鏞記二哥甘琨禮（右）時不時走去對面間翠華歎下午茶，一出門口同伙記搭晒膊頭話：「我哋好 friend㗎！」（關永浩攝）

中環人語

鏞記長子廿億放盤

2012年12月27日 ~~ 第1190期香港《壹周刊》

來個中環大事回顧，首宗非鏞記爭產案莫屬。甘健成一方不但輸官司，佢老兄仲仙遊埋。兩個仔為秉承老父心願，正物色新鋪開間「琨勝廚房」。

不過開鋪要用嘅資金唔少，最新發展，係佢哋有意將手頭百分之四十五嘅鏞記股份，賣晒俾二叔琨禮，套現來開新鋪，心目中嘅價位係二十億！但據知他們仍未處理好甘健成的遺產事宜，由是雙方談判處於膠着狀態。照睇， 2013繼續有戲睇。

翠華秘密武器

插圖：王健威

同鏞記打對面嘅翠華，就愈做愈起，似乎威靈頓街條龍脈由鏞記射咗過去對面。翠華上市後，股價由$2.27一度勁升逾兩成至$2.73，並喺油麻地、尖東、沙田再開分店。據知，佢哋引入咗一部「真空豬扒按摩機」，為每一塊即將被煎嘅豬扒按摩半粒鐘，等佢舒筋活絡完之後，咬落會鬆軟啲咁話。部機聽落好搞笑，小宗問過幾次 PR，但連張相同邊度買都唔肯披露，似乎視之為「大殺傷力秘密武器」﹗不過部機聽落似係美容院先會採用囉。

Give me a break

平日去開中環，要搵個地方零消費 hea吓，唔係咁易，小宗醒你一個好位，就係滙豐總行五樓的卓越理財中心。呢度時時坐滿人，雖則要有成百萬身家，開個卓越理財戶口，先有資格坐喺度，但其實職員唔會 check，仲好好笑容招呼，人人 happy，真正做到「地方智慧」。去埋其他銀行，如渣打、恒生、中銀對照，如此服務，只此一家。

全場有廿幾張單人梳化，可以望埋皇后像廣場和前立法會景色，咪話唔正。（關永浩攝）

廁所新潮又超乾淨，小宗去咗兩次，都見清潔姐姐起勢抹，方便「打躉」。

澳洲即磨咖啡機 tiger，免費提供 espresso、 cappuccino及 milk coffee，絕對唔係雀巢三合一即溶咖啡之流。咖啡唔啱，仲有得揀香片、鐵觀音。

電話充電器必有 iPhone和 Android呢啲大路貨色，但驚喜係連舊式嘅 Nokia同 Sony Ericsson都有！梗係啦，滙豐有唔少耆英富貴客戶。

甘比麗君　平分秋色

插圖：祝健中

剛剛同大劉生咗個八磅男嬰嘅甘比，而家有一仔一女，剛好同呂麗君平分秋色。佢哋兩個嘅投資斬獲，一樣叮噹馬頭。兩年前，大劉一家科咗逾百億水去抽友邦，甘比同麗君各自派得二千六百幾萬股。友邦既阿媽賣仔救母 AIG，順利配售逾五百億元的友邦股份，陰霾消除。股價氣勢如虹，升穿三十蚊，如果佢哋未套現，每人都賺成三億；友邦過去一年派息亦唔錯，額外袋多千萬股息。所以話，湊女朋友，俾隻好股佢上就夠和味。

中環「奇」景

有金執？有錢派？有 IPO？通通唔係。此條在皇后大道中之人龍，原來是排隊買 Jenny的特製曲奇（ Jenny bakery），奇景也。

（于港民攝）

金牙大狀講嘢

證監大把儲備，唔速速置業，遲早出事。唔好話我哋冇預先通水也。

股市交投淡靜，靠交易徵費支持之證監會舊年收入劇跌三成至兩億元左右，此可又無礙班大老爺加人工噃；同期佢哋薪酬上漲咗近一成四至超過一億八千萬元；加幅之大，恨死隔籬也。不過大家唔使驚佢哋洗腳唔抹腳，事關佢哋大把儲備，為數超過七十五億元，即使繼續大加人工都有排未使慌也。
證監何以有咁多儲備？好天搵埋落雨柴囉。前幾年香港之上市集資額冠絕全球，連紐約都揮低；證監唔理三七二十一，只要有交投佢哋就有錢落袋；交投暢旺，佢哋有乜辦法唔肥過肥仔水先？
不過係咁加人工，遲早有人眼紅，會俾人的上立法會照肺。要防患於未然，辦法不外乎兩個:一係就降低交易徵費，以免人工過高俾人眼紅；再唔係就學得金管局咁置業，即使唔係坐鎮 IFC八十八樓，起碼亦應遷出長江中心，喺維港邊買番個有海景嘅單位，否則儲備多多，遲早出事㗎！

中環人語迷你版

估中邊個中環人講呢句說話，送你 J WATCH J-37尊貴版藍寶石鏡面限量手錶一隻
有意參加者，請於十二月三十一日
24:00前將答案電郵 mailto:centralman@nextmedia.com
小宗只接受電郵，郵寄免問。

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年一月三日本欄揭曉。