貓貓，抱抱！（設計對白）
一哥曾偉雄講起自己養嘅貓都有柔情一面，但係對虐貓狂徒就絕不手軟。（鄒潔珊攝）

八卦陣

極速破虐貓案　禿鷹也養貓

2012年11月22日 ~~ 第1185期 香港《壹周刊》

觀塘順天邨發生虐貓案，有流浪貓被活生生踢死，全城震怒；警方今次竟然响不足兩日火速拉人，贏到唔少掌聲。點解今次警方效率咁快？原來警務處處長曾偉雄都係愛貓之人，呢單嘢，佢零舍緊張。


上週五，順天邨流浪貓阿 Miu被虐後吐血，在屋邨走廊徘徊，相片上載互聯網，全城震怒。（網上圖片）

一哥屋企本來有兩隻貓，係龍鳳胎嘅「阿富汗貓」，不過「妹妹」舊年過咗身，享年十歲，即係相當於人類七十歲，好老喇！至於「哥哥」，而家身體尚算健康，無病無痛，日常生活由囡囡負責打理。
一哥無時間幫「哥哥」梳毛，但一有時間就會同佢玩，錫到佢燶︰「佢好嗲人㗎，成日都好主動跳上我哋大髀。有一次去旅行將佢交俾寵物酒店照顧，接佢返屋企嗰陣佢仲係好唔開心，我哋要餵佢食新鮮嘅魚先氹得番佢咋！」一哥同記者講貓經，原來，佢都有柔情嘅一面！（馮普賢） 




「阿富汗貓」其實係乜嘢貓？愛護動物協會同獸醫黎昌生都話未聽過呢個品種，記者再問一哥，新聞秘書就話一哥當日的確係講自己養「阿富汗貓」。查實，一哥係咪將呢種原產地阿富汗的波斯貓，講錯成為「阿富汗貓」呢？ 

中策組李蓮英乜都管晒

中央政策組究竟做啲乜？首席顧問邵善波星期一就同大家講明中策組係政治工具，佢更加講到明，以後政府請人、甚至法定機構同諮詢組織委任乜嘢公職，都要向中策組嘅全職顧問高靜芝彙報、審批，換言之，以後政府用乜嘢人、點用人，都要由高靜芝扑槌。立法會議員李卓人一聽到呢個安排，即時火滾，莫非高靜芝就係大太監李蓮英，乜都可以管？
高靜芝十月三日加入中策組做全職顧問，而家個個月𢭃十六萬，今年六十二歲的她，曾經做過香港電話公司同地鐵嘅人事部經理，又做過機管局人力資源總監。佢成日都好自豪咁同人講，自己當年係首位華人女性升到電話公司最高管理層職位，查實，咪又即係人事顧問。
梁粉中人爆料，高靜芝最叻係打「夫人牌」，早年同董太、曾太混熟，而家同梁太都相當老友。據講，向來人脈唔多嘅梁振英之所以安插佢入中策組，正正係睇中佢係人力資源嘅老行尊，可以幫佢鋪橋搭路拉關係噃。（馮普賢、周展鴻）


我係慈禧，你就係李蓮英。（設計對白）
高靜芝（持咪者）由梁粉變身成大內總管，早前 CY要請副局長，佢都係遴選委員會成員。


TVB而家播緊《大太監》，黎耀祥就係做李蓮英，高靜芝大可以參考吓佢嘅演繹方法。

「官二代」香港師奶

最新公布嘅中共最高領導層、中央政治局常委之一張高麗，佢嘅獨女張曉燕嫁咗俾信義玻璃主席李賢義嘅大仔李聖潑。張曉燕喺香港定居，入咗李家門十二年，生咗兩女一仔，同四叔李兆基新抱徐子淇一樣。
之不過，徐子淇鍾意出入名流宴會，但張曉燕就低調好多，出街主要都係接仔放學、去超市掃貨，唔好以為佢有幾個工人跟出跟入，佢好多時都會親力親為。記者早排就撞到李太接完讀 K2嘅細仔放學，去咗上水街市買餸。當時阿仔企响玩具檔前扭計想買玩具，不過李太就企硬，由得阿仔磨咗十幾分鐘，無幫襯就走人。
李太打扮樸素，師奶味十分濃厚，一啲都唔似官二代。星期日工人放假時，佢會親自出馬去超市掃貨，仲會拖住架買餸車慳啲力水。李太知慳識儉，記者撞過佢幾次，每次見佢都係孭住個 Gucci「奶粉袋」，即使佢喺 fb大晒老公送嘅 miu miu袋，都好少見佢用！（時事組）


超市巧平，快啲去掃貨！（設計對白）
星期日工人放假，張曉燕單拖去超市入貨，孭住個 Gucci袋，拉住架買餸車，著住對過季鞋，十足十屋邨師奶。（李英林攝）


阿仔扭計要買玩具，張曉燕耐性十足，阿仔扭足十分鐘，都唔能夠得逞。（李英林攝）


六十六歲、現任天津市委書記嘅張高麗，進身中共中央新領導層。（美聯社圖片）

出晒名　 DR月慳十幾萬

DR美容事故過咗成個月，集團創辦人周向榮似乎絲毫不受事件影響，繼續日日著到古靈精怪咁跑步。之不過，近日 DR同亞太幹細胞喺旺角中心外牆、對住彌敦道租咗好幾年嘅大型廣告，就已經無聲無息拆咗落嚟。
招租嘅廣告公司話，嗰個廣告位月租十四萬八千，每月續租或者一次過租幾個月都得，廣告公司唔肯講邊個會接手租用。但查實，而家 DR已經咁「出名」，呢筆廣告費應該可以慳番啦！（陳凱敏）


18/11
上週末， DR的大型廣告已被除下，至今仍未裝上新廣告板。（羅國輝攝）


6/10
DR集團和亞太幹細胞租用旺角中心外牆大型廣告位，起碼已經有一年，月租十四萬八千元。


咁你都認到我？（設計對白）
毒針事件至今逾一個月，無辜死者剛設靈，但周向榮仍如常「重裝」出動跑步。（翁少陽攝）