面對面
錯得對 關楚耀
我常想，如果我兒子像關楚耀，吸毒爆煲、丟人現眼丟到去日本，哪個階段是為人父母的最心疼、最肉赤？
是沉淪毒海時？是通櫃坐監時？是千夫所指時？還是硬着頭皮要重新站在台上的時候？
今年 29歲的關楚耀， 09年 2月 24日，與前女友衞詩在日本東京因為藏有大麻被拘留在當地 31天。有個唱片公司高層父親、和契爺譚詠麟的關楚耀說，在此之前，自己是個坐在原地等待天上掉餡餅下來的人；在此之後，他珍惜和尊重每個工作機會，開始拍電影接電視劇，甚至自己執二攤主動個城市電訊偶像劇男主角來演，學會了父母的安心，來自於自己的工作態度：「為人父母，當年應該喺我沉溺喺當中嘅時候最心痛……過咗三年，我同爹哋媽咪傾番件事，大家都覺得日本發生嘅事，我應該要 appreciate（感激）……」
為甚麼要感激？錯過的人自然會懂。
錯鳥先飛
外形優勝、能唱能作、後台又硬淨，從小就在黎明、張學友、譚詠麟的巨星圈裏打滾，關楚耀從來不是笨鳥。日本藏毒事件後，離開娛樂圈一年後復出，至今僅僅兩年光景，他出版兩張專輯，在全港中小學演講近百場、拍攝港台、亞視及城市電訊共四部電視劇，又主演了剛剛上畫票房近千萬的電影《喜愛夜蒲 2》，他說要把錯過了的時間都追回來。
最近做緊《喜愛夜蒲 2》宣傳，啱啱至拍完城電一套偶像劇，又同黃日華、盧海鵬開緊套偵探劇。每日收 27（凌晨三點）開 07，不過反而副偈 run得好順、好有 energy，好鍾意自己 𠵱家呢個狀態喎。好攰㗎，不過幾攰都好，每晚返嚟幾夜都會讀熟第二日劇本， set個 target畀自己，聽日一定要做到。
換着以前，我梗係唔會咁啦。我咪就係嗰啲坐喺度，等個天跌餡餅落嚟嘅人囉……唱新歌，鍾意就鍾意、唔鍾意咪罷就囉；第二日晨早要唱歌，前一晚照樣飲到五、六點天都光；自己事業，自己唔緊張，公司同事仲緊張過我；登勤（環球唱片高層黃劍濤）約親我飲嘢，我就心虛，覺得自己肯定又做錯事瀨咗嘢……除咗自己，身邊個個都睇得出我工作態度有問題，有時去做嘢，連記者都問我：「係唔係尋晚又飲大咗？」我真係今日開心咗先至算，冇諗過咁搞法以後會冇得撈……
以前啲嘢煮到埋嚟先至食， 𠵱家，人哋行三步、我行六步，我主動問同事有冇工開、有冇訪問。收到風城電嘅偶像劇男主角有人推咗空缺中，即刻叫同事幫我問吓有冇得搞、安排 casting，我有幾進取、有咩改變，身邊每個人都睇到，我想行快啲，追番以前浪費咗嘅時間。
關楚耀說主演的新戲《喜愛夜蒲 2》，父親關維麟亦有捧場：「係喎，阿爸睇仔做床戲嘅感覺係點呢？等我問吓佢先。」
關楚耀在城電偶像劇《童話戀曲》中演高帥富，力追窮家女蔡穎恩，關自爆角色是執二攤兼自薦得到。
拋低包袱
知錯能改是好事，不過你有你知錯，並不代表別人一定要相信你浪子回頭。關楚耀說，經歷過不少白眼和拒絕，也曾經對別人的目光和想法害怕透頂。在做過近百場校園分享會，面對過自己的過錯近百次後，反倒是坦然了。
