採訪當日， Oscar在 2小時內，煎了 4、 5底上海生煎包，勁受歡迎。

創業通

歌手轉戰生煎包　日賣 2,000個

2012年11月21日 ~~ 第1087期交易通．搵車快線

許多人覺得 8、 90後捱不到苦，但 31歲的 Oscar必定是例外，他曾任歌手，是 Bliss組合成員，但 2年前放棄璀璨娛樂圈生活，毅然往上海學師，轉攻飲食界，親手煎製一個個滿是湯汁的生煎包，現時日賣逾 2,000個，更開設加盟店，月賺約 13萬，成功包出個未來。

遠赴上海學師

這個轉捩點，發生於 3年多前， Oscar於上海任模特兒工作期間，嘗過當地正宗的上海生煎包，自此愛上，往後每天也要吃上 10幾個，「香港食唔到呢種正宗味道，我同朋友講起，大家都覺得可以試吓，我哋不停尋師，但好多師傅都唔肯外傳手勢。」
後來輾轉認識到一位退休老師傅，終於得到機會，在一間醫院餐廳內做學徒，原本每月有 500元工資，但他們沒有收取，當作是請師傅喝茶，兼每天要做不少粗重工作，負責抬麵粉，「當時正值冬天，每朝要凌晨 4點起身，真係好辛苦。」師傅對他們要求甚高，有次要 Oscar煎生煎包，他不小心煎燶了，師傅也照樣拿給客人食，結果客人跑進廚房內投訴，「師傅想我哋知道，做飲食業係咁現實，千祈唔好出錯。」

每日即製生煎包
Oscar會因應當日天氣，以不同水溫搓製粉糰。

把粉糰壓成薄皮，放入適量餡料，掐起包狀。

把生煎包以圓形排列在熱鑊上，加入適量的水，慢煎約 8分鐘，最後灑上白芝麻。

親手炮製食物

除了生煎包，他與拍檔還學了其他上海食品，如小籠包、酸辣湯、糖醋骨等，學師 1年多， 10年尾學成歸來，選址旺角只得 200呎的小店開鋪，「鋪頭細，支出會少啲，而且我哋冇經驗，容易 handle啲。」開張當日，全賴一眾 DJ及歌手朋友畀面出席，令店鋪人氣爆燈，原先製作的 500個生煎包， 2、 3個小時已賣光。「最初靠明星效應，真係吸引到啲人，但之後都要靠食物本身，先可以留到客。」
Oscar親自製作全店超過 20款食物兼醬汁，而且堅持每日新鮮即製生煎包，「啲食物全部由我同拍檔整，雖然有啲食物，例如麻辣青瓜、小籠包等，可以之前一晚做定，但係生煎包一定要即日做，個外皮先唔會塌，同保留到湯汁。」憑着其努力，現時生煎包日賣逾 2,000個，每月盈利約 13萬。

上海生煎包外皮香脆，咬下去有濃濃湯汁，難怪每日賣逾 2千個， 4個售$22。

除了生煎包外，店內還有超過 20款上海地道美食，全部由 Oscar炮製，如酸辣湯用料十足，每碗$15。

開業頻頻碰釘

午膳時間， 200呎小店內外堆滿客人，難怪 Oscar要物色新鋪。

生意看似一帆風順，但 Oscar也曾遇到不少棘手事，「我哋喺 12月開鋪，當時天氣好凍，啲包包好後塌晒，發酵唔到，搞到我哋頭都大，惟有打電話返去請教師傅，佢教我哋喺溝麵粉時加啲暖水，令啲麵粉唔會凍硬。」之後 Oscar每天溝粉前，都會先看當時天氣作出調節。
開業後，店鋪又接二連三出現問題，「之前我哋貪平，求其搵咗個裝修師傅，結果裝修得好差，試過突然成個抽氣扇跌落嚟，好彩冇人受傷；廚房漏水，浸到出鋪面；隔油池又塞過，臭到啲客唔敢入嚟，要不停搵人嚟維修。」
而且遇上最低工資，聘請人手也是大問題，有時 Oscar要兼做廚師、收銀，甚至去送外賣，「都有好處嘅，我每個崗位都做過，知道有咩難處，會識得體諒員工，好彩我嘅屋企人好支持我，啲親戚一得閒，就會嚟幫手。」後來店鋪生意好， Oscar也有聘請點心師傅，又被其中一位師傅偷師，「為咗令食物質素一樣，我會教番我哋做點心嗰套方法，有個師傅做咗半年，就喺我附近開鋪，連張菜單都同我一樣，但係啲客都寧願嚟番我呢度食，生意冇受影響，家佢間鋪都執咗。」

淡季出新菜式

店鋪開張當日，一眾歌手及 DJ好友如陳柏宇、朱薰、 Donald等齊來撐場。

而這種上海小食店，原來也有淡季，「暑假同中秋節都係淡季，因為啲人去咗旅行，或者要做節，生意會突然跌 3、 4成，要即刻做番多啲宣傳，同埋研究吓新菜式吸引番啲人，好似夏天會出冷麵，最近我哋又推出菜飯便當等，總之每個月都會諗吓新嘢。」
經歷過多次試煉，現時 Oscar修成正果，今年初有人接洽，於油麻地開加盟店，「一路都有唔少人搵我傾加盟，今年我覺得營運純熟咗，而且呢個都係大趨勢，開多啲加盟店，可以令品牌更有名氣，由人哋投資，我哋做協助，供應食物同碗碟等配件。」

加盟費 30萬

客人梁先生
之前睇咗雜誌介紹，就嚟試吓，尋日食咗小籠包覺得唔錯，今日再嚟試埋生煎包，果然好好味，甚多肉汁。

新店加盟費需 30萬，雖然好好賺，但 Oscar並不急於開店，投資者必須跟自己理念一樣，而且要嚴格選地點，「之前我哋喺將軍澳嘅一間超市都有開過分店，但係超市有好多掣肘，做咗 4個月就冇做，所以家開加盟店，會同對方傾清楚，會陪埋佢去睇鋪、搵裝修。」
加盟店可以慢慢來，但總店卻有新發展，他已物色新址，將於 12月搬鋪，新店同樣位於旺角，面積有 1,000呎，可以容納至少 70人，兼做堂食及外賣，「由細鋪搬到咁大間鋪，係一個挑戰，希望生意可以愈做愈大。」跳出娛樂圈，走進廚房的 Oscar，不論名和利都比昔日優勝，可見職業無分貴賤，只要肯付出努力。

上海生煎皇
地址：旺角豉油街 60-104B鴻都大廈地下 15鋪（預計聖誕前開幕）

開業成本
租金：$244,000（ 3個月按金+1個月上期）
裝修：$500,000（包括器材及牌照）
入貨：$100,000
雜項：$50,000
總投資：$894,000

每月開支
租金：$61,000
入貨：$50,000
人工：$70,000（ 6人）
雜項：$20,000
營業額：$330,000
盈利：$129,000

入貨別貪平

做飲食業，入貨很重要， Oscar以親身經歷提醒大家別貪平，「我哋搵香港供應商入貨，貨源主要係內地，試過入咗假醋，啲味好差，成批貨唔要得，我又試過入咗批臭蛋，因為雞蛋外殼睇唔出有冇問題，煮咗畀客食，先知臭咗，好彩客人冇事。」之後 Oscar也會小心驗貨，每次貨到也會 check清楚招紙，以及試味，「千祈唔好貪平，發現某供應商啲貨平過市場太多，例如人哋間間賣 5蚊，佢就賣 2蚊，就要小心，可能係假嘢。」