娛樂八掛大放送★

除咗上期我所講嘅「眼」之外，面上有兩part都好重要，可以睇得到一個女人係咪容易俾人o氹o架！

就算女人個鼻生得點靚，都唔會吸引到男士們嘅目光，不過已婚/離婚又出嚟玩嘅男人就要留意。
結咗婚想包二奶嘅男人，就要留意擁有二奶鼻嘅女人。呢類女人，整個鼻形都好正常，鼻樑挺正，鼻頭尖圓，唯一特別嘅地方係佢個鼻與面形配合起來時，有面大鼻小之象。呢類女性缺乏自信，需要有嘢依靠，所以佢哋容易戀上事業有成或已婚嘅男性，結果，咪心甘情願做人情婦囉。
另外，鼻樑生得偏低嘅女人難有夫緣，亦容易受到已婚男士追求。擁有呢種鼻嘅女人，就算俾佢哋做到正室，一生都願意為丈夫捱生捱死，但佢哋嘅老公亦多數爛賭、愛嫖、好飲，好大機會離婚收場㖭。相反如果鼻樑低嘅女人願意做繼室，則可享盡夫福，對雙方關係都有好處。

觀唇知性慾
睇面相判斷女人係咪易上釣，最後一part要注意唇部。唇屬於發情嘅地方，亦最容易觀察到一個女性對性慾同感情嘅需要。
上唇主情、下唇主慾。如果男士們碰上一個上唇下唇都好厚嘅女仔，佢無論喺情同慾都咁旺盛，容易投入每一段感情，再投入身體。但如果下唇特別厚，就代表呢個女仔以性慾行先，即係喜歡玩一夜情！去蒲時，若果見到有些女生坐埋一邊，唔多聲，嘴唇緊閉有力，代表佢嘅意志堅定。但如果有啲女仔對住你嘴唇半張，好似乏力柔弱咁，並唔係代表佢特別想誘惑你，而係佢哋屬於意志薄弱嘅一群，容易受到你嘅引誘，當然，亦容易受其他男人誘惑啦！
計我話，出嚟玩嘅男人，最緊要對號入座，先至係玩家上策。而玩唔起嘅男人，就修心養性，無謂自招麻煩。
至於「易上釣嘅男人面相」就唔使教，因大部分出嚟玩嘅男人都很容易搭上女人。不過我想提一提各位女生，若果你有我所提過易俾人騙嘅面相特點，自己就要小心啲，唔好成日話啲男人衰，可能係你自己笨得滯……總之記住帶眼識人呀！

So Time
讀者Janey Tam問：
本人197×年新曆×月19日凌晨3:45出生（197×年農曆×月初八丑時出生），本人有以下問題想問：
1. 我一生運氣如何？何時行大運呢？
2. 本人現時所做的工作是清潔員，這工作是否適合本人呢？哪行業最適合本人做呢？
3. 本人現時還是單身，沒有拍過拖。本人姻緣運是否很差？是否會孤獨終老呢？
4. 本人晚運如何？謝謝！

蘇師傅答：你嘅命格屬「木」，生於冬天，「木」、「火」對你運氣有利。你得25至35歲10年大運，如果之前你把握唔到錯過咗，就要再等到55歲，但嗰時都老啦，所以我會當你一生唔行運去睇。你適宜做專業、大機構，向一條路發展，因為一生難再有突破。你現在係清潔員就繼續做住先，冇話適唔適合你o架，因為你嘅命都係普通命，有份工養到自己都算合格啦。至今仲係單身冇拍過拖？係咪自己問題呢？我成日都唔信啲人冇拍過拖，咁你就醒啲啦，因為09年係重桃花，但已過，好在你喺逢0字及1字尾的年份都係重姻緣，今年及2011年就要打醒十二分精神，如果呢兩年都錯過，咁你一世都唔好再問嘞。晚運都OK嘅，因為你55歲再有運，所以唔使擔心，仲係有自己做生意運㖭，睇下依家儲唔儲到錢，到時再搞盤小生意啦！