復出第一年，係我向公司提出去校園做分享會構思。開頭，我去到邊都有人白眼、啲人交頭接耳俾我聽到：「呢個咪吸毒嗰個？仲返到嚟咩？」同事去中小學 sell我嘅講座，唔係個個校長都肯畀關楚耀入去……個朵咁臭，又難怪人哋，我自己都驚上到台俾人噓俾人藐啦……
我係邊個啫？有咩資格同說服力話畀人聽，咩應該做？咩唔好做？我係因為衰過、瀨過嘢，想分享自己嘅經歷，我真心想話畀青少年聽，唔好眼淺，為咗一時三刻嘅快感吸毒，呢個世界好大，除咗吸毒，仲有好多嘢可以做。
結果一年時間，跑咗差唔多一百間中小學，我唔係幫人，其實係幫緊自己。解決問題同錯誤嘅方法，一定係面對，我一路分享、一路就面對咗自己嘅過錯一百次，反而拋低咗個包袱，諗通咗：「我理得你哋點諗我啫？我做好自己咪得囉！」學似校長譚詠麟同我講，做藝人一定要有個金鐘罩，出邊人哋講乜都好，聽唔到、睇唔見，我哋喺個金鐘罩入面，做好自己嘅嘢就得啦！
在日本因為藏有大麻被拘留 31日後，關楚耀回港並舉行記者會鞠躬道歉。
10年復出，關楚耀巡迴港九新界校園演講分享經歷，他說近百場分享會後，其實幫了自己。
父親關維麟是譚詠麟唱片監製，譚校長因此做了關楚耀契爺，還指定關楚耀做接班人。
女孩像她
和前女友衞詩 09年出事以後分手，關楚耀一年後認識圈外女友 Megan拍拖至今，感情穩定。關楚耀說，以前夜夜笙歌追求的是飲飽食醉迷上癮，現在工作一整天回家，最幸福的事就是喝上一碗她親手煲的湯。
做人，我長大咗，談戀愛，亦都一樣。好似啱啱出道時出嘅碟，唱極都係啲情情塔塔嘅歌一樣，我嗰陣個世界係得玩同情情塔塔咋嘛。睇感情睇到好重，但係個人反而冇自信，唔知點留住女仔……最記得係以前有一個女朋友，我明知佢出去玩，仲試過喺佢張床側邊搵到啲證據……唔好講係咩，總之一睇就知係男人嘢，我都唔知點解仲忍到唔出聲、扮冇嘢，咪就係對自己冇信心，怕失去咋嘛。
我好享受 𠵱家呢個狀態，唔使呃唔使氹，兩個人一齊簡簡單單，有嘅就係支持同信任。
其實無論男仔定女仔，都錯過，都做過人渣，每段感情都好似訓練班一樣，個個都會長大。雖然結婚生仔言之過早，但係我 𠵱家定性咗、有目標，我希望自己做好每一個工作，養到自己養到屋企，快啲儲錢買到樓，我都想第時做爸爸可以畀佢最好嘅嘢。
關楚耀對與同年新人衞詩的緋聞一直否認，直到兩人 09年 2月拍拖遊日出事，情侶關係同時曝光及終結。《忽然 1周》圖片
與現任韓籍女友 Megan拍拖兩年，關楚耀說求婚是兩個人的事，絕對不會做大龍鳳。《蘋果日報》圖片
乖
06年出道時，不少報道都說關楚耀賣的是乖乖仔形象，關楚耀也說，自己一向黐家黐父母， 09年吸毒事件爆煲時，因此才讓日見夜見關係親密的父母晴天霹靂悲痛至極。
「 𠵱家日日拍戲早出晚歸，難得有日返到屋企陪爹哋媽咪食餐飯，會突然間覺得佢哋老咗好多……我知我無論幾多歲、佢哋幾老，都會當我小朋友一樣擔心。我唔係求幾大成就、搵幾多錢，淨係想爹哋媽咪安心，呢幾年見到我嘅工作態度，我諗我已經做到。」
我想也是，關爸爸關維麟是唱片界的金牌監製老行尊，見了大半世巨星，他求的應該不是另一個巨星，只是一個乖兒子。
09年一出事，父親關維麟立即飛到日本幫忙打點。
留言列表
{{ article.title }}
