娛樂八掛大放送★

呢期提起disco同hip hop，就實會諗起舌戰同慾照，好唔健康！但其實玩音樂本身係好正經嘅事，捽碟都唔一定要去夜場，原來喺屋企都捽得，正氣得多。事關幫i系機出開音樂配件嘅意大利廠商IK Multimedia，啱啱出咗部iRig MIX，只要駁住iPad或iPhone就捽到碟，$848就代替到成皮嘢嘅捽碟機，即睇GME DJ女盟Rika嘅示範！

Spec.
app：DJ Rig Free
電源：USB取電
體積：196×104×23mm
重量：305g
售價：$848
查詢：6E（2686 8011）

iPad播歌夠慳位
平時喺clubbing見到嘅大嚿捽碟機、一邊要駁住電腦播歌，另一邊要駁兩個大碟盤，唔係人人可以玩到。之不過，iPad、iPhone或iPod touch只要安裝咗官方免費app DJ Rig，就可以變成碟盤，機內嘅歌亦可以任你捽；再經3.5mm接頭連接埋iRig MIX，仲能夠用到實體掣去調音同校beat，手感同真嘅捽碟機一樣，兼且唔使駁電腦，成套器材size細得多，屋企冇乜位都玩到，人人都做到DJ。

iRig MIX接駁圖

捽碟基本功
駁好晒部機，就可以開始捽。DJ Rika話iRig MIX嘅操作大致同真捽碟機一樣，兩邊panel各負責1首歌（可同時播放），播歌時可推掣調校每邊大細聲同節奏，造出mixing效果，而碟盤就有各式音效，捽佢能產生「吱吱吱」之類嘅sketching聲。唔同effect配合起嚟，就造到disco music。 ####

DJ Rika
其實佢係簡化版捽碟機，新手玩會覺得易啲，但最常用嘅功能已經齊晒，玩到一般DJ多數會玩嘅效果。不過虛擬碟盤冇實物咁易拿揑放針位置，要習慣吓先放得準。

若只插1部i系機，就要打橫部機擺，等app介面變成有兩個panel先捽到；如果有兩部機，就可以每邊打直個app做1個panel。當然iPad會比細芒嘅iPhone好捽。

機頂有L/R喇叭插頭，隨機附送左右合一線，只要喇叭有3.5mm audio in就駁到。

頂部嘅扭掣可調校兩首歌高音、低音同增益，屬於較高階玩法，新手好少用。

iRig MIX左右兩邊亦對應番個app，各自操控1邊panel（即兩首歌），兩個直推掣用作校節奏快慢，最常用嘅底部橫推掣就調校大細聲，A歌大聲啲、B歌就會相對細聲。

一隻手校iRig MIX、另一隻手就要喺歌曲適當地方捽碟盤，造出音效配襯。放針喺碟上唔同位置，就有唔同音效。

個app仲有好多進階功能整effect，例如左邊用手指篤紅點去唔同位置，就能改變聲音frequency，右邊㩒9個數字掣就能加特別聲。