環球經濟，特別推介 Reuters.com網站，裡面好多第一手外國財經新聞同評論。至於玩開牛熊證，我會推介耀才、置富同瑞信呢幾間證券行推出嘅 apps，有齊數據顯示每日恒指牛熊證變動，可以睇到有冇大戶做緊嘢。」

對應機款： iOS

瑞信 app可以睇到牛熊街貨分布，對分析大戶部署，非常有用。

黃國英
豐盛金融資產管理董事
推介： AASTOCKS

「傾向睇圖表嘅股民，可以安裝 AASTOCKS手機 app，圖表最清晰， show齊股票嘅陰陽燭圖，俾股民知道承接位同阻力位喺邊度，對分析近期大上大落嘅細價股特別有用。」

對應機款： iOS、 Android

黃國英特別推介 AASTOCKS嘅圖表工具，較容易分析大市。

吳煒龍
康宏理財聯席董事
推介： StockQ、 MorningStar

「好少網站可以睇晒全球股票同埋基金走勢，而 StockQ.org或 MorningStar.com兩個網站都有晒所有資料，可以參考呢啲數據掌握環球市況，估計入市良機。」

StockQ及 MorningStar可以一個表詳列全球股票或基金表現，方便分析。