05年 Carol在寵物店遇見 Bulu，第二天剛好要旅行，但她全程心掛掛，回港後馬上直奔店鋪買了牠。七歲的 Bulu現時是香港最高齡的貝靈登爹利犬之一。

寵物家

我是貝靈登爹利犬，不是一隻羊！

2012年08月23日 ~~ 第1172期香港《壹周刊》

我叫 Bulu，今年七歲，係本地繁殖的純種貝靈登爹利犬。我嘅同胞喺香港只有百零隻，平日出街經常俾人誤會係貴婦狗，仲有小朋友叫我做綿羊！主人 Carol見無咩人認得我哋，於是成立咗貝靈登犬會，仲幫我設計埋自家品牌，唔知我會唔會一炮而紅呢？

貝靈登爹利犬小檔案

貝靈登爹利犬的特徵是背部呈拱形，臉部窄長，頭頂長有大量毛髻，耳朵似吊着小毛冷團。雖有一身長毛，但由於毛質薄，少打結，容易梳理。

據傳元祖級的貝靈登爹利身重腳短，至十九世紀時有英國繁殖家將貝靈登爹利與惠比特犬配種，而成了今日所見身輕腳長的體形。貝靈登爹利最初因身手靈敏而被訓練為工作犬，專門捕鼠，其後愈來愈多富裕家庭飼養，變為家犬。貝靈登爹利性情溫和、聰明，適應能力強，深受歐洲人歡迎。

細個醜小鴨

我的祖家在英國北部貝靈登市，和爹利犬擁有同一祖先，不過好多養狗人都話我嘅身形似惠比特犬多啲，只係多咗一身攣毛。當我四個月大時，主人帶我返屋企，佢話當時我黑孖孖，成隻醜小鴨咁。到一歲後開始換毛，逐漸變成銀灰色，塊面亦愈生愈長，睇落似足綿羊，不過呢啲正是貝靈登爹利犬嘅特徵。

Bulu小時候毛色灰黑，酷似史納莎，至一歲時才換成銀灰色毛。

從事設計的 Carol推出以愛犬為品牌的狗仔衫、狗帶、環保袋及畫作等，她說志不在賺錢，只是為滿足替愛犬製作紀念品的心意。

Bulu最愛吃火龍果，但一定要用匙羮餵牠，否則近在面前也不願吃。

外國粉絲加入

顏色偏白的貝靈登爹利，其實是混合了貴婦犬的新品種。牠們多數頭部較短，性情活躍，比純種貝靈登爹利吠得多。

主人 Carol曾經養過約瑟爹利，佢話嗰隻狗哥哥性格好動，成日吠，唔似我咁靜咁住家。而且我平日好少甩毛，易打理，最啱香港人養。所以她成立貝靈登犬會，定期搞聚會及交流心得，仲用我個樣設計自家品牌，而家除咗香港，遠至英國、捷克、瑞典都有我嘅 fans，睇嚟我去旅行都唔會被人當羊牯啦！

香港貝靈登爹利犬會
網址： http://www.bulustyle.com