左：黃又南，29歲，隊中主玩結他，被導演陳果發掘而入行。出道是大家都喜愛'97澳洲電影《Shine》，名字正面而用作隊名。
右：徐天佑，29歲，同樣在街被陳果發掘。隊中主唱，更玩結他及鋼琴，更喜愛拍攝，近年愛用Nikon，不過好想轉會用Canon 5D Mark III。
十年前聽住兩位靚仔組合Shine大，幾年後宣布各自發展，一個寫小說、一個拍電影，以為人人遺忘、甚至分不清誰是又南（左）誰是天佑之際，十年光陰又過了，好一個回歸的punch line。今年2月為Wyman個唱做表演嘉賓，掌聲不絕，激情鼓勵，今天Shine正式重組，來臨8月開個唱，優先訂飛唔夠10分鐘即完賣，青春氣回歸樂壇了。
01. 當初如果沒有獨立導演陳果提攜，在街頭找你們拍戲，Shine也不會出現了吧？
佑： 對，他是我們的恩師，好記得'99拍《細路祥》時，帶埋我一齊買錄影帶，教我每盒帶有乜效果，冇佢就冇人識我，更唔會有興趣走去寫劇本拍戲。
南： 細個唔鍾意讀書，見佢搵我咪好奇跟吓。'01同周迅拍《香港有個荷里活》，陳果無端端叫我拎住部35mm錄影機周圍拍，其中幾個過鏡用咗我拍的片段。
02. 明明唱得好好哋，何解突然間解散了？
佑： '07大家唱到好冇火花，上台都唔知為乜，就好似見到個鋼琴都唔想再彈咁。
南： 我諗係每個歌手必經階段，加上那年唱片公司剛好滿約，大家傾過拍電影更有感覺，於是各自發展。
03. 各自發展下，去了哪裏尋覓新方向？
佑： 滿足自己由細到大的願望，去寫小說，寫下一本又一本。最近忙於找合資夥伴，為我寫的懸疑片投資，始終好鍾意拍片。
南： 我簽約一間內地電影公司，主攻內地電影如《競雄女俠秋瑾》及《孤島驚魂》；後者都同天佑一齊拍，我們私底下不時約大家食飯。
04. 2月由Wyman邀請於紅館唱最紅歌曲〈燕尾蝶〉，沒有這個機會，還會重組嗎？
佑： 那次唱完落台後，還聽到不斷的掌聲，Wyman在台上話好多人等緊我們回歸，好感動，真正感受到Shine回歸樂壇了。
南： 內地拍完電影返酒店休息，不期然頭挨着車窗想起當年同天佑一齊癲的境況，你話冇諗就係假。
05. 新派台作〈第二春〉又是Wyman填詞，今次以甚麼方式迎接這樂壇第二春？
佑： 我哋諗緊個MV會唔會自己操刀拍攝、又或者會拍一些微電影在個唱播放。
南： 最緊要想觀眾認得Shine最初的定位，以前會不斷去通利睇結他effector，今次就唔會刻意玩effect，想將最pure的音樂送畀樂迷。
06. 認識了大家10年，哪件事令你們最難忘？
佑： 好記得02年1月25日，我們首次上台，在添馬艦為港台表演，緊張到係咁去洗手間，出到去最緊張係公司高層在觀眾席睇我們。好在當時冇甩嘴，仲話我哋唱得好，拉大隊去對面香格里拉酒店鋸扒。
南： 未出道前，公司送我們日本學結他，我們一齊住，天生有潔癖的我，最怕天佑太過粗豪，衫着完唔摺周圍掉，飲啤酒又唔用杯墊墊枱。
筆者最難忘係呢幾個月，不斷有人要求我訪問時喪偷影兩口子，又係咁叫我幫手撲飛，全部都係80後女生，邊個話香港女生全部都冧BIGBANG。 ####
兩口子一齊拍電影，最爆要數'05由彭浩翔執導的《AV》，口碑抵死夠賤，中晒後生仔笑點。該片更獲'06「第十一屆金紫荊年度十大華語電影」，全靠又南與日本AV女優天宮真奈美有大膽床上戲？！
《麻生。尋鬼記》是天佑'10首個懸疑加鬼故小說系列，原來7歲時他已經D.I.Y.過一本恐怖小說《學校魔風》。
2月任Wyman個唱表演嘉賓，一身Burberry Prorsum好帥氣，來臨Shine個唱就繼續想搵Wyman做形指添！
留言列表
{{ article.title }}
