一年冇見，Lavina擺起pose仍然揮灑自如，話晒係𡃁模老祖宗，擺pose，easy job。
祖師出山 元祖級𡃁模Lavina（原名鍾蕙芝），出道時憑一雙豪乳騎劫書展，成日舌戰惹是非，每次活動例必搶盡鏡，風頭一時無兩，惟因合約問題與公司鬧翻，搞到絕跡𡃁模界，當年死敵周秀娜已成功封胸唔使靠剝。
最近Lavina忽然改名鍾而復出剝壇，Lavina除了執靚變樣而再度「重出江湖」，據知亦因為一直照顧佢的富商玩厭斷糧而被焗住靠自己，除了重操故業出寫真，更要降呢做龍友模搵食！
原名鍾蕙芝的Lavina，09年出道憑34E迫爆豪乳備受注目，但上年有傳她獲富商照顧後，憤而跟同屬Rainbow的經理人反面而潛水。
天然胸賣點
事隔一年，25歲的Lavina唔只改名「鍾而」，都算改頭換面執靚出山，明明換上間尺鼻和V煞面回歸，但Lavina一樣死撐貨真價實：「其實係之前為復出準備而減肥，做多咗運動，又食得清減咗，每晚都會幫自己按摩吓塊面。我唔敢整容呀， 我驚整咗俾人誤會連個波都假咪弊，所以我連Botox都唔敢打，話晒我個天然胸係賣點嘛！」
V煞生力軍
潮流興整容，女星執靚少少都好普遍啫，潛水一年的Lavina雖堅稱冇整容，連打Botox都唔敢，不過個樣又真係有啲唔同喎！
眼：明顯比以前大咗，望落成個人精神晒！鼻：雖然Lavina以前都屬高鼻一族，不過有少少豬膽形，現兩邊鼻翼減細咗。面形：以前明顯的發脹包面，𠵱家個V形刀削面尖到㓤親手。
名表出入
之前本刊發現Lavina手戴價值數萬元的IWC名表，佢話：「隻表係二手㗎，係我uncle（母親男友）唔要轉送畀我㗎咋！」但隻表明明女裝size喎！
整容模逐個寸
Cammi
話晒Cammi係我前師妹，佢細個個樣好啲，都算幾可愛，不過佢好似有打Botox，搞到𠵱家成個NelNel咁，以前佢冇咁似NelNel㗎！
Jeana
以前佢仲係舊8模嗰時，有見過佢感覺自然啲，個胸冇咁大，𠵱家佢個胸係大，不過好假，似吹氣公仔多啲。
Mia
好耐之前見過佢，都唔係𠵱家個樣，佢整得幾好吖，好靚好似Barbie，不過近睇好塑膠公仔囉。
唔係包養係照顧
其實Lavina一直不乏人照顧，據知去年忽然潛水，是獲一富商包養，但最近富商卻玩厭斷糧，令Lavina迫住出山再賣肉。Lavina話：「唔好話『包養』，應該係話『照顧』，出道以嚟，曾有大把人話想照顧我，佢哋都係話見我喺呢行做得咁辛苦，叫我唔好做，同佢一齊，不過我冇，如果有人『照顧』我，呢一年我就唔使蝸居土瓜灣，做兼職設計幫補啦，更加唔使復出啦！」有人養唔代表有豪宅住，一張飯票食唔足一世嘅！
重操故業
Lavina話𠵱家亦會為唔少龍友影會做model，每個鐘收幾千蚊，仲好賺過做𡃁模嗰陣，龍模一向收一千幾百，邊個龍友咁大手筆呀！ ####
做閒角
Lavina復出，在《喜愛夜蒲2》飾演其中一個閒角，上月尾一場泳池戲，面對成大班水着女，Lavina即刻捉住李思捷緋聞女友Naomi（右）齊齊落水，成功突圍。
師妹藐
上週Lavina（右）出席一首映活動，衣着性感，大騷4吋事業線，與前師妹Rainbow（左一）狹路相逢，Rainbow一見Lavina即刻避走，獨留Lavina尷尬呆企。《蘋果日報》圖片
屋邨妹本與母親同住於柴灣公屋舊居，Lavina話搬出去蝸居，係因為唔想再被傳媒追訪而被鄰居投訴。Lavina同母親同住時，經常幫手做家務，都算孝順女。
假大眼V煞面久休復出，Lavina五官輪廓的確標致咗，不過好彩條4吋事業線仍然不變。
留言列表
{{ article.title }}
