食店的名字易記，容易廣泛相互傳誦，太子的「再嚐試」是佼佼者。
鋪頭英文名叫Joyce's，中文名取了「再嚐試」，雖屬爛gag但搞得令人相當受落。健談老闆娘說，Joyce是家中的小狗，加上與「再嚐試」同音，而且又能沾上時裝名店Joyce的名氣，覺得有趣而取名。小店已開業10年，一向都是做街坊碟頭飯菜式。比A4紙還要細的餐牌上提供簡單的麵餐、三文治和碟頭飯選擇。選擇雖不及茶餐廳多，卻是我在太子區的首選醫肚小店。
大廚是余氏老闆及其賢內助，做的食物雖是簡單但用心：餐肉、豬扒、雞翼、魚片等全部都即叫即煎，因老闆相信香煎可令食物更香，凡是一切有骨的扒類，要是炸的不夠透徹，會在骨位滲出血水、太透又會乾身，倒不如用煎的更香口，肉汁更能保留云云。不太餓的話可一試百搭式的麵餐，我最愛吃雪菜牛肉豬大腸油麵，雪菜經老闆略煎，咬落更爽脆；牛肉很新鮮，也是即叫即煎，豬大腸肥膏滿溢到嚇暈你，滷得軟糯適度，正到嘴還在嚼，筷子已夾起另一件追着吃！
若吃麵不夠飽，碟頭飯當中的鮮茄豬扒飯真的不能錯過。一客飯用上2個肉茄略加糖、鹽作調味煮成，真材實料，汁醬之多撈飯更是一流。還有芙蓉蛋雞扒飯，炒得嫩滑的雞蛋半熟，包着煎香的紅腸和餐肉，再加幾滴特濃醬油，是地道的港式丼料理。每碟飯都會伴以大量新鮮椰菜，既爽身又清甜，絕非「伴碟」咁簡單。
余老闆在開放式廚房忙個團團轉，但仍不忘與客人談天說地開玩笑，他會記得客人的喜好和家庭狀況：「你個細仔今日做乜唔來？」。每當做好一道菜式，會大聲吩咐夥計：「呢碟係四眼仔的！」、「鮮牛麵係紅色衫個肥仔的」，拿客人開玩笑但個個也很受落，氣氛一流，就像到了老友家中作客般輕鬆自如。
雖說開鋪已10年，但裝修依然企理，地板乾爽；開放式廚房不見丁點油漬；枱頭的糖鹽辣椒醬罌同樣乾淨沒污漬。見到如斯環境真的令人更開胃，飯都扒多兩口！
再嚐試美食
地址︰太子西洋菜街328號地下
電話︰2381 3542
少年食神林澄光（Michael）
旅遊飲食達人，醉心研究各國飲食文化，深信飲食無分貴賤，致力用有限金錢換無限快樂。近作有《少年食神曼煮泰菜》、《秘．台灣隱世美食遊》
鮮茄豬扒飯$34、芙蓉蛋雞扒飯$37
雪菜牛肉豬大腸油麵$31
留言列表
{{ article.title }}
