娛樂八掛大放送★

依家大部分女性，以為扮吓嘢、夠潑辣就係「公主病」。咁諗就超錯。
不如睇吓新劇《公主嫁到》嘅佘詩曼示範真正嘅「公主病」係點樣啦。
阿佘喺《公》入面飾演嘅昭陽公主，性格茶煲、刁蠻、霸道，成日以為有錢就大晒。陳豪雖然身為駙馬，卻無駙馬之實，不單俾公主將佢搓圓㩒扁，連公主近身婢女陳法拉一樣對佢拳打腳踢。陳豪堂堂駙馬，俾佢哋兩主僕蹂躪到體無完膚，慘過梁天來。

《公主嫁到》係無綫下半年度重頭劇之一，演員方面，除冇咗鄭嘉穎、楊怡及米雪外，其餘近九成都係《宮心計》班底，加上劇集又係宮廷、皇帝同妃嬪，令人錯覺係《宮心計》嘅延續。
其實《公》劇無論係劇種、故事，都同《宮》劇冇關。只係有關方面食住《宮》條水嚟做宣傳啫。

公主惡鬥金家
《公》嘅故事發生喺唐朝，出名刁蠻嘅昭陽公主（佘詩曼飾）因為唔肯和蕃，於是急招駙馬。金店老闆娘丁來喜（關菊英飾）主動上門提親，希望兩個仔是但一個娶到公主，就可幫舖頭解財困。老二金多祿（陳豪飾）為保家業，答應婚事。誰不知公主一入門，公主病就發作，而且一發起來，皇帝老竇都冇面俾。所以唔單止駙馬，全個金家、包括最高領導人金太夫人（李香琴飾）一樣要做佢「裙」下之臣。
公主橫行不特止，連佢嘅心腹侍婢銀屏（陳法拉飾）亦尊卑不分，根本將金家唔放在眼內。本來俾人咁恰法，應該全家上下齊心反抗先係，偏偏金家出名大力嘅丫環吳四德（鍾嘉欣飾）卻係手指拗出唔拗入，竟然埋咗公主堆，做埋幫兇。
以為娶個皇帝女，想夫憑妻貴、有助家業，誰不知竟然係捉隻老鼠入米缸，搞到冚家不安。鵪鶉駙馬終於明白到，原來百忍係冇可能成金，決定嚟個大反擊，要俾茶煲公主一個大教訓。

播映日期　8月23日起周一至周五晚9:30pm 翡翠及高清翡翠台

佘詩曼呢個刁蠻公主，其實係太宗同民間女子所生，6歲先俾老竇太宗接入宮。因太宗過分痛錫，恃寵生驕。

陳豪飾演嘅駙馬金多祿，俾公主蹧質到不似人形，認真淒涼。

關菊英飾演嘅金家掌舵人，為人八面玲瓏，持家有道。而金太夫人李香琴亦樂觀開朗，卻經常好心做壞事。

公主雖嫁入民間，但公主病仍隨時發作。佢自己唔瞓，全家都唔俾瞓，包括70多歲嘅金太夫人（李香琴）。

金多祿對公主嘅折磨完全冇得反抗，任其魚肉。

陳法拉飾演嘅侍婢銀屏，擁有一副好身手，因而專職保護公主，雖然性格貪錢，但對公主確係一片忠心。

惠英紅唔再係《巾幗梟雄》嘅鵪鶉三少奶，而係奸到無倫，陷害公主嘅韋貴妃。

鍾嘉欣飾演食得又捱得嘅大力妹吳四德，因為同公主係同鄉，所以亦係唯一一個同公主friend嘅金家人。

金多祿俾奸人陷害，話佢通蕃賣國，因而面臨全家被抄斬危機。

金家大少奶李詩韻因為外家家道中落，逼住偷金家物品變賣接濟，但又怕瘀，惟有同大少爺金多福（阮兆祥）扮鬼扮馬。