搞完一大輪，連 Dell工作人員都係冇乜頭緒，睇嚟 Windows 8真係未夠 user friendly。

IGOSSIP

Windows 8快招冇人識

2012年11月22日 ~~ 第1185期香港《壹周刊》

呢個月每隔幾日，就有電腦品牌搞 Windows 8新機發布會，機，的確有好多，但係識用嘅人又有幾多個呢？趁住上星期輪到 Dell搞新機發布會，特登踩場考考現場工作人員，睇吓一個以前最簡單嘅 cap screen（ screen capture）功能到底仲有冇人識。結果？幾乎問勻全場都冇人知，最後只得一位行家幫手，提示同時㩒住 window、 Insert prt scm（ print screen）掣就得。標榜新作業系統易用嘅微軟，係就係易用，但事前一定要有人教囉。

嗱，再私人醒多幾招 Windows 8絕技過你：
window+ E：開「我的電腦」
window+ Q：即時顯示所有執行緊嘅應用程式
window+ L：代表即時登出

說話留一線

咪以為句 slogan係自創，只係 quote番網友喺 twitter嘅評語，但查實網友係咪笑緊佢抄襲呢？（詳細產品介紹 p.16有得睇）

回帶時間：返番去 1997年，有記者問 Dell創辦人 Michael Dell如果佢做 Apple CEO會點搞，當時 Dell先生仲大大聲話：「我會執咗佢！」風水輪流轉，上星期 Dell喺美國出新機，電視同平面廣告都用同一句 slogan，話部機係「 MacBook Air同埋 iPad嘅混合體」，講到明自己「似足」對手產品，所以話呢，有時講說話真係唔好太盡。

打印老爺車

唔好以為模型車唔值錢，當初劇組整咗三部模型備用，其中一架竟然有人出價十萬美元（約$780,000）買！你睇相就知幾精細啦！

大家有冇睇過最新一集 007《 SKYFALL》？未睇嘅唔使驚，我冇打算劇透，只係想講吓入面架老爺 Aston Martin DB5。呢款車來頭認真唔小，喺 1964年上映嘅 007《 Goldfinger》入面首度登場，雖然唔係同一架，但新戲入面架 DB5都係 1960年生產、保養得好好嘅古董車嚟。套戲入面最終架車會「被爆炸」，當然唔係真車咁大嘥啦，其實只係 1比 3模型車嚟。為求做得像真，特別動用 3D打印技術，將成架車劏開八件打印，所以啲門同窗先咁精細，爆炸嗰陣車身零件亦四散得更自然。 3D打印最大好處係唔使起模，慳番唔少時間，睇嚟之後應該好多戲都會用呢個方法整道具。