感情升溫
一直否認與張栢芝細佬張柏文拍拖嘅Jeana，中完頭獎就即以iPhone的微信app打畀柏文，頭痛唔緊要，有男友呵番好過睇醫生啦！
電話傳情 靠胸搵食嘅模Jeana（何佩瑜）早前被人影到和張栢芝細佬張柏文喺銅鑼灣拍拖嘆咖啡，明明態度親暱，但兩人例牌唔認拍拖。
不過地下情唔瞞得好耐，週日（17日），Jeana公司GME搞咗場友誼波籃球賽，有份落場娛賓的Jeana開波前諗住射番兩球，點知身手差慘食波餅，不過中招Jeana即刻打畀柏文嗌痛要男友呵番，乜撞親唔係應該打畀醫生先咩？
去年飛甩拍拖4年的有錢圍村男友後，雖然Jeana身材fit爆唔怕冇仔溝，但靚女一直未有真命天子殺出，直至4月中與柏文撐枱腳先令戀情曝光。
電話訴苦
週日（17日），Jeana和公司成班男女於順利邨體育館打籃球，同門Bro5和周秀娜男友Avis落場打真軍，Jeana和其餘𡃁模則只係開場和中場娛賓。未開波前，Jeana和其他𡃁模落場玩兩手，可惜雞手鴨腳，Jeana身材好卻反應慢，成個籃球飛埋身邊都冇反應，慘食波餅的Jeana當場大叫，雖然成班姊妹埋身慰問，但心不在焉的Jeana仍然冇乜反應，返回看台區後卻識得用微信打電話畀柏文訴苦。明明一分鐘前還扁晒嘴的Jeana，其後聽到男友回覆呵番即刻笑晒冧死，手機傳情敗露，但Jeana仍撐︰「打畀佢（張柏文）係想問佢點先快啲唔痛啫！（點解唔問在場其他人?）因為佢係我籃球教練，我哋耐唔耐都會約打波，佢打波好叻㗎，總之我哋係有機會發展，不過𠵱家仲未知囉！」兜兜轉轉，好煩啫！
Avis又背娜姐拖Mia
公司搞籃球賽，當然總動員到場，獨欠身在上海出席電影節的娜姐（周秀娜），女友唔在場，Avis都有個Mia代出手「照顧」。散場後，Avis和媽模Mia一齊雨中漫步，Avis又作反啦！
打籃球易冧女
識煮飯嘅男人吸引，識打籃球嘅男人同樣引死人，娛樂圈有唔少藝人出名打波叻，仲要個個緋聞旺，無論喺香港定台灣，全部一樣冧死女。
余文樂 港籃代表
樣貌同外形都唔錯嘅余文樂，曾是香港甲2球隊成員，現自組籃球隊橫州工業打到出晒位。入行12年，除咗同黃伊汶公開戀情外，傳緋聞的人有阿嬌鍾欣桐和最近因傳短訊傳出事的𡃁模LuLu王璐瑤等。
周柏豪 掹車邊溝女
曾是香港籃球隊青年軍隊員的周柏豪，現在亦是余文樂隊友，雖然球技不及余文樂，但入行短短5年，溝女戰績卻更甚於余文樂。同佢傳過緋聞的女星有江若琳、何超雲及前Freeze成員石詠莉等，其中石詠莉更稱曾收過周的短訊約上佢屋企！
周杰倫 台灣代表
周杰倫愛打籃球全世界都知，雖然台灣大把人好波過佢，不過勝在愛玩花式夠好睇，一樣令不少女星中伏，其中包括溫嵐及孫燕姿等，和蔡依林拍拖4年，低調卻維持得最耐。而與主播侯佩岑的「周侯戀」，維持1年多最終因兩人對婚姻意見分歧而分手，33歲的他愈溝愈後生，戀上18歲𡃁模昆凌。 ####
中頭獎
接唔住個籃球而慘食波餅嘅Jeana，中完頭獎後痛到坐喺地下，要隊友安慰。
好痛呀！
去年9月，與柏文認識4年的Jeana，首次在活動中同場已經密密斟，其後又被雜誌影到撐枱腳，不過Jeana始終唔肯認拍拖。《壹週刊》圖片
打茅波
自稱搵男友柏文教打波，但原來Jeana好屎波，Suki一下就搶走個籃球，但Jeana一於少理，又扯又拉都要追番個波！
男女混戰
第一次搞籃球賽，Jeana公司總動員到齊，喺中場休息時，仲猜拳分開兩隊，打男女混合賽。
雨中繑實本週日（17日），完場後，Avis同Mia一齊走，咁啱打1號風球，仲落大雨，媽模Mia更乘機繑到實一實，唔講真係以為係情侶。
公然拖手之後Avis和Mia行到停車場攞車，Mia依然拖實Avis，Avis因住俾娜姐大刑侍候。
着住娜姐娜姐身在上海出席電影節活動，Avis就着住佢件波衫落場，表面工夫做足。
密咬耳仔 Avis有時間休息吓，但Mia趁空檔即刻同佢密密斟，果然識爭取時間。
留言列表
{{ article.title }}